ကရင်အမျိုးသားအစည်းအရုံး(KNU) တပ်မဟာ ၅ နယ်မြေအတွင်းက ကရင်ပြည်နယ် ကမမောင်း မြို့နယ်ခွဲ ကတိုင်တိကျေးရွာရဲစခန်းကို မတ် ၄ ရက် မနက် ၁ နာရီဝန်းကျင်လောက်က KNLA မဟာမိတ်ပူးပေါင်းတပ်ဖွဲ့တွေက စီးနင်းတိုက်ခိုက် မီးရှို့ဖျက်ဆီးခဲ့တယ်လို့ ဖာပွန်ခရိုင် ပြည်သူကာကွယ်ရေးအဖွဲ့တာဝန်ရှိသူက ပြောပါတယ်။
စစ်ကောင်စီရဲ့ ရဲစခန်းကို ဝင်ရောက်တိုက်ခိုက်ခဲ့ရာ ကျေးရွာအပြင်မှာ အခြေစိုက်ထားတဲ့ ကတိုက်တိတပ်စခန်းနဲ့ ၁၀၁၃ နယ်ခြားစောင့်(BGF)တပ်ရင်းကနေ လက်နက်ကြီး လက်နက်ငယ် တွေနဲ့ ပစ်ခတ်ခဲ့တဲ့အတွက် ၁ နာရီနီးပါးကြာ ပစ်ခတ်မှုဖြစ်ပွားခဲ့ရာမှာ ရဲစခန်းအတွင်း နေထိုင်တဲ့ ရဲတပ်သားရဲ့ မိခင်တဦး ကျည်ထိမှန်သေဆုံးခဲ့ပါတယ်။
ဖာပွန်ခရိုင်ပြည်သူကာကွယ်ရေးအဖွဲ့ တာဝန်ရှိသူက “ဒီနေ့မနက်ပိုင်း ၁ နာရီ ၁၅ လောက်မှာ တိုက်ခိုက်မှုဖြစ်တယ်။ ရဲစခန်းကိုလည်း မီးရှို့လိုက်တယ်။ သိပ်ပြီးတော့ လောင်ကျွမ်းမှု မဖြစ် လိုက်ဘူး။ တပ်စခန်းက လက်နက်ကြီးနဲ့ကော လက်နက်ငယ် ရော လှမ်းပစ်တာတော့ ပြန်ဆုတ်ခွာ ခဲ့တယ်”လို့ ပြောပါတယ်။
ကတိုင်တိရဲစခန်းအတွင်း ရဲတပ်ဖွဲ့ဝင်အင်အား ၁၅ ဦးနီးပါးရှိပြီး ဝင်ရောက်စီးနင်းတိုက်ခိုက်ချိန် ရဲတပ်ဖွဲ့ဝင်တွေဟာ ၁၀၁၃ နယ်ခြားစောင့်(BGF)တပ်ရင်းမှာ သွားရောက် အင်အားဖြည့်တင်းပြီး ပူးပေါင်းနေတဲ့အတွက် စခန်းအတွင်းမှာ တပ်ဖွဲ့ဝင်မိသားစုတွေလောက်ပဲကျန်ရှိတဲ့အတွက် KNLA မဟာမိတ်ပူးပေါင်းတပ်ဖွဲ့တွေ ပြန်လည်ဆုတ်ခွာခဲ့တာလို့လည်း ဆိုပါတယ်။
နှစ်ဖက်အပြန်အလှန်တိုက်ပွဲဖြစ်ပွားခဲ့တဲ့အတွက် ဒေသခံပြည်သူတွေဟာ စိုးရိမ်ကြောက်လန့်ပြီး နေအိမ်အတွင်းက ဗုံးခိုကျင်းတွေနဲ့ လုံခြုံရာနေရာတွေမှာ ပုန်းခိုနေခဲ့ရတယ်လို့ ဒေသခံ အမျိုးသမီး တဦးက ပြောပါတယ်။
တပ်မဟာ ၅ နယ်မြေအတွင်း စစ်ကောင်စီလက်အောက်ခံတပ်နဲ့ နယ်မြေခံ KNLA မဟာမိတ် ပူးပေါင်းတပ်ဖွဲ့တွေနဲ့ တိုက်ပွဲတွေဖြစ်ပွားနေပါတယ်။
စစ်ကိုင်းတိုင်းဒေသကြီး၊ မုံရွာမြို့နယ်ရှိ ကျောက်ကြီးတောင်နဲ့ ဗောဓိတထောင်တောင်တွေပေါ်က တာဝါတိုင်စောင့်စစ်ကောင်စီအထိုင်စခန်း နှစ်ခုကို စီးနင်းတိုက်ခိုက်ခဲ့ကြောင်း MPDF က ဒီနေ့ ဖေဖော်ဝါရီ ၁၉ ရက်နေ့မှာ ထုတ်ပြန်လိုက်ပါတယ်။
