ဧရာဝတီတိုင်း၊ လပွတ္တာမြို့နယ်၊ ကိုင်းသောင်ရွာမှာ စစ်ကောင်စီက အသစ်ခန့်လိုက်တဲ့ အုပ်ချုပ်ရေးမှူးက ငါးဖမ်းလှေတွေဆီကနေ တစီးကို ကျပ် ၁ သိန်းစီတောင်းခံ ဆက်ကြေးတောင်းနေသလို စစ်ကောင်စီကင်းစခန်းကလည်း ငါး၊ ပုစွန်တွေ တောင်းနေတယ်လို့ ဒေသခံတွေက ပြောပါတယ်။

ဒေသခံတယောက်က “အုပ်ချုပ်ရေးမှူးအသစ် ခန့်လိုက်ပြီးတာနဲ့ ဒီလိုတွေ လုပ်တာပဲ။ တခြားရွာတွေမှာ မကောက်ဘူး။ ပြောရရင် ရွာသားက သင်ပေးတာပေါ့။ အရင်ခေတ်ကလည်း ရွာမှာ အဲလိုရှိခဲ့ဖူးတာကိုး။ ရွာက ငါးဖမ်းလှေတွေကို အစည်းအဝေးခေါ်ပြီးပြောတာ။ ရွာမှာက ကမ်းနီးထွက်နေတဲ့ ငါးဖမ်းလှေ ၁၀၀ ကျော်ရှိတယ်” လို့ ပြောပါတယ်။

ဧည့်စာရင်းတိုင်တဲ့အခါမှာလည်း ကျပ် ၁၀၀၀ စီပေးရပြီး ထောက်ခံစာတွေ ယူတဲ့အခါမှာတော့ ကျပ် ၅၀၀၀ ကနေ ၁၀၀၀၀ အထိပေးရတယ်လို့လည်း ဒေသခံက ပြောပါတယ်။

ဧည့်စာရင်းကို ရွာအဝင်က ရေကင်း(စစ်တပ်)မှာလည်း တိုင်ရပြီး အဲဒီရေကင်းဟာ ငါးဖမ်းလှေတွေဆီကကနေ နေ့တိုင်း ငါး၊ ပုစွန်တွေ တောင်းခံတယ်လို့ ဒေသခံတွေက‌ ပြောပါတယ်။

“ရေကင်းမှာ မော်တော်အဝင်အထွက် တုံးထုရတယ်။ ပြန်ဝင်လာရင် ငါးဟင်းစား ပေးရတယ်။ နေ့ဘက်ဆိုရင် စစ်သားတယောက်က ရေခဲပုံးနဲ့ ရွာမှာ လာလာသယ်တယ်။ ငါးခြောက်ဆို သူတို့ဆီမှာ အိတ်လိုက်ပဲ။ မြို့တင်ပြီးရောင်းလား၊ သူတို့အိမ်ပဲ ပို့ပေးတာလားတော့ မသိဘူး” လို့ ဒေသခံတယောက်က ပြောပါတယ်။

မုန်တိုင်းရှိတဲ့အခါ   အနီးနားက ကျေးရွာကလှေတွေ ရွာမှာလာကပ်ရင်လည်း ရေကင်းကိုရော၊ ရွာအုပ်ချုပ်ရေးမှူးကိုပါ ငွေပေးရတယ်လို့ ရွာသားတွေထံက သိရပါတယ်။

ပဲခူးတိုင်းအနောက်ခြမ်း၊ ပြည်မြို့မှာ လမ်းလျှောက်သင်္ကြန်ကျင်းပနိုင်ဖို့ စီးပွားရေးလုပ်ငန်းရှင်တွေ ဆီကနေ စစ်ကောင်စီလက်အောက်ခံ ဌာနဆိုင်ရာတွေက အတင်းအကျပ် ဆက်ကြေးလိုက်ကောက်နေတယ်လို့ မြို့ခံတွေထံက သိရပါတယ်။ 

