ဘင်္ဂလားဒေ့ရှ်နိုင်ငံ မြို့တော် ဒါကာမှာ စီးပွားရေး အဆောက်အအုံတခု အင်အားပြင်းပြင်း ပေါက်ကွဲခဲ့မှုကြောင့် သေဆုံးသူ ၁၉ ဦးအထိ မြင့်တက်လာပြီး ကယ်ဆယ်ရေး ဆက်လုပ်နေတယ်လို့ မီးသတ်တပ်ဖွဲ့က ပြောပါတယ်။
ဒါကာမြို့က ဂါလစ်စတန်စ် စစ်ဒစ်ခ် စျေးမှာရှိတဲ့ ကဖေးကွင်း အဆောက်အဦမှာ မတ် ၇ ရက် ဒေသစံတော်ချိန် ညနေ ငါးနာရီလောက် အကြီးအကျယ်ပေါက်ကွဲလို့ လူ ၁၀၀ ကျော် ဒဏ်ရာရခဲ့ပြီး အထပ်မြင့် အဆောက်အအုံ နှစ်လုံး ပျက်စီးခဲ့တာပါ။
အဆောက်အအုံတခု လုံးဝပြိုကျခဲ့တာ မရှိပေမယ့် ကြမ်းပြင်ကနေ အပျက်အစီးတွေ ပြိုကျလို့ လမ်းသွားလမ်းလာတွေ အပြင်းအထန် ဒဏ်ရာရခဲ့တယ်လို့ မီးသတ်ဌာနက ပြောပါတယ်။
ပေါက်ကွဲမှု ပြင်းထန်လို့ အနီးနားက အဆောက်အအုံတွေနဲ့ ဈေးဝယ်စင်တာ အများအပြားက မှန်နံရံတွေ ကွဲအက် ပေါက်ကွဲခဲ့တဲ့အပြင် အဆောက်အအုံရဲ့ အပြင်ဘက်လမ်းတွေအထိ ဖောက်ထွင်းဝင်ရောက်ခဲ့ပြီး လမ်းတဖက်ခြမ်းမှာ ရပ်နေတဲ့ ဘတ်စ်ကားတစီးလည်း ဆိုးဆိုးရွားရွား ပျက်စီးခဲ့ပါတယ်။
အဆောက်အအုံတွင်း ပေါက်ကွဲမှုဟာ မတော်တဆလား၊ အဖျက်အမှောင့်လား ဆိုတာ သိဖို့ တာဝန်ရှိသူတွေက စုံစမ်းစစ်ဆေးနေပြီး ငါးရက်အတွင်း အစီရင်ခံစာ တင်သွင်းမယ်လို့ သိရကြောင်း ရိုက်တာသတင်းမှာ ဖော်ပြထားပါတယ်။
