မကွေးတိုင်းအတွင်း တိုက်ပွဲတွေမှာ စစ်ကောင်တပ်ဘက်က ထိခိုက်ကျဆုံးများပြီး ဒေသခံတွေရဲ့ နေအိမ်တွေကို မီးရှို့ဖျက်ဆီးတာ၊ သတ်ဖြတ်တာတွေ လုပ်နေတာကြောင့် ပြည်သူတွေ တောတောင်တွေထဲ ဖြစ်သလို နေထိုင်နေကြကာ အကူအညီတွေ လိုအပ်နေတယ်လို့ သိရပါတယ်။

ပေါက်မြို့နယ် သစ်ညီနောင်ရွာကို မနေ့ညနေ ၄ နာရီလောက်မှာ စစ်ကောင်စီတပ်တွေဟာ သေနတ်တွေနဲ့ ဆက်တိုက်ပစ်ခတ် ဝင်ရောက်လာပြီးနောက် ဘုန်းကြီးကျောင်းမှာ ရွာသူရွာသားတွေ ဘယ်သွားတုန်းလို့ မေမြန်းခဲ့ကြောင်း သစ်ညီနောင် ရွာသားတယောက်က ပြောပါတယ်။

အဲဒီနောက် စစ်ကောင်စီတပ်တွေဟာ ရွာရဲ့အနောက်ဘက် တမိုင်လောက်အကွာမှာရှိတဲ့ ဒညင်းခုံရွာမှာ ညအိပ်စခန်းချပြီး ဧပြီ ၂၈ ရက် မနက် ၈ နာရီကျော်လောက်မှာ သေနတ်တွေ ဆက်တိုက်ပစ်ခတ် ဝင်ရောက်ပြီး နေအိမ်တွေကို မီးရှို့ဖျက်ဆီးခဲ့ကြတယ်လို့ ဆိုပါတယ်။

သစ်ညီနောင်ရွာသားက “ပြည်သူလူထုမှာ ထမင်းငတ်သူကလည်း ငတ်ကုန်ပြီ၊ သက်ကြီးရွယ်ကိုတွေ၊ ကိုယ်ဝန်ဆောင်တွေနဲ့ ကလေးသူငယ်တွေကို ကျောပိုးပြီး ထွက်ပြေးကြရကာ တောထဲ နေပူထဲတွေမှာ နေထိုင်ကြရတယ်” လို့ ပြောပါတယ်။

စစ်ကောင်စီတပ်တွေ မီးရှို့ဖျက်ဆီးသွားတာကြောင့် နေအိမ် ၇၀ လောက် မီးလောင်ဆုံးရှုံးခဲ့တယ်လို့ ခန့်မှန်းရပြီး ရွာသူရွာသားတွေ စုပေါင်း မီးငြှိမ်းသတ်ခဲ့ရပြီး လက်ရှိမှာ နေထိုင်စားသောက်ရေးအတွက် အကူအညီတွေ လိုအပ်နေတယ်လို့ ဆိုပါတယ်။

သစ်ညီနောင်ကျေးရွာကို ဇန်နဝါရီ ၂၂ ရက်ကလည်း စစ်ကောင်စီတပ်တွေနဲ့ ပျူစောထီးတွေ ဝင်ရောက်လာပြီး နေအိမ်အမိုးအကာတွေနဲ့ အိမ်တိုင်တွေကို ဓားနဲ့ခုတ် ဖျက်ဆီးခဲ့တာကြောင့် နေအိမ် ၃၆ လုံး ပျက်စီးဆုံးရှုံးခဲ့တဲ့အပြင် အဖိုးတန်ပစ္စည်းတွေနဲ့ ငွေကြေးတွေကိုလည်း ယူဆောင်ကာ လူငယ် ၂ ယောက်ကို ဖမ်းဆီးနှိပ်စက်ခဲ့ကြတယ်လို့ သိရပါတယ်။

ပေါက်မြို့နယ် ပုသိမ်-မုံရွာကားလမ်းမှာလည်း ဧပြီ ၂၇ ရက် မွန်းတည့် ၁၂ နာရီလောက်က YRF တပ်ဖွဲ့တွေ စခန်းချထားတဲ့ ရွာဘက်ကို မီးရှို့ဖို့လာတဲ့ စစ်ကောင်စီတပ်သားနဲ့ ပျူစောထီး အင်အား ၅၀ လောက်ကို မိုင်းဆွဲတိုက်ခိုက်ပြီး လက်နက်ကြီးတွေနဲ့ ပစ်ခတ်ခဲ့တာကြောင့် စစ်ကောင်စီဘက်က ၅ ယောက်လောက် သေဆုံးကာ အများအပြား ဒဏ်ရာရရှိခဲ့တယ်လို့ YRF ခေါင်းဆောင် ဗိုလ်နားပေါက်က ဒီဗွီဘီကို ပြောပါတယ်။

