ရခိုင်ပြည်နယ်၊ ကျောက်တော်မြို့နယ်၊ ကာဒီ (ခ) သဇင်ကျေးရွာက ဆန်စက်ပိုင်ရှင်တဦးကို စစ်ကောင်စီက ကြီးလေးတဲ့ ပုဒ်မတခုဖြစ်တဲ့ စစ်ပုန်ကန်မှု ရာဇသတ်ကြီးပုဒ်မ-၁၃၁ နဲ့ ထပ်တိုးတရားစွဲဆိုလိုက်တယ်လို့ မိသားစုဝင်တွေက ပြောပါတယ်။

အခုထပ်တိုးတရားစွဲခံလိုက်ရသူမှာ ကာဒီကျေးရွာက ဆန်စက်ပိုင်ရှင် ဦးလှမောင်သန်း (၄၃ နှစ်) ဖြစ်ပြီး သူ့ကို ကျောက်တော်မြို့နယ် ကန်စောက်အခြေစိုက် ခမရ ၅၃၉ တပ်ရင်းမှူးက အောက်တိုဘာ ၂ ရက်က ဆွေးနွေးစရာရှိတယ်ဆိုကာ ခေါ်ပြီး သူနဲ့အတူ အဖော်လိုက်ပါသွားတဲ့ အပေါက်ဝကျေးရွာသား ဦးမောင်ချေ (၃၅ နှစ်) ကိုပါ ဖမ်းဆီးလိုက်တာပါ။

သူတို့နှစ်ဦးကို စစ်ကောင်စီက ဖမ်းဆီးခဲ့ပြီးနောက် တလကျော်ကြာ စစ်ကြောရေးမှာ စစ်ဆေးခံခဲ့ရပြီး ရက္ခိုင့်တပ်တော် (အေအေ) နဲ့ ဆက်နွှယ်တယ်လို့ စွပ်စွဲပြီး စစ်တွေမြို့နယ် တရားရုံးမှာ ဒီဇင်ဘာ ၆ ရက်က မတရားအသင်းဆက်သွယ်မှု ဥပဒေပုဒ်မ ၁၇(၁) နဲ့ တရားစွဲဆိုခဲ့ပါတယ်။

ဦးလှမောင်သန်းနဲ့ ဦးမောင်ချေတို့ကို ဒီဇင်ဘာ ၁၉ ရက်က စစ်တွေမြို့နယ် တရားရုံးမှာ ရုံးထုတ်ခဲ့ပြီး ဦးလှသန်းမောင်ကို မတရားအသင်းဆက်သွယ်မှုအပြင် ရာဇသတ်ကြီးပုဒ်မ-၁၃၁ နဲ့ပါ ထပ်မံတရားစွဲဆိုထားတယ်လို့ ဇနီးဖြစ်သူ ဒေါ်လှယဥ်ဆန်းက ပြောပါတယ်။

“သူတို့နှစ်ယောက်ကို မနေ့က စစ်တွေမြို့နယ် တရားရုံးမှာ ပုဒ်မ ၁၇(၁) အတွက် ရုံးထုတ် စစ်ဆေးခဲ့ကြတယ်။ အဲဒီမှာ ကျမယောက်ျားကို ရာဇသတ်ကြီးပုဒ်မ ၁၃၁ နဲ့ စစ်တပ်က ထပ်မံတရားစွဲထားတယ်လို့ တရားသူကြီးက ပြောတယ်။ ကျမလည်း ဥပဒေအကြောင်းတွေ နားမလည်တော့ အဲဒီပုဒ်မအကြောင်းကို ရဲတွေကိုမေးကြည့်တော့ ရဲတွေက ပြစ်မှုကြီးတယ်လို့တော့ ပြောကြတယ်။ ကျမယောက်ျားက စစ်ကြောရေးမှာ ညှဉ်းပန်းနှိက်စက်ခံခဲ့ရတဲ့ ဒဏ်ရာတွေလည်း နောက်ကျောတွေ ခါးတွေနဲ့ ဦးခေါင်းတွေမှာ ဒဏ်ရာတွေ ပြင်းပြင်းထန်ထန် ရထားတယ်လို့ ပြောတယ်။ ကျမတို့ကတော့ ဆေးရုံတက်ပြီးတော့ ဆေးကုသခွင့်တွေ ပေးစေချင်တယ်။ အခုတော့ အပြင်က ဆေးတွေဝယ်ပြီး ပေးနေရတယ်” လို့ ပြောပါတယ်။

ဦးလှမောင်သန်းနဲ့ ဦးမောင်ချေတို့နှစ်ဦးကို အောက်တိုဘာ ၂ ရက်မှာ ဖမ်းဆီးခဲ့ပြီး နိုဝင်ဘာ ၂၀ ရက်အထိ တလကျော်ကြာ စစ်ကြောရေးမှာ စစ်ဆေးခဲ့ပြီး နိုဝင်ဘာ ၂၀ ရက်မှာ စစ်တွေမြို့မရဲစခန်းကို လွှဲပြောင်းပေးခဲ့ပါတယ်။

ဦးလှမောင်သန်းကို တရားစွဲဆိုထားတဲ့ စစ်ပုန်ကန်မှု ရာဇသတ်ကြီးပုဒ်မ-၁၃၁ ဟာ ကြည်းတပ်၊ ရေတပ်၊ လေတပ်နဲ့ သက်ဆိုင်တဲ့ ကြီးမားတဲ့ ပုဒ်မတခုဖြစ်ပြီး စစ်ပုန်ကန်မှု ကျူးလွန်တာကို အားပေးတာ၊ နိုင်ငံတော်သစ္စာဖောက်ဖျက်စေဖို့၊ တာဝန်ဝတ္တတရား မဆောင်ရွက် စေဖို့ အားထုတ်ရင်   အမြင့်ဆုံးပြစ်ဒဏ် တသက်တကျွန်းအထိရှိတယ်လို့ တရားလွှတ်တော်ရှေ့နေ တဦးက ပြောပါတယ်။

