စီးပွားရေးထိပ်သီး ကမ္ဘာ့နိုင်ငံများအဖွဲ့ (G7) ဟာ ယူကရိန်းကို ဒီနှစ်အတွက် စီးပွားရေးထောက်ပံ့မှု ဒေါ်လာ ၃၉ ဘီလီယံအထိ တိုးမြှင့်ခဲ့ပြီး ယူကရိန်းနိုင်ငံအတွက် IMF အစီအစဉ်ကို မတ်လကုန်မှာ လုပ်ဆောင်ဖို့ တိုက်တွန်းခဲ့ကြောင်း အစုအဖွဲ့ရဲ့ လက်ရှိဥက္ကဋ္ဌ ဂျပန်က ပြောလိုက်ပါတယ်။
G7 အနေနဲ့ ရုရှားအပေါ် နောက်ထပ်အရေးယူမှုတွေကို မဆုံးဖြတ်ခင်မှာ လက်ရှိ ဒဏ်ခတ်ပိတ်ဆို့ထားမှုတွေရဲ့ ထိရောက်မှုကို အကဲဖြတ်ဖို့လိုအပ်ကြောင်း ဂျပန် ဘဏ္ဍာရေးဝန်ကြီး ရှူနိချိ ဆူဇူကီးက သတင်းထောက်တွေကို ပြောပါတယ်။
ဒီဆုံးဖြတ်ချက်ဟာ ရုရှားရဲ့ ယူကရိန်းကို ကျူးကျော်စစ် နှစ်ပတ်လည်နေ့မတိုင်ခင် အကြိုနေ့မှာ အစုအဖွဲ့ရဲ့ ဘဏ္ဍာရေးဝန်ကြီးတွေနဲ့ ဗဟိုဘဏ် အုပ်ချုပ်ရေးမှူးတွေ အစည်းအဝေးအပြီးမှာ ဆုံးဖြတ်ခဲ့တာပါ။
အနောက်နိုင်ငံတွေရဲ့ ပိတ်ဆို့အရေးယူမှုတွေဟာ ရုရှားရဲ့ “အထူးစစ်ဆင်ရေး” အတွက် ငွေကြေးထောက်ပံ့မှုကို ထိခိုက်စေဖို့ ရည်ရွယ်ထားပေမဲ့ စစ်ပွဲတွေက ဆက်ဖြစ်နေတာပါ။
ယူကရိန်းနိုင်ငံဟာ ချက်ချင်းလက်ငင်း ဘဏ္ဍာရေးအကူအညီ လုံလောက်စေပြီး စစ်ပွဲအလွန် ပြန်လည်တည်ဆောက်ရေးမှာ စနစ်တကျ ပြုပြင်ပြောင်းလဲမှုတွေကို ပံ့ပိုးကူညီရာမှာ အထောက်အကူဖြစ်စေမယ့် အပြည်ပြည်ဆိုင်ရာ ငွေကြေးရန်ပုံငွေအဖွဲ့ရဲ့ ဒေါ်လာ ၁၅ ဘီလီယံ အစီအစဉ်ကို ရယူထားနိုင်ဖို့ မျှော်လင့်နေပါတယ်။
ကမ္ဘာ့စီးပွားရေးဟာ မျှော်မှန်းထားတာထက် ပိုပြီး ခံနိုင်ရည်ရှိတယ်လို့ G7 နိုင်ငံတွေက ယုံကြည်ထားပေမဲ့ ငွေကြေးဖောင်းပွမှု မြင့်မားနေဆဲဖြစ်ကြောင်း ဂျပန်ဘဏ်အုပ်ချုပ်ရေးမှူး ဟာရုဟိကို ကူရိုဒါက ပြောပါတယ်။
G7 ရဲ့ ဘဏ္ဍာရေးခေါင်းဆောင်တွေဟာ G20 နိုင်ငံများ ဘဏ္ဍာရေးအကြီးအကဲတွေရဲ့ အစည်းအဝေးမတိုင်ခင် အိန္ဒိယနိုင်ငံ ဘန်ဂါလူရူမှာ စုဝေးခဲ့ကြတာ ဖြစ်ပါတယ်။