ဒီနောက် စစ်ကောင်စီတပ်သားတွေနဲ့ ပျူစောထီးတွေဟာ ထိခိုက်ကျဆုံးသူတွေကို သယ်ဆောင်ပြီး ပြန်လည်ဆုတ်ခွာသွားကြတယ်လို့ ဆိုပါတယ်။

လူငယ်တော်လှန်ရေးတပ်ဦး (YRF) အနေနဲ့ ပုသိမ်-မုံရွာ လမ်းပိုင်းမှာ နယ်မြေစိုးမိုးမှု ရယူထားပြီး ဧပြီ ၂၆ ရက် ည ၁၂ နာရီကစလို့ ဖြတ်သန်းသွားလာတာတွေ မပြုလုပ်ကြဖို့ ကြေညာချက် ထုတ်ပြန်ထားပါတယ်။

ပေါက်မြို့နယ်တောင်ပိုင်းအစပ်မှာ ဧပြီ ၇ ရက်ကစလို့ စစ်ကောင်စီတပ်တွေက ကျေးရွာ ၂၀ လောက်ကို ဆက်တိုက် ဝင်ရောက်မီးရှို့ပြီး အကြမ်းဖက်နေတာကြောင့် ဒေသခံပြည်သူ ၂၀,၀၀၀ လောက် ဘေးလွတ်ရာကို ထွက်ပြေးပုန်းအောင်းနေရသလို အမိုးအကာ၊ စားနပ်ရိက္ခာနဲ့ ဆေးဝါးတွေ အရေးပေါ် အကူအညီ လိုအပ်နေတယ်လို့ သိရပါတယ်။

မကွေးတိုင်း စေတုတ္တရာမြို့နယ် မဏ္ဍပ်ကိုင်းရွာအနောက်ဘက် ငဖဲ-စေတုတ္တရာလမ်းမှာလည်း ဧပြီ ၂၇ ရက် မွန်းတည့် ၁၂ နာရီခွဲလောက်က စစ်ကောင်စီယာဉ်တန်း ကား ၅ စီးကို PRA (မကွေး) နဲ့ စေတုတ္တရာ PDF တို့ ပူးပေါင်းပြီး မိုင်း ၅ လုံးဆွဲ တိုက်ခိုက်ခဲ့တယ်လို့ PRA (မကွေး) ရဲ့ စစ်ရေးဆိုင်ရာတာဝန်ခံ ဗိုလ်ဟာဂျူလီက ဒီဗွီဘီကို ပြောပါတယ်။

ကပစစက်ရုံက လူကြီးခရီးစဉ်ရှိတယ် ဆိုတာကို ပြီးခဲ့တဲ့ ၃ ရက်လောက်ကတည်းက သတင်းကြိုရထားပြီး ကပစ ၁၄ နဲ့ ကပစ ၂၀ ဘက်ကို သွားမယ်ဆိုတာ သိရတာကြောင့် စစ်ကောင်စီယာဉ်တန်းတွေကို တိုက်ခိုက်ဖို့ ကြိုတင်ပြင်ဆင် တိုက်ခိုက်ခဲ့တာဖြစ်ပြီး ကား ၂ စီး ထိခိုက်ပျက်စီးခဲ့သလို စစ်ကောင်စီဘက်က ၂ ယောက်သေဆုံးနိုင်ပြီး အများအပြား ဒဏ်ရာရသွားတယ်လို့ ပြောပါတယ်။

အပြင်းအထန် ဒဏ်ရာရရှိခဲ့တဲ့ စစ်ကောင်စီတပ်သား ၄ ယောက်ကတော့ စေတုတ္တရာ မြို့နယ်ပြည်သူ့ဆေးရုံမှာ ဆေးကုသမှု ခံယူနေတယ်လို့ ဆိုပါတယ်။

