ရန်ကုန်မြို့မှာ ဆန်ဈေးနှုန်းတွေ မြင့်တက်နေပြီး ရွှေဘိုပေါ်ဆန်းတအိတ်ကို ကျပ် ၁၂၀,၀၀၀ အထိ မြင့်တက်နေတယ်လို့ ဆန်ရောင်းချသူတွေထံက သိရပါတယ်။

သင်္ကြန်မတိုင်ခင်ကတည်းက ဆန်ဈေးတွေ တောက်လျှောက်တက်နေတာဖြစ်ပြီး စပါးအထွက်နည်းတာနဲ့ စပါးအထွက်မရှိတော့တာကြောင့် ဆန်ဈေးနှုန်းတွေ မြင့်တက်နေတာ ဖြစ်တယ်လို့ သိရပါတယ်။

မြောက်ဒဂုံမြို့နယ်မှ ဆန်ရောင်းချသူတဦးက “၁၂၀,၀၀၀ လောက်ရှိတယ်။ ထိပ်စအရောဆိုရင်တော့ ၁၃၀,၀၀၀ လောက်အထိ ရှိမယ်။ ကျန်တဲ့ ဆန်အမျိုးအစားတွေလည်း တက်တယ်” လို့ ပြောပါတယ်။

ကျန်တဲ့ဆန်အမျိုးအစားတွေဖြစ်တဲ့ ဇီယာတအိတ်ကို ကျပ် ၆၀,၀၀၀၊ ဆင်းသွယ်တအိတ်ကို ကျပ် ၆၈,၀၀၀ မှ ၇၀,၀၀၀ ၊ပေါ်ဆန်းရိုးရိုးတအိတ်ကို ကျပ် ၈၀,၀၀၀၊ မြောင်းမြ၊ ပုသိမ် ပေါ်ဆန်း ထူးထူးရှယ်တအိတ်ကို ကျပ် ၉၀,၀၀၀ ကျော်၊ ဆန်ကြမ်းတအိတ်ကို ကျပ် ၅၀,၀၀၀ လောက်အထိ ဈေးနှုန်းတွေ မြင့်တက်နေပါတယ်။

အဆိုပါ ဆန်ဈေးနှုန်းတွေဟာ ဈေးဆက်တက်နိုင်ပြီး စပါးဈေးနှုန်းတွေက တင်း ၁၀၀ ကို ကျပ် ၁၅ သိန်းအထိ ရှိနေတဲ့အတွက် သယ်ယူစရိတ်၊ ထုတ်လုပ်မှုစရိတ်တွေနဲ့ပေါင်းရင် လက်ရှိဆန်ဈေးနှုန်းတွေ ကျမှာမဟုတ်သေးဘူးလို့ ဆန်ရောင်းသူတွေက ပြောပါတယ်။

မြန်မာနိုင်ငံဆန်စပါးအသင်းချုပ်ကတော့ ဆန်ဈေးကစားတာတွေ မလုပ်ဖို့နဲ့ သိရင် အရေးယူမယ်လို့ ကြေညာခဲ့ပေမဲ့ ဆန်ဈေးတက်တာတွေကို ထိန်းချုပ်နိုင်ခြင်း မရှိသေးပါဘူး။

သင်္ကြန်အပြီး ဈေးတောက်လျှောက် ထိုးတက်လာတဲ့ ဆန်ဈေးတွေဟာ အခုတစ်ပတ်မှာလည်း ဆန်ချောရော၊ ဆန်ကြမ်းဈေးတွေပါ တစ်အိတ်ကို ကျပ် ၂၀၀၀ ကနေ ၅၀၀၀ ကြား စျေးထပ်မံ မြင့်တက်လာပြန်ပါတယ်။

ရန်ကုန်၊ ဝါးတန်းဆန်ဈေးကွက်မှာ မြောင်းမြပေါ်ဆန်းက တစ်အိတ်ကို ၉၀၀၀၀ ကျပ် ဖျာပုံပေါ်ဆန်းက ၈၅၀၀၀ ကနေ ၈၆၀၀၀ ကျပ်၊ ကြားပျံရှယ် တစ်အိတ်ကို ကျပ် ၈၅၀၀၀ ကနေ ၉၂၀၀၀ ကျပ်၊ ရက် ၉၀က ကျပ် ၆၄၀၀၀ ကနေ ၇၀၀၀၀ ကျပ်၊ ခွံနီဆန်က ကျပ် ၇၀၀၀၀ ကနေ ၇၆၀၀၀ ကျပ်ရှိပြီးအမျိုးအစားအားလုံးနီးပါး ဈေးဆက်တက်လာတာ ဖြစ်ပါတယ်။

ပြီးခဲ့တဲ့သီတင်းပတ် ဈေးကွက် ပေါက်စျေးနဲ့ယှဉ်ရင် အမျိုးအစားအလိုက် တစ်အိတ်ကို ကျပ်၂၀၀၀ ကနေ ၅၀၀၀ အကြား မြင့်တက်လာတာ တွေ့ရပါတယ်။

အခုလို ပြည်တွင်းဆန်ဈေးတွေ တောက်လျှောက်ထိုးတက်နေတဲ့အပေါ် ကုန်သည်နဲ့ လှောင်လက်တွေရဲ့ စျေးကစားမှုကြောင့်လို့ ဝေဖန်သံတွေ ကျယ်ကျယ်လောင်လောင် ထွက်ပေါ်နေပါတယ်။

ရန်ကုန်အခြေစိုက် ဆန်လက်ကား ရောင်းချသူတစ်ဦးက “ဆန်လှောင်ထားတဲ့ ကုန်သည်၊ ပွဲစားတွေက ဈေးဆွဲတင်နေတာ။ ပစ္စည်‌ေရှားနေတယ်၊ ပြတ်လပ်နေပြီ ဆိုပြီး လူတွေ စိုးရိမ်လာအောင် လုပ်တာပေါ့။ လောဘသားတွေ ‎ဈေးကစားတော့ နောက်ဆုံးတော့ စားသုံးသူပဲ ထိခိုက်တာ၊ ဘယ်လိုပြောရောင်းရမှန်းကို မသိတော့ဘူး” လို့ ပြောပါတယ်။

မြန်မာနိုင်ငံ ဆန်စပါးအသင်းချုပ်ကတော့ အွန်လိုင်းမှာ မမှန်တဲ့ဈေးနှုန်းတွေ၊ မမှန်တဲ့ သတင်းအချက်အလက်တွေ ဖန်တီးပြီး ဆန်ဈေးမြင့်တက်အောင် ရည်ရွယ်ချက်ရှိရှိ လုပ်နေသူတွေကို စိစစ်ဖော်ထုတ်ပြီး ထိန်းကျောင်းသွားမယ်လို့ ပြီးခဲ့တဲ့ရက်ပိုင်းက ထုတ်ပြန်ထားပါတယ်။