ကယားပြည်နယ် နေရာတော်တော်များမှာ အခုနှစ် ဇန်ဝါရီလဆန်းပိုင်းကစပြီး ဆက်သွယ်ရေး အင်တာနက်လိုင်းရော၊ ဖုန်းလိုင်းတွေပါ ပြတ်တောက်နေပါတယ်။

ဇန်နဝါရီ ၆ရက်နေ့ကစပြီး ပြည်နယ်မြို့တော်လွိုင်ကော်မှာ တိုက်ပွဲတွေဖြစ်ပွားပြီးနောက်ပိုင်း အင်တာနက်လိုင်းရော၊ ဖုန်းလိုင်းတွေပါ ပြတ်တောက်မှုတွေ ရှိနေတာပါ။

လွိုင်ကော်မြို့ခံတဦးက “မိုင်တဲလ်ပဲရတယ်။ တယ်လီနောနဲ့ အော်ရီဒူးက ဖုန်းလိုင်းမရတော့ဘူး။” လို့ ပြောပါတယ်။

အလားတူ ဒီးမော့ဆိုမြို့နယ်မှာလည်း MPT ကလွဲရင်  ဖုန်းလိုင်းပြတ်တောက်နေပြီး MPT တောင် ဖုန်းပြောနိုင်ဖို့ လိုင်းရတဲ့ တောင်ကုန်းတွေလိုနေရာမှာ လိုက်သုံးနေရတယ်လို့ ဆိုပါတယ်။

“အဓိကကတော့ ဒီ ၂၀၂၂ ရဲ့အစ ကျနော်တို့တိုက်ပွဲ ပြင်းထန်တယ်။ ပြင်းထန်ပြီးတဲ့နောက်မှာ မီးတွေ ပျက်သွားတာပေါ့နော်။ မီးတွေ ပျက်ပြီးနောက်မှ ဖုန်းလိုင်းတွေ စပြီးတော့ မကောင်းတော့ဘူးပေါ့။ တရက်နဲ့ တရက်ပိုပြိးတော့ ဆိုးလာတဲ့ အနေအထားမျိုးပေါ့။ သူက တခါတည်း ပြတ်သွားတဲ့ အနေအထားမျိုး မဟုတ်ဘူး။ အရင်က ဖုန်းလိုင်းရပြီး အင်တာနက်လိုင်းမရဘူး။ တောင်ပေါ်တက်သုံးရတယ်။ အခုကျတော့ ဖုန်းလိုင်းရနေကျ နေရာကျတော့ လုံးဝ ဖုန်းလိုင်းမရတော့ဘူး။ အင်တာနက်လိုင်းလည်းမရတော့ဘူး။ အဲလိုမျိုးဖြစ်နေတယ်။ အဲဒီအခါကျတော့ အကုန်လုံး အစစအရာရာခက်ခဲတာ ပေါ့နော်။ ဘာလို့လဲဆို အရေးပေါ်လူနာပဲဖြစ်ဖြစ်၊ စစ်ရှောင်တွေရဲ့ အရေးပေါ်ကျန်းမာရေးကိစ္စတွေပဲ ဖြစ်ဖြစ် သူတို့ ဖြစ်လာတဲ့အခါကျရင် လူကိုယ်တိုင်သွားရှာရတယ်။ လူကိုယ်တိုင်သွားနေရတယ်။ အဲလိုဖြစ်နေတယ်။ ဖုန်းလိုင်းတွေ ရနေသေးရင် ကျနော်တို့ဖုန်းဆက်လို့ရတယ်။ အခုဟာကျတော့ အရှေ့ခြမ်းနဲ့ အနောက်ခြား ဟိုဘက်ရွာနဲ့ဒီဘက်ရွာကိုတောင် ဆက်သွယ်လို့မရတော့ဘူး။” လို့ လွိုင်ကော်မြို့ခံက ပြောပါတယ်။

အလားတူ ကယားပြည်နယ် ဘောလခရိုင်၊ ဘောလခဲမြို့နယ်၊ ဖားဆောင်းမြို့နယ်နဲ့ မယ်စဲမြို့နယ်မှာလည်း ဖေဖော်ဝါရီ ၁ ရက်နေ့ကစပြီး အင်တာနက်လိုင်းရော၊ ဖုန်းလိုင်းတွေပါ ပြတ်တောက်နေပါတယ်။

