စစ်အာဏာသိမ်းပြီးနောက်ပိုင်း ကချင်ပြည်နယ်၊ ချီဖွေမြို့ကနေ ဆော့လော်မြို့သွားရာ လမ်းတလျှောက်မှာ စစ်ကောင်စီ လက်အောက်ခံ ပြည်သူ့စစ်တပ်ဖွဲ့က စစ်ဆေးရေးဂိတ်တွေ တိုးမြှင့်ချထားပြီး ငွေကြေး အဆမတန် ကောက်ခံနေတယ်လို့ ခရီးသည်တင် မော်တော်ယာဉ် မောင်းနှင်သူတွေက ပြောပါတယ်။

ခရီးသည်တင် ယာဉ်မောင်းတဦးက “အရင်က ချီဖွေနဲ့ ဆော့လော်ကြား စစ်ဆေးရေးဂိတ် သိပ်မရှိဘူး။ စစ်တပ်အာဏာသိမ်းပြီး နောက်ပိုင်းမှပဲ လုံခြုံရေးအကြောင်းပြ ဂိတ်ထိုင်ပြီး ငွေတောင်းနေတာ။ ဂိတ်ကြေးကလည်း မနည်းဘူး၊ တရုတ်ငွေနဲ့ပေးရတာ။ မပေးဘဲ ကျော်သွားရင် သေနတ်လှမ်းဖောက်ပြီး ကျည်ဆန်ဖိုးပါ တောင်းသေးတယ်” လို့ ပြောပါတယ်။

စစ်ကောင်စီလက်အောက်ခံ ပြည်သူ့စစ်တပ်ဖွဲ့ စစ်ဆေးရေးဂိတ်တွေမှာ တဂိတ်ကို တရုတ်ယွမ် ၃၀၀ (မြန်မာငွေ ၁၂၀,၀၀၀ ကျပ်) ကနေ ယာဉ်အနေအထားပေါ်မူတည်ပြီး တရုတ်ယွမ် ၆၀၀ (မြန်မာငွေ ၂၄၀,၀၀၀ ကျပ်) ထိ ပေးဆောင်နေရပြီး ဂိတ်ကြေးမပေးဘဲ ကျော်သွားတဲ့ မော်တော်ယာဉ်တွေကို သေနတ်ဖောက် ခြိမ်းခြောက်ကာ ကျည်ဆန်ဖိုး ထပ်မံတောင်းယူပါတယ်။

တခြားမော်တော်ယာဉ်မောင်းတဦးကလည်း “ချီဖွေကနေ ဆော့လော်လမ်းတလျှောက် ပြည်သူ့စစ်ဂိတ်တွေကို ဂိတ်ကြေးပေးရတာတင်ပဲ ယွမ် ၃,၀၀၀ လောက်ကုန်တယ်။ မပေးဘဲ ကျော်သွားရင် သေနတ်လှမ်းဖောက်တယ်။ တချက်အတွက် ကျည်ဖိုး မြန်မာငွေ ၅,၀၀၀ ထပ်ပေးရတယ်” လို့ ပြောပါတယ်။

အရင်က ချီဖွေ-ဆော့လော် လမ်းတလျှောက်မှာ စစ်ဆေးရေးဂိတ် နှစ်ခုသာရှိခဲ့ပေမဲ့ စစ်အာဏာသိမ်းပြီးနောက်ပိုင်းမှာတော့ လုံခြုံရေးအကြောင်းပြပြီး စစ်ကောင်စီ လက်အောက်ခံ နယ်ခြားစောင့်အဖွဲ့ဖြစ်တဲ့ NDAK လက်အောက်ခံ ဦးလဂွေဘောမ်လန်း ဦးဆောင်တဲ့ ပြည်သူ့စစ်အဖွဲ့ စစ်ဆေးရေးဂိတ် ၁၀ ခုထက်မနည်း ဖွင့်လှစ်ပြီး ငွေကြေး ကေက်ခံနေပါတယ်။

ဧရာ၀တီတိုင်း၊ မအူပင်မြို့မှာ အောက်တိုဘာလ ၂၃ ရက်နေ့ညပိုင်းက EPC ရုံးနဲ့ ကညန ရုံးရှေ့တွေမှာ ဗုံး ၂ လုံး ပေါက်ကွဲခဲ့တယ်လို့ သိရပါတယ်။ 