“ကျနော်တို့ မုံရွာဆိုတာက နမခ (အနောက်မြောက်တိုင်းစစ်ဌာနချုပ်) အခြေစိုက်တယ်။ ဒီလိုအခြေစိုက်တဲ့နေရာမှာတောင် ကျနော်တို့ ရဲဘော်တွေ သူတို့စခန်းကို ဝင်သိမ်းနိုင်တယ်ဆိုတာ ပြည်သူကို ချပြနိုင်အောင်နဲ့ စကစတွေကို ချေမှုန်းတိုက်ခိုက်တဲ့အနေနဲ့ သိမ်းခဲ့တာပါ” လို့ မုံရွာမြို့နယ်ပြည်သူ့ကာကွယ်ရေးအဖွဲ့ (ပကဖ) ရဲ့ တာဝန်ခံ ဗိုလ်အောင်ကျော်က ပြောပါတယ်။
ဖေဖော်ဝါရီ ၉ ရက်နေ့၊ မနက်အစောပိုင်း ၁ နာရီ ၄၅ မိနစ်က ဒီစခန်းနှစ်ခုကို တပြိုင်နက်တည်း စီးနင်းတိုက်ခိုက်ခဲ့တာဖြစ်ပြီး ကျောက်ကြီးတောင်တောင်ပေါ်ရှိ စစ်ကောင်စီစခန်းကိုတော့ မီးရှို့ဖျက်ဆီးသိမ်းပိုက်နိုင်ခဲ့တယ်လို့ ဆိုပါတယ်။
စခန်းစောင့်စစ်ကောင်စီတပ်သားတွေ သေဆုံးထိခိုက်ဒဏ်ရာရမှုလည်းရှိခဲ့ပြီး ကျောက်ကြီးတောင်စခန်းက သုံးယောက်၊ ဗောဓိတထောင်စခန်းက လေးယောက်၊ စုစုပေါင်းစစ်ကောင်စီတပ်သား ခုနစ်ယောက် သေဆုံးခဲ့ကြောင်း ထောက်လှမ်းရေးသတင်းတွေနဲ့ မျက်မြင်သက်သေတွေရဲ့ အတည်ပြုချက်အရ သိရတယ်လို့ ဗိုလ်အောင်ကျော်က ဆိုပါတယ်။
“ဒီစခန်းတွေနားမှာ ပြည်သူတွေ အသုံးပြုနေတဲ့ လမ်းရှိတယ်။ ဒီလမ်းပေါ်မှာ သွားလာနေတဲ့ ပြည်သူတွေကို ငွေညစ်တောင်းခံတာတွေ၊ ပါလာတဲ့ ပစ္စည်းတွေကို အကြမ်းဖက်သိမ်းယူတာတွေလုပ်တယ်ပေါ့။ နောက် မြင်းမူတို့၊ အရာတော်တို့ဘက် စစ်ကြောင်းထိုးပြီး ပြန်လာတဲ့ စစ်ကြောင်းတွေက အဲ့ဒီစခန်းတွေမှာ နားတာပေါ့။ လက်ရှိမှာတော့ ကျောက်ကြီးတောင်စခန်းက မီးရှို့ဖျက်ဆီးခံလိုက်ရလို့ မရှိတော့ဘူး။ ဗောဓိတထောင်တောင်က စခန်းကတော့ အင်အားဖြည့်တာတွေဘာတွေလုပ်ပြီး ဆက်ထိုင်နေသေးတယ်” လို့ ဗိုလ်အောင်ကျော်က ပြောပါတယ်။
အဲ့ဒီတိုက်ခိုက်မှုကို မုံရွာခရိုင်ကွပ်ကဲရေးရဲ့ ကွပ်ကဲမှုနဲ့ မုံရွာခရိုင်အမှတ် (၁) တပ်ရင်း၊ MPDF၊ မုံရွာမြို့နယ်ပြည်သူ့ကာကွယ်ရေးအဖွဲ့ - ပကဖတို့ ပူးပေါင်းစီးနင်းပစ်ခတ်ခဲ့တာဖြစ်ပြီး ကာကွယ်ရေးပူးပေါင်းအဖွဲ့တွေဘက်က အထိအခိုက်မရှိ ဆုတ်ခွာနိုင်ခဲ့တယ်လို့ ဆိုပါတယ်။
စစ်ကောင်စီတပ်သားတွေ သေဆုံးထိခိုက်မှုအခြေအနေနဲ့ပတ်သက်ပြီး DVB အနေနဲ့ သီးခြားအတည်ပြုနိုင်ခြင်းတော့ မရှိပါဘူး။
