မူဆယ်မြို့ ဆန္ဒပြပွဲမှာ တက်ကြွစွာပါဝင်တဲ့ အမျိုးသမီး လူငယ် ၁ ဦး ဧပြီလ ၁၇ ရက်နေ့က မတရား ဖမ်းဆီးခံရတယ်လို့ မျက်မြင်တစ်ဦးက ပြောပါတယ်။
အရပ်ဝတ် ဝတ်ဆင်ထားတဲ့ လူတစ်စုက ကား ၅ စီးနဲ့ မူဆယ် မေဦး လက်ဖက်ရည်ဆိုင်မှာ မတရားလာရောက် ဖမ်းခေါ်သွားတာလို့ ဆိုပါတယ်။
ဖမ်းဆီးခံရသူရဲ့ မိခင်က စကားပြောခွင့်ရဖို့ အကြိမ်ကြိမ် တောင်းဆိုခဲ့ပေမယ့် "ခင်များ ဒီလောက် ရစ်ရင် ခင်များကိုပါ ဆွဲစိလို့ရတယ်။ CCTV တပ်ထားတယ်။ CCTV ရှေ့မှာ ခင်များဘာလုပ်ချင်တာလဲ။ ခင်များကို တခါတည်း ဖမ်းချုပ်လိုက်မယ်” လို့ ရဲစခန်း ဂိတ်ပေါက်မှာ တာဝန်ကျ ရဲ ၁ ဦး ခြိမ်းခြောက် ငေါက်ငန်း ပြောဆိုခဲ့တယ်လို့ မျက်မြင်က ပြောပါတယ်။
ရဲစခန်းကတော့ ဖမ်းဆီးခံရသူကို သပိတ်ခေါင်းဆောင်လို့ စွပ်စွဲပြောဆိုထားကာ ပုဒ်မ ၅၀၅ (က) နဲ့ ဖမ်းဝရမ်းထုတ်ထားတယ်လို့ သိရပါတယ်။
မူဆယ်မြို့မှာ အာဏာသိမ်းတာကို ဆန့်ကျင်ဆန္ဒပြတဲ့ ပြည်သူ ၃၀ ကျော် ဖမ်းဆီးခံရပြီး ၁၀ ယောက်ကျော် ပြန်လွှတ်ပေးကာ တချို့ကို ပုဒ်မ ၂၅၊ ၅၀၅၊ ၅၀၅ (က) စတာတွေနဲ့ တရားစွဲဆိုထားတယ်လို့ ဒေသခံ တစ်ဦးက ပြောပါတယ်။
စစ်အာဏာရှင် ဆန့်ကျင်ရေးဆန္ဒပြမှုနဲ့ ဖမ်းဆီးအကျဉ်းချခံထားရတဲ့ လူငယ် ရာနဲ့ချီကို အင်းစိန်အကျဉ်းထောင်ကနေ ဒီနေ့မနက် ၁၀ နာရီလောက်မှာ ပြန်လွှတ်ပေးလိုက်တယ်လို့ ရှေ့နေတဦးက ပြောပါတယ်။
“မတ်လ ၃ ရက်နေ့က ဖမ်းထားသူတွေ အားလုံး ပြန်လွှတ်ပေးတာ။ YBS ယာဉ် ၁၀ စီးကျော်လောက်နဲ့။ နောက်ထပ် ကျန်နေသေးတဲ့သူတွေလည်း ရှိသေးတယ်၊ ဘယ်အချိန် ထပ်လွှတ်မလဲတော့ မသိဘူး။ ပြန်လွှတ်တဲ့စာရင်း အတိအကျက သက်ဆိုင်ရာ နယ်မြေရဲစခန်းတွေဆီ သွားမေးမှရမယ်၊ ကျနော်တို့လည်း အတိအကျ မသိရဘူး။ အနည်းဆုံး ရာနဲ့ချီတော့ရှိတယ်။”
လက်ရှိ အင်းစိန်ထောင်ရှေ့မှာ ဖမ်းဆီးခံထားရသူတွေရဲ့ မိသားစုဝင် လာရောက် စောင့်ဆိုင်းနေကြဆဲ ဖြစ်ပါတယ်။
ဖမ်းဆီးခံရသူတွေအတွက် လိုက်ပါကူညီပေးနေတဲ့ ရှေ့နေဖြစ်သူကတော့ ကြားသိရတာက ဒီနေ့ ထပ်မံလွှတ်ပေးဖို့ အယောက် ၄၀ လောက်ရှိသေးတယ်လို့ ဆိုပါတယ်။
ပြန်လွှတ်ပေးလိုက်တဲ့သူတွေကို အင်းစိန်ထောင်ကနေ သက်ဆိုင်ရာ နယ်မြေရဲစခန်းတွေကို YBS ယာဉ်တွေနဲ့ ပို့ပေးတာကြောင့် ဖမ်းဆီးခံရသူတွေရဲ့ မိသားစုဝင်တွေအနေနဲ့ ထောင်ရှေ့မှာ မစောင့်ဘဲ သက်ဆိုင်ရာ နယ်မြေရဲစခန်းတွေမှာ သွားရောက်ရောက်မေးမြန်း စုံစမ်းသင့်တယ်လို့ အကြံပြုပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ မှတ်တမ်းအရ ဖေဖော်ဝါရီ ၁ ရက်မှ မတ်လ ၂၃ ရက်အထိ စုစုပေါင်း ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသူ ၂၈၁၂ ဦးထိရှိတယ်လို့ သိရပါတယ်။
ဒီအထဲက ထောင်ဒဏ်ချမှတ်ခြင်းခံထားရသူ ၂၄ ဦး၊ အမှုဖွင့်ခံထားရပြီး ဖမ်းဝရမ်းထုတ်ခြင်းခံထားရလို့ တိမ်းရှောင်နေသူ ၁၀၉ ဦးနဲ့ ပြန်လည်လွတ်မြောက်လာသူ ၃၉၄ ဦးရှိခဲ့တာကြောင့် လက်ရှိ အချိန်အထိ ၂၄၁၈ ဦးမှာ ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထား ရတယ်လို့ အေအေပီပီထုတ်ပြန်ချက်မှာ ဖော်ပြပါတယ်။