မဏ္ဍပ်ကိုင်းရွာသားတယောက်က “မဏ္ဍပ်ကိုင်းရွာနားမှာ ဒီကနေ့ နေ့လယ်ပိုင်းက တိုက်ပွဲဖြစ်တာ ဟုတ်ပါတယ်ဗျ။ ကျနော်က တောထဲကို ဝါးခုတ်အောင်သွားတဲ့အချိန် ပေါက်ကွဲသံ ၅ ချက်လောက် ကြားလိုက်ရပြီး အပြန်အလှန် ပစ်ခတ်သံ နာရီဝက်လောက် ကြားလိုက်ရတယ်။ ကျနော်လည်း ဝါးဆက်မခုတ်ရဲဘူး၊ လုံခြုံမယ်ထင်တဲ့ ချောက်ကြားတခုမှာ ပုန်းအောင်းနေခဲ့ရတယ်” လို့ ပြောပါတယ်။

မကွေးတိုင်းအတွင်း စစ်တပ်အာဏာသိမ်းတဲ့ ပြီးခဲ့တဲ့ ဖေဖော်ဝါရီ ၁ ရက်နေ့ကနေ အခုနှစ် ဧပြီ ၁၃ ရက်အထိ စစ်ကောင်စီတပ်နဲ့ လက်အောက်ခံ အဖွဲ့အစည်းတွေက မီးရှို့တာကြောင့် ပျက်စီးသွားတဲ့ လူနေအိမ်ပေါင်း ၁,၈၀၀ ကျော်ရှိတယ်လို့ Data for Myanmar ရဲ့ ထုတ်ပြန်ချက်အရ သိရပါတယ်။

မကွေးတိုင်း ဆောမြို့နယ်နဲ့ စေတုတ္တရာမြို့နယ်ကြားမှာ မတ် ၁၅ ရက်နေ့ ညနေက စစ်ကောင်စီတပ်တွေကို မိုင်းဆွဲတိုက်ခိုက်ခဲ့တာကြောင့် အရာရှိအပါအဝင် ၅ ယောက်လောက် သေဆုံးနိုင်တယ်လို့ လောင်းရှည် PDF က ပြောပါတယ်။

ဆောနဲ့ စေတုတ္တရာမြို့နယ်ကြားက ကြံစိမ့်ကျေးရွာနဲ့ ညောင်ပင်ကျင်းရွာ လမ်းပိုင်းမှာ 4WD အိမ်စီးကားနဲ့ ထွက်ခွာလာတဲ့ စစ်ကောင်စီတပ်သား ၁၀ ယောက်လောက်ကို လောင်းရှည် PDF က မိုင်းဆွဲတိုက်ခိုက်ခဲ့တာလို့ ဆိုပါတယ်။

အဲဒီကားပေါ်ကနေ စစ်ကောင်စီတပ်သား ၃ ယောက်လောက်က လက်နက်ငယ်တွေနဲ့ မနားတမ်း ပြန်လည်ပစ်ခတ်ခဲ့တယ်လို့ လောင်းရှည် PDF ရဲ့ ပြန်ကြားရေးတာဝန်ခံက ပြောပါတယ်။

တိုက်ပွဲဖြစ်နေစဉ် ၁၀ မိနစ်လောက်အကြာမှာ စစ်ကောင်စီဘက်က ကား ၃ စီး အင်အားအပြည့်နဲ့ တပ်ကူရောက်လာလို့ လောင်းရှည် PDF က ရဲဘော်တွေ အထိအခိုက် အကျအဆုံး မရှိအောင် ခက်ခက်ခဲခဲ ရုန်းထွက်ခဲ့ကြရတယ်လို့ ပြောပါတယ်။

စစ်ကောင်စီဘက်က ပျက်စီးသွားတဲ့ ကားနဲ့ သေဆုံးဒဏ်ရာရတဲ့သူတွေကို ကား ၃ စီးနဲ့ သယ်ဆောင်ပြီး ကပစ ၂၅ ထဲ သယ်သွားကြတယ်လို့ ဆိုပါတယ်။

လောင်းရှည်မြို့ကနေ ဆောမြို့ဘက်ကို စစ်ကြောင်းထိုးလာတဲ့ စစ်ကောင်စီစစ်ကြောင်းကိုလည်း မတ်လ ၃ ရက်နေ့မှာ လောင်းရှည် PDF က တိုက်ခိုက်ခဲ့တယ်လို့ သိရပါတယ်။

နှစ်ဖက်တိုက်ပွဲတွေနဲ့ ပတ်သက်လို့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။