ကမ္ဘာ့အကောင်းဆုံး ဘောလုံးကြယ်ပွင့် လီယွန်နယ်မက်ဆီရဲ့ ဇနီး အန်တိုနီလာ ရော့ကူဇိုရဲ့ မိသားစုပိုင် စူပါမားကက်ကို မတ် ၂ ရက်က ဆိုင်ကယ်စီးသူ ၂ ယောက်က သေနတ်နဲ့ လာပစ်ခဲ့ကြပြီး မက်ဆီအတွက် ခြိမ်းခြောက်စာတစောင်ကိုလည်း ဆိုင်တံခါးမှာ ချန်ထားခဲ့ကြောင်း ပြည်တွင်းမီဒီယာတွေနဲ့ မြို့တော်ဝန် ပါဘလို ဂျက်ဗ်ကင်က ပြောပါတယ်။

အာဂျင်တီးနားနိုင်ငံ အလယ်ပိုင်း ဆန်တာဖေးပြည်နယ်၊ ရိုဆာရီယိုမြို့ရှိ ရော့ကူဇို မိသားစုပိုင် စူပါမားကက်တည်ရှိရာ လူသွားလမ်းပေါ်မှာ ကျည်ဆန်ရာတွေကို ရုပ်မြင်သံကြားမှာ ပြသခဲ့ပြီး ဆိုင်အရှေ့ဘက်မှာ ၁၄ ချက် ပစ်ခတ်ခံခဲ့ရကာ မတ် ၂ ရက် မနက်မှာ စူပါမားကက်ကို ပိတ်ထားဆဲဖြစ်ပါတယ်။

ဆိုင်တံခါးပေါက်မှာ “မက်ဆီ၊ ငါတို့ မင်းကို စောင့်နေတယ်။ မြို့တော်ဝန် ဂျာဗ်ကင်ကလည်း မူးယစ်အေးဂျင့်တယောက်ဖြစ်ပြီး မင်းကို ဂရုစိုက်မှာမဟုတ်ဘူး” လို့ လက်ရေးနဲ့ စာတစောင်ကိုလည်း ထားခဲ့ပါတယ်။

နေ့စဉ် စပါးတန်ချိန် ထောင်နဲ့ချီ တင်ဆောင်လာတဲ့ သင်္ဘောတွေ ဒါဇင်နဲ့ချီပြီး ဆိုက်ကပ်တဲ့ အရေးကြီးတဲ့ ဆိပ်ကမ်းမြို့မှာ လတ်တလောနှစ်ပိုင်းအတွင်း ကြီးထွားလာတဲ့ ရာဇဝတ်မှုတွေကို လုံခြုံရေးတပ်ဖွဲ့တွေအနေနဲ့ ထိထိရောက်ရောက် တိုက်ဖျက်ခဲ့ခြင်း မရှိဘူးလို့ မြို့တော်ဝန် ဂျက်ဗ်ကင်က အပြစ်တင်ထားပါတယ်။

အာဂျင်တီးနား လုံခြုံရေးဝန်ကြီး အာနီဘလ် ဖာနန်ဒက်ဇ်က ဒီတိုက်ခိုက်မှုဟာ ရိုဆာရီယိုမြို့မှာ လွန်ခဲ့တဲ့ အနှစ် ၂၀ အတွင်း ဖြစ်ပွားနေတဲ့ “ပုံမှန်” ကိစ္စမျိုးဖြစ်နေတယ်လို့ ပြောကြားခဲ့ပြီး အမျိုးသားအစိုးရအနေနဲ့ ဒေသတွင်း မလုံခြုံမှုတွေကို တိုက်ဖျက်ဖို့ လုပ်ဆောင်နေတယ်လို့ ဗျူနိုအေရီးစ်မှာ သတင်းထောက်တွေကို ပြောပါတယ်။

အာဂျင်တီးနားသမ္မတ အယ်လ်ဘာတို ဖာနန်ဒက်ဇ်ကလည်း  ရာဇဝတ်မှုတွေဟာ အာဂျင်တီးနား အရှေ့မြောက်ပိုင်းမှာ ဆိုးရွားတဲ့ပြဿနာဖြစ်ကြောင်း အသိအမှတ်ပြုခဲ့ပြီး အကြမ်းဖက်မှုကို တိုက်ဖျက်ဖို့ တိုက်တွန်းခဲ့ပါတယ်။ 

အာဂျင်တီးနားနိုင်ငံအတွင်း ရိုဆာရီယိုမှာ လူသတ်မှုနှုန်း အမြင့်ဆုံးဖြစ်ပြီး လူဆိုးဂိုဏ်းတွေဟာ မူးယစ်ဆေးဝါး ရောင်းဝယ်မှုတွေနဲ့ ဆက်စပ်နေပါတယ်။ တရားရေးဆိုင်ရာ တိုင်ကြားချက်တွေအရ ခိုက်ရန်ဖြစ်ပွားမှုတွေနဲ့ သေဆုံးမှုတွေ မကြာခဏ ဖြစ်ပွားနေပါတယ်။