စစ်ကိုင်းတိုင်းအခြေစိုက် ဆရာစံ-PDF အဖွဲ့က မီတာ ၃၀၀ အကွာအဝေး ပစ်နိုင်တဲ့ လက်လုပ် စနိုက်ပါသေနတ်ကို ကုန်ကျငွေ သိန်း ၃၀ နဲ့ ထုတ်လုပ်ထားနိုင်ပြီလို့ သိရပါတယ်။

ဆရာစံ-PDF တာဝန်ရှိသူက “စျေးနှုန်းတွေ တအားတက်နေတော့ ၃၀ လောက်ကုန်တယ်။ ပစ္စည်းရှာရတာလည်း မလွယ်ဘူး။ ပြောင်းတင် ၉ သိန်းလောက်ကျတယ်။ ဒါတောင် ဝယ်မရဘူး။ ပိုက်ဆံရှိပြန်တော့လည်း ပစ္စည်းကမရှိ၊ ပစ္စည်းရှိပြန်တော့လည်း ပိုက်ဆံကမရှိနဲ့။ ကျည်ဘောက်က ၁၀ တောင့်ဆန့်တယ်။ ၈ စကုတ်တပ်ပစ်လို့ရတယ်” လို့ ဒီဗွီဘီကို ပြောပါတယ်။

လက်ရှိအချိန်အထိ စနိုက်ပါသေနတ် ၅ လက် ထုတ်လုပ်ထားပြီး ဘေးမြို့နယ်​က မဟာမိတ် အဖွဲ့တွေကိုလည်း မျှဝေပေးထားပြီး အရင်ကထုတ်လုပ်ထားတဲ့ စနိုက်ပါသေနတ်တွေနဲ့ တိုက်ပွဲဝင်နေတယ်လို့ ဆိုပါတယ်။

အဆိုပါ စနိုက်ပါသေနတ်ဟာ မီတာ ၂၅၀ အထိ ထိရောက်ပြီး မီတာ ၃၀၀ ကျော် အကွာအဝေးထိ ပစ်လို့ရတယ်လို့ သိရပါတယ်။

ဆက်လက်ပြီး လက်နက်အမျိုးမျိုး ထပ်မံ ကြိုးစားထုတ်လုပ်သွားမှာဖြစ်သလို ထုတ်လုပ်ထားတဲ့ လက်နက်တွေနဲ့လည်း ဖက်ဒရယ်ဒီမိုကရေစီရတဲ့အထိ တိုက်ပွဲဝင်သွားမယ်လို့ ဆရာစံ-PDF က ပြောပါတယ်။

ဒါ့အပြင် မီတာ ၁,၂၀၀ အထိ ရောက်အောင်ပစ်နိုင်တဲ့ ၆၀ မမတွေကို နည်းပညာမြင့် ဆရာတွေထံက သင်ယူထားပြီး အောင်မြင်စွာ ထုတ်လုပ်ထားနိုင်ပြီလို့ ဆရာစံ-PDF က ထုတ်ပြန်ထားပါတယ်။

စစ်ကိုင်းတိုင်း အခြေစိုက် ပြည်သူ့ကာကွယ်ရေးတပ်ဖွဲ့ ဆရာစံ -PDF မှ india shotgun ၊ ၅.၅၆ ကျည် ၇ တောင့်ထိုး သေနတ်များကို အောင်မြင်စွာထုတ်လုပ်နိုင်နေပြီလို့ ဇူလိုင် ၁၁ ရက်နေ့မှာ ဆရာစံ - PDF က ထုတ်ပြန်ပါတယ်။ 

ပြင်ပဈေးကွက်ထဲ india shotgun တလက်ကို ၁၈ သိန်းပေးဝယ်နေရချိန်မှာ  ဆရာစံ - PDF က india shotgun နဲ့ ပုံစံအတူ လက်လုပ် shotgun များကို တလက် ၅ သိန်းသာကုန်ကျစရိတ်ရှိပြီး ၅.၅၆ ကျည် ၇ တောင့်ထိုး သေနတ် တ​လက်ကို ၁၂ သိန်းဝန်းကျင် ကုန်ကျစရိတ်ရှိတယ်လို့ သိရပါတယ်။

ဆရာစံ PDF လက်နက်ထုတ်လုပ်ရေးတာဝန်ရှိသူက “လက်နက် ၆ မျိုးကိုတော့ ကိုယ်တိုင်ထုတ်လုပ်ထားနိုင်ပါပြီ။ ကျနော်တို့ ကိုယ်တိုင်ထုတ်လုပ်ထားတဲ့လက်နက်တွေကို တိုက်ပွဲတွေမှာ အသုံးပြုနေပါတယ်။ ကိုယ်တိုင်ထုတ်လုပ်တော့ ကုန်ကျစရိတ်ပိုသက်သာတဲ့ အလက်ရေ များများ ထုတ်လုပ်နိုင်ဖို့ ကြိုးစားနေတယ်” လို့ ပြောပါတယ်။ 

ဆရာစံ-PDF တပ်ဖွဲ့အနေနဲ့  india shotgun ၊ ၅.၅၆ ကျည် ၁ တောင့်ထိုး၊ ၅.၅၆ ကျည် ၇ တောင့်ထိုး၊ ၇.၆၂ ကျည် ၁ တောင့်ထိုး၊ မိုင်တဲလ် မမ ၊ တာဝေးပစ် ရော့ကတ် စတဲ့ လက်နက်များကို ကိုယ်တိုင်ထုတ်လုပ်တိုက်ပွဲဝင်နေပြီး လက်နက်စမ်းသတ်ထုတ်လုပ်တဲ့နေရာမှာ အသေးစိတ် ဂရုစိုက်တာကြောင့် ထိခိုက်အန္တရာယ် ကြုံတွေ့ခဲ့တာ မရှိဘူးလို့ ဆိုပါတယ်။