မအူပင်မြို့မှာ ဒေသခံပြည်သူ့ကာကွယ်ရေးတပ်ဖွဲ့တွေကို ထိန်းချုပ်ဖို့အတွက် စစ်အုပ်စု ပုဒ်မ ၁၄၄ ထုတ်ထားပေမဲ့ EPC ရုံးနဲ့ ခရိုင်ကညန ရုံးရှေ့တွေမှာ ဗုံးခွဲခဲ့တယ်လို့ မြစ်ဝကျွန်းပေါ် ပြောက်ကျားစစ်ဆင်ရေး တပ်ပေါင်းစုက တာဝန်ရှိသူကပြောပါတယ်။ 

“ဒေသခံတွေကို အတင်းအကျပ် အခွန်ကောက်တာတွေ လုပ်နေလို့ သတိပေးတဲ့အနေနဲ့ ဖောက်ခွဲခဲ့တာပါ။ နောက်ဆိုရင်တော့ အပြင်မှာ မဖောက်တော့ဘူး။ ဒါ နောက်ဆုံးသတိပေးတဲ့အနေနဲ့ ခွဲတာ ဖြစ်တယ်”လို့ ပြောပါတယ်။

လုံခြုံရေးတိုးမြှင့်ထားတဲ့ ကြားထဲက ရုံးရှေ့တွေမှာ ဗုံးခွဲတာကို မအူပင်မြို့ပြပြောက်ကျားတပ်ဖွဲ့နဲ့ မြစ်ဝကျွန်း ပေါ်ပြောက်ကျားစစ်ဆင်ရေးတပ်ပေါင်းစု ပူးပေါင်းပြီး ပြုလုပ်ခဲ့တာလို့ ဆိုပါတယ်။ 

မအူပင်မြို့မှာ စစ်တပ်အာဏာသိမ်းပြီးနောက်ပိုင်း အောက်တိုဘာလထဲမှာ ဗုံးပေါက်ကွဲခဲ့တာ ၁၀ ကြိမ်နီးပါး ရှိလာပြီဖြစ်တယ်လို့ သိရပါတယ်။

ဧရာ၀တီတိုင်း၊ ကန်ကြီးထောင့်မြို့နယ်အတွင်း ကျေးရွာအုပ်စုတိုင်း တရွာကို ငွေ ၃ သိန်း စစ်ကောင်စီက ကောက်ခံဖို့ ကျေးရွာအုပ်စု အုပ်ချုပ်ရေးမှူးတွေကို အောက်တိုဘာလဆန်းပိုင်းက  မှာကြားထားတယ်လို့ ကျေးရွာအုပ်ချုပ်ရေးမှူး တဦးက DVB ကိုပြောပါတယ်။   

“ရွာတိုင်းကို ကောက်ခိုင်းတာ၊ ဘာလုပ်ဖို့ဆိုတာ သေချာမပြောဘူး။ ကျေးရွာအုပ်ချုပ်ရေးမှူးတွေအနေနဲ့ တာဝန်ခံပြီး ကောက်ပေးရမယ် မပေးတဲ့အိမ်ကို စာရင်းပြန်တင်ပြရမယ်ပေါ့။ အဲဒါမျိုးကောက်ခံနေတာ” လို့ ပြောပါတယ်။

ကန်ကြီးထောင့်မြို့နယ်ထဲက ကျေးရွာတွေကို ကိုဗစ်ကာလမှာလည်း အောက်စီဂျင်စက်ရုံဆောက်ဖို့အတွက် တရွာကို ၁ သိန်းနှုန်းကောက်ခံခဲ့ဖူးတယ်လို့ ဆိုပါတယ်။ 

ကန်ကြီးထောင့်မြို့နယ် စစ်ဆေးရေးဂိတ်တွေမှာလည်း ပိတ်ဆို့စစ်ဆေးပြီး ငွေကြေး တောင်းခံနေသလို ကုန်တင်ကားတွေကိုလည်း ဆက်ကြေးပုံစံ ငွေကြေးတောင်းခံနေတယ်လို့ ဒေသခံတွေက ပြောပါတယ်။ 

ဒါ့ပြင် ကျေးရွာတွေကို စစ်ကြောင်းနဲ့ဝင်ပြီး ပြည်သူ့ကာကွယ်ရေးတပ်ဖွဲ့တွေကိုဝ င်ရှာတဲ့အခါမှာလည်း အင်အားအများအပြားနဲ့ဝင်ရောက်ပြီး ဒေသခံပြည်သူတွေရဲ့ အိမ်မွေးတိရစ္ဆာန်တွေကို လုယူသွားလေ့ရှိတယ်လို့ သိရပါတယ်။