မြန်မာပေါင်ချိန်ဖိနပ်စက်ရုံက လုပ်ခလစာတိုးပေးဖို့ တောင်းဆိုတဲ့ အလုပ်သမားတချို့ကို အလုပ်ကထုတ်လိုက်တဲ့အပေါ် ကန့်ကွက်ကြောင်း အဲဒီစက်ရုံကချုပ်လုပ်နေတဲ့ Adidas ဘရန်း ကုမ္ပဏီက ထုတ်ပြန်လိုက်ပါတယ်။
မြန်မာပေါင်ချိန်စက်ရုံက လုပ်ခလစာတိုးမြှင့်ပေးဖို့ တောင်းဆိုဆန္ဒပြတဲ့ အလုပ်သမားတွေထဲက အလုပ်သမား ၃၀ နီးပါးကို အလုပ်ကထုတ်ပယ်ခဲ့တာပါ။
အဲဒီလိုထုတ်ပယ်ခံရတဲ့ အလုပ်သမားတွေဟာ ရပိုင်ခွင့်အတွက် လွတ်လပ်စွာ တောင်းဆိုတာဖြစ်ပြီး အလုပ်ထုတ်ခံရတဲ့အထဲမှာ စက်ရုံသမဂ္ဂအဖွဲ့ဝင်အများစု ပါဝင်ခဲ့တာဟာ လက်ခံနိုင်စရာမဟုတ်ဘူးလို့ Adidas ရဲ့ ထုတ်ပြန်ချက်မှာ ဖော်ပြထားပါတယ်။
သူတို့အနေနဲ့ အဲဒီလို အလုပ်သမားတွေကို ဖိနှိပ် အလုပ်ထုတ်ပယ်တာဟာ ဥပဒေကြောင်းနဲ့ ညီမညီ စစ်ဆေးနေပြီး အလုပ်ထုတ်ခံထားရသူတွေကို အမြန်ဆုံး ပြန်ခန့်ထားဖို့လည်း မြန်မာပေါင်ချိန်စက်ရုံကို တောင်းဆိုထားပါတယ်။
အဲဒီစက်ရုံက အလုပ်သမားတွေဟာ တရက်လုပ်ခ ၄,၈၀၀ ကျပ်အစား ၈,၀၀၀ ကျပ်ပေးဖို့ အောက်တိုဘာလကုန်ပိုင်းက စက်ရုံထဲ ဆန္ဒပြတောင်းဆိုခဲ့တာပါ။
ဆန္ဒပြမှုမှာ အလုပ်သမားရာချီ ပါဝင်ခဲ့ပြီး အဲဒီစက်ရုံက အလုပ်သမားသမဂ္ဂဝင် ၁၇ ယောက် အပါအဝင် ၃၀ လောက်ကို အလုပ်ကထုတ်ပယ်ခဲ့တာ ဖြစ်ပါတယ်။
အလုပ်ထုတ်ခံရတဲ့အထဲ ပါဝင်သူတယောက်က “အခုက ဘရန်းကလည်း ဖိအားပေးထားတော့ စက်ရုံက ဘာဆက်လုပ်မယ် မသိသေးဘူး။ ဆန္ဒပြပွဲမှာပါတဲ့ အလုပ်သမားတွေကိုတော့ သတိပေး အရေးယူတာ ပယ်ဖျက်ပေးနေတယ်။ အလုပ်ထုတ်ခံရသူတွေကိုတော့ ဘာဆက်လုပ်မယ် မသိဘူး။ အဲဒါ စောင့်ကြည့်နေတုန်း” လို့ ပြောပါတယ်။
မြန်မာပေါင်ချိန်စက်ရုံဟာ Adidas ဖိနပ်ကို အဓိကချုပ်လုပ်နေတာဖြစ်ပြီး အဲဒီ ဘရန်းချုပ်တဲ့ စက်ရုံတွေမှာ အလုပ်သမားအခွင့်အရေး ချိုးဖောက်ခံရမှု ရှိနေတယ်ဆိုပြီး နိုင်ငံတကာရှိ အလုပ်သမားအဖွဲ့တွေက ကမ်ပိန်းလုပ် ရှုတ်ချနေကြပါတယ်။
မြန်မာနိုင်ငံက သူတို့ထုတ်ကုန်ချုပ်လုပ်နေတဲ့ စက်ရုံက ဖြစ်ပျက်တဲ့ အခြေအနေအပေါ် Adidas က ဖြေရှင်းချက်ထုတ်ပေမဲ့ ထိရောက်မှုရှိမရှိ စောင့်ကြည့်ရဦးမယ်လို့ မြန်မာပေါင်ချိန်စက်ရုံ လုပ်သားတချို့က ဆိုပါတယ်။
မြန်မာပေါင်ချိန်စက်ရုံက အလုပ်ထုတ်ခံထားရတဲ့ သမဂ္ဂဝင်တွေကတော့ အလုပ်ပြန်ရဖို့အပြင် မူလတောင်းဆိုချက်ဖြစ်တဲ့ လုပ်ခလစာ တိုးမြှင့်ပေးရေးအတွက် Adidas က ကူညီပေးနိုင်မယ်လို့ မျှော်လင့်ကြောင်း ပြောပါတယ်။