“အခုတရားစွဲထားတဲ့ ရာဇသတ်ကြီးပုဒ်မ-၁၃၁ ဆိုတာက စစ်ပုန်ကန်မှုကို အားပေးကူညီခြင်း (သို့မဟုတ်) စစ်သားတာဝန်ဝတ္တရားမှ သွေဆောင်ရန် အားထုတ်ခြင်းဆိုပြီး ရေးထားတယ်။ ပြစ်မှုမြောက်တယ်ဆိုရင်တော့ ပြစ်ဒဏ်တွေကတော့ အနည်းဆုံး ၁၀ နှစ်ကနေ အများဆုံး နှစ် ၂၀ တသက်တကျွန်းအထိရှိတယ်။”

ရခိုင်ပြည်နယ်မှာ စစ်ကောင်စီနဲ့ ရက္ခိုင့်တပ်တော် (အေအေ) တို့ တကျော့ပြန် တိုက်ပွဲဖြစ်ပွားခဲ့ပြီးနောက် စစ်ကောင်စီက နိုင်ငံရေးတက်ကြွလှုပ်ရှားသူတွေ၊ လူမှုရေးတက်ကြွလှုပ်ရှားသူတွေနဲ့ ဝန်ထမ်းတွေ အပါအဝင် အရပ်သား ၂၀၀ ကျော်ကို ဖမ်းဆီးခဲ့ပြီး ၈၀ ကျော်သာ ပြန်လွှတ်ပေးသေးကာ ဖမ်းဆီးထားသူ ၁၀၀ ကျော်ကို ပုဒ်မအမျိုးမျိုးတပ်ကာ တရားစွဲဆိုထားပါတယ်။

ရခိုင်ပြည်နယ်မှာ စစ်ကောင်စီနဲ့ အေအေတို့အကြား အပစ်အခတ် ရပ်စဲထားကြပေမဲ့ စစ်ကောင်စီက အေအေနဲ့ဆက်နွှယ်မှုနဲ့ စွပ်စွဲဖမ်းဆီးထားတဲ့ အရပ်သားတွေကို ပြန်လွှတ်ပေးတာ မရှိသေးပါဘူး။

စစ်ကိုင်းတိုင်း၊ ခင်ဦးမြို့နယ်၊ သာဂရကျေးရွာသား အာကာမင်းဆန်စက်ပိုင်ရှင် ဦးအောင်စိန်ကို ဇွန် ၅ ရက် ည ၁၁ နာရီလောက်က ရွှေဘိုမြို့ ဂေါက်ကွင်းလမ်းမှာ  စစ်ကောင်စီတပ်က ဝင်ဖမ်းရာမှာ မတွေ့တာကြောင့် သူ့ရဲ့ညီဖြစ်သူနဲ့  တူနှစ်ယောက်ကို ဓားစာခံအဖြစ် ဖမ်းဆီးသွားတယ်လို့ မိသားစုဝင်တွေနဲ့ နီးစပ်သူတွေဆီက သိရပါတယ်။

အခုအဖမ်းခံရတဲ့သူတွေကတော့  မြတ်တော်ဝင်ဆန်စက်ပိုင်ရှင် ဦးစို၊  ကိုစိုးသက်ဦးနဲ့ ကိုထွန်းသက်ဦးတို့ဖြစ်ပြီး နယ်မြေမလုံခြုံတာကြောင့် ရွှေဘိုမြို့မှာ သွားရောက်အိမ်ငှားနေရင်း ဖမ်းဆီးခံရတာလို့  သိရပါတယ်။

သာဂရရွာသားတစ်ယောက်က "ခေတ်ပျက်နေတာဆိုတော့ဗျာ၊ မတည့်ရင်မတည့်သလို PDFကိုကြတော့ ဒလန်လို့ဆိုပြီး တိုင်လို တိုင်နဲ့။ အခုလည်း ဘာမှမလုပ်ဘဲ ကျနော်တို့ သာဂရက ပျူစောထီး ဝင်လိုက်၊ စစ်တပ်ကဝင် လိုက်ဖြစ်နေတာကြောင့် တတ်နိုင်သူတွေက ရွှေဘိုမြို့ပေါ်တက်ပြီး အိမ်ငှားနဲ့ နေ နေကြတာပါ။ သူတို့ အမှားလုပ်ထားတဲ့ သူဆိုရင်  ရွှေဘိုဆိုတဲ့ မြို့ကြီးပေါ် သွားအိမ်ငှား နေမလဲ”လို့  ပြောပါတယ်။

သာဂရကျေးရွာဟာ အိမ်ခြေ ၁၈၀ လောက်ရှိပြီး ဇွန် ၃ ရက်က စစ်ကောင်စီတပ်က ဝင်ရောက်မီးရှို့လို့  အိမ်ခြေ ၈၀ နီးပါး မီးလောင်‌ဆုံးရှုံးခဲ့သလို လယ်ယာသုံးစက်ပစ္စည်းတွေနဲ့ မရောင်းရသေးဘဲ ရှိနေသေးတဲ့ စပါးဂိုဒေါင်တွေပါ မီးလောင်ဆုံးရှုံးခဲ့ရတယ်လို့ သာဂရရွာသားတွေဆီက သိရပါတယ်။