စစ်ကောင်စီတပ်၊ မြို့နယ်စည်ပင်သာယာရေးဌာနနဲ့ အုပ်ချုပ်ရေးအဖွဲ့ဝင်တွေပူးပေါင်းပြီး မြို့ပေါ်ရှိ  ကုန်စုံဆိုင်၊ စတိုးဆိုင်၊ ဆန်စက်၊ ဆီစက်၊ သစ်စက်၊ အရက် ဘီယာ ရောင်းချ‌‌တဲ့ ဆိုင်တွေဆီက မတ် ၂၀ ရက်ဒီကနေ့စတင်သွားရောက်ပြီး ငွေကျပ် ၃၀၀၀၀ ကနေ  ၁ သိန်းအထိ လိုက်လံကောက်ခံနေတယ်လို့ မြို့ခံတွေဆီက သိရပါတယ်။

ကုန်စုံဆိုင်ပိုင်ရှင်တဦးက “အရောင်းအဝယ်တွေက မကောင်းတာကြာပြီ။ ကုန်ဈေးနှုန်းတွေက အရမ်းတက်နေတော့ ဒါလေးနဲ့ ရပ်တည်နေတာဆိုတော့လည်း မပိတ်နိုင်သေးဘူး။ သူတို့က သဒ္ဓါကြေးကောက်တာမဟုတ်ဘူး။ သုံးသောင်းအနည်းဆုံး မပေးမနေရပုံစံမျိုးနဲ့ တောင်းတာ။ မိသားစုဝင်ထဲမှာ လက်သုံးချောင်းထောင်ဖူးတယ်ဆို ပိုဆိုးတာပေါ့။ အကြပ်ကိုင်တောင်းတာ”လို့ ဒီဗွီဘီကို ပြောပါတယ်။

မြို့ခံသစ်အရောင်းအဝယ်သမားတဦးကလည်း “ပြည်ထောင်စုနေ့အထိမ်းအမှတ် အားကစားပြိုင်ပွဲလုပ်ခိုင်းတာ ငွေအတော်ကုန်တယ်။ အခုလည်း ကျနော်တို့ အဖွဲ့က ဦးဆောင်ရဦးမယ်။ ဘာပွဲလုပ်လုပ် ကျနော်တို့ သစ်သမားတွေကပဲ ငွေစိုက်လုပ်နေရတာ။ ကြာတော့ ဒဏ်မခံနိုင်တော့ဘူး။ ဒီအလုပ်နားမှရတော့မယ်”လို့ ပြောပါတယ်။

မြို့နယ်အုပ်ချုပ်ရေးအဖွဲ့၊ ရပ်ကျေးအဖွဲ့ဝင်တွေနဲ့ စစ်ကောင်စီတပ်ဖွဲ့ဝင်တွေ လုံခြုံရေးယူကာ လုပ်ငန်းကြည့်ပြီး ကျပ် ၁ သိန်းထိ လိုက်လံကောက်ခံနေတယ်လို့ ဆိုပါတယ်။

ရပ်ကွက်ရာအိမ်မှူးတဦးက “ဒီနေ့ လမ်းလျှောက်သင်္ကြန် ကျင်းပဖို့ဆိုပြီး ထွေအုပ်က ခေါ်တယ်။ မနက်က မြစ်ကမ်းနံဘေးလျှောက်ကြည့်ကြတယ်။ စည်စည်ကားကားကျင်းပနိုင်ဖို့ ခင်ဗျားတို့မှာ တာဝန်ရှိတယ်လို့ ခရိုင်အုပ်ချုပ်ရေးမှူးက ခေါ်ပြောတယ်။ အုပ်ချုပ်ရေးမှူးတွေက သူတို့လူတွေဆိုတော့လုပ်မှာပဲ။ အရင်နှစ်ကလည်း တနိုင်ငံလုံး မလုပ်နိုင်ပေမဲ့ ကျနော်တို့ မြို့မှာတော့ ယိမ်းအကပြိုင်ပွဲတွေ ရပ်ကွက်တိုင်းက ဝင်ပြိုင်ကျရတာပဲ” လို့ ပြောပါတယ်။

မတ် ၂၀ ရက် မနက်ပိုင်းမှာ ခရိုင်စီမံအုပ်ချုပ်ရေးမှူး ဦးသိန်းအောင်နဲ့အဖွဲ့နဲ့ ရေနစ်သူ ကယ်ဆယ်ရေးအသင်းတို့မှ လမ်းလျှောက်သင်္ကြန် ကျင်းပနိုင်ဖို့ နေရာတွေ လိုက်လံကြည့်ရှုနေ တယ်လို့ သိရပါတယ်။