ထိုင်းတောင်ပိုင်း ဆုန်ခလာခရိုင် ဟတ်ယိုင်မြို့ရှိ INNOVATIVE GLOVES CO, LTD လက်အိတ် စက်ရုံမှာ အလုပ်သမားအခွင့်အရေးရရှိရေးရရှိရေးအတွက် မနေ့မနက်က ရာနဲ့ချီတဲ့ အလုပ်သမားတွေ ဆန္ဒပြခဲ့ပြီး တာဝန်ရှိသူတွေက သွားရောက်ညှိနှိုင်းပေးရာမှာ တောင်းဆိုချက် ၁၃ ချက်ထဲက ၁၂ ချက် သဘောတူညီမှုရှိခဲ့ပါတယ်။
အလုပ်သမားတွေ အခွင့်အရေးချိုးဖောက်ခံနေရတဲ့ ပြဿနာကို ရွှေ့ပြောင်းအလုပ်သမား အခွင့်အရေးကွန်ရက်အဖွဲ့ MWRN (ဟတ်ယိုင်တာဝန်ခံ)၊ မြို့နယ်အလုပ်သမား ကာကွယ်စောင့်ရှောက်ရေးဌာန၊ ထိုင်းအလုပ်သမားသမဂ္ဂအဖွဲ့ (SERC)၊ ပြည်ထဲရေးဌာန (ဟတ်ယိုင်ရုံး) တာဝန်ရှိသူတွေ ရောက်လာပြီး ကုမ္ပဏီတာဝန်ခံ၊ အလုပ်သမားကိုယ်စားလှယ်တွေနဲ့ မျက်နှာချင်း ဆိုင်ဆွေးနွေးညှိနှိုင်းရာမှာ ၁၂ ချက်သဘောတူချက်ရခဲ့ပြီး ကျေနပ်အားရမှုရှိတယ်လို့ စက်ရုံ အလုပ်သမားတစ်ဦးဖြစ်သူ ကိုမျိုးဆွေဝင်းက ဒီဗွီဘီကို ပြောပါတယ်။
“လာပြီးညှိနှိုင်းပေးတဲ့ အလုပ်သမားကူညီရေးအဖွဲ့တွေနဲ့ တာဝန်ရှိသူတွေအားလုံးကို ကျေးဇူးတင်ပါတယ်။ ကျနော်တို့တောင်းဆိုတဲ့ ၁၃ ချက်ထဲက ၁၂ ချက်၊ မလိုက်လျောနိုင်တဲ့ တစ်ချက်က အလုပ်သမားတွေကိုအော်ငေါက်လွှတ်တဲ့ မန်နေဂျာကိုအလုပ်ဖြုတ်ပေးဖို့ပေါ့။ သူတို့ က အဲဒီမန်နေဂျာဟာ စက်ရုံအစုရှယ်ယာဝင်ထားလို့ ဖြုတ်လို့မရဘူးလို့ ပြောတယ်။ ကျနော်တို့ လည်း ကျန်တာတွေ သဘောတူချက်ရတဲ့အပေါ် ဝမ်းသာပါတယ်။ ကျေနပ်အားရပါတယ်။ ဒါပေမယ့် ဘယ်နေ့ဘယ်ရက်ကစ အကောင်အထည်ဖော်မလဲဆိုတာတော့ မသိရသေးဘူး။ စောင့်ကြည့်ရဦးမယ်။”
သဘောတူညီချက်ရတဲ့ အချက်တွေမှာ အလုပ်သမားကျန်းမာရေးအတွက် ၂၄ နာရီအရေး ပေါ်ကားနဲ့ စကားပြန်ထားပေးဖို့၊ စက်ရုံမှာ ကျန်းမာရေးဝန်ထမ်း (နာ့စ်) ၂၄ နာရီထားရှိဖို့၊ အလုပ်နားရက်အလုပ်ဆင်းက လုပ်အားခ ၂ ဆရဖို့၊ အချိန်ပိုလုပ်ခ တစ်နာရီဘတ် ၆၀ ပေးဖို့၊ စက်ရုံက သိမ်းထားတဲ့ အလုပ်သမားကတ်နဲ့ ဘဏ်စာအုပ်တွေပြန်ပေးဖို့၊ စက်ရုံအပြင်ဘက်မှာ ဈေးထွက်ဝယ်ခွင့်ပြုဖို့ စတာတွေ ပါဝင်ပါတယ်။
ဒါ့အပြင် ကိုဗစ်ပိုးတွေ့လူနာနဲ့ ပိုးမတွေ့သူ အတူမထားဖို့၊ စက်ရုံကပေးထားတဲ့အခန်းခ ဘတ် ၁၀၀၀ ကို မဖြတ်ဖို့၊ ထွက်စာကို အမှန်အတိုင်းထုတ်ပေးဖို့၊ စက်ရုံထဲမှာ အလုပ်သမား ကိုယ်စားလှယ်ထားပေးဖို့၊ ဆေးခွင့်ယူက လုပ်အားခမဖြတ်ဖို့၊ အလုပ်သမားနေတဲ့အခန်းမှာ ကြပ်တည်းတဲ့အတွက် တစ်ခန်း ၂ ယောက်သာထားဖို့ စတဲ့အချက်တွေ သဘောတူခဲ့ပါတယ်။
အဆိုပါ လက်အိတ်စက်ရုံမှာ အလုပ်သမားစုစုပေါင်း ၆၀၀ မှ ၇၀၀ ထိရှိပြီး အများစု ၉၀ ရာခိုင်နှုန်းမှာ မြန်မာအလုပ်သမားတွေဖြစ်ကြပါတယ်။