အာဏာသိမ်းစစ်ကောင်စီ ဒု-ဥက္ကဋ္ဌ ဒုဗိုလ်ချုပ်မှူးကြီး စိုးဝင်း ကယားပြည်နယ်ကို ရောက်တဲ့နေ့ကစပြီး လိုင်းတွေ ပြတ်တောက်နေခဲ့တာဖြစ်ပြီး ဒီကနေ့အထိ လိုင်းမရဘဲဖြစ်နေတာလို့ ဒေသခံတွေက ပြောပါတယ်။

ကယားပြည်နယ်မှာရှိတဲ့ ကရင်နီ အမျိုးသားများကာကွယ်ရေးတပ်နဲ့ ပြည်သူ့ကာကွယ်‌ကွယ်ရေး တပ်တို့ကလည်း စစ်ကောင်စီထုတ်ကုန်တွေဖြစ်တဲ့ Army Rum၊ Andaman Gold ဘီယာ နဲ့အရက်၊ Black Shield ဘီယာအရက်၊ မြန်မာဘီယာ၊ မန္တလေးဘီရာ၊ ဒဂုံဘီယာ၊ red Ruby ဆေးလိပ်၊ Premium Gold ဆေးလိပ်၊ ရွှေဖီဦး လက်ဖက်ရည်ထုပ် အစရှိ ဒီထုတ်ကုန်တွေကို ထပ်မံတင်သွင်း ရောင်းဝယ်ခြင်းတွေ မလုပ်ဖို့ ထုတ်ပြန်ထားပါတယ်။

ဒီလိုထုတ်ပြန်ပြီးနောက်  သယ်ယူပိုတောင်မှုတွေ လုပ်တာတွေရှိရင်လည်း ဖမ်းဆီးပြီး ဖျက်ဆီးတာတွေလုပ်ဆောင်နေတယ်လို့ ကရင်နီအမျိုးသားကာကွယ်ရေးတပ် (KNDF) တာဝန်ရှိသူတဦးက ပြောပါတယ်။

မွန်ပြည်နယ် ရေးမြို့နယ် မြောက်ပိုင်း လိမ္မော်ခြံကျေးရွာနှင့် ဘုရားကုန်းကျေးရွာအကြား စစ်ကောင်စီရဲ့ မြေအောက် ဆက်သွယ်ရေး ကြိုးလိုင်းအား အောက်တိုဘာ  ၂၃ ရက်ညက မိုင်းခွဲတိုက်ခိုက်ခဲ့တယ်လို့ ရေး PDF က ဒီနေ့  ထုတ်ပြန်လိုက်ပါတယ်။

ဒါ့အပြင် အောက်တိုဘာ ၂၄ ရက်နေ့ မနက် ၁၀ နာရီလောက်မှာလည်း ဆက်သွယ်ရေးလိုင်းအား လာရောက် ပြုပြင်တဲ့ စစ်ကောင်စီတပ်ဖွဲ့ အင်အား ၁၀ လောက်ကိုလည်း ရေးနဲ့ သံဖြူဇရပ် PDF တို့ ပူးပေါင်းပြီး အနီးကပ် မိုင်းဆွဲတိုက်ခိုက်ခဲ့တယ်လို့ ဆိုပါတယ်။

မိုင်းဆွဲတိုက်ခိုက်မှုကြောင့် စစ်ကောင်စီဘက်က  ထိခိုက်သေဆုံးမှု ရှိနိုင်ပြီး အတိအကျကိုတော့ အတည်မပြုနိုင်သေးဘဲ ပူးပေါင်းအဖွဲ့ကတော့ ဘေးကင်းစွာ ပြန်လည်ဆုတ်ခွာခဲ့တယ်လို့  ရေး PDF မြောက်ပိုင်းအဖွဲ့က ပြောပါတယ်။

ရေး PDF က အောက်တိုဘာအတွင်း ရေးမြို့နယ် မြောက်ပိုင်းရှိ စစ်ကောင်စီရဲ့ ဆက်သွယ်ရေးလိုင်းအား မိုင်းခွဲဖြတ်တောက်နိုင်ခဲ့တာ အခုအကြမ်အပါအဝင် ၄ ကြိမ် ရှိပြီလို့ ဆိုပါတယ္။

ရေး PDF က စစ်ကောင်စီရဲ့ သတင်းပေးတွေနဲ့ စစ်ကောင်စီခန့်အုပ်ချုပ်ရေးမှူးတွေကို သုတ်သင်ရှင်းလင်းနေသလို ရဲစခန်းနဲ့  Mytel တာဝါတိုင်တို့ကိုလည်း ဖောက်ခွဲတိုက်ခိုက်တာတွေ ပြုလုပ်ခဲ့ကြတယ်လို့ သိရပါတယ်။