စစ်ကိုင်းတိုင်း၊ ဆားတောင်မြို့နယ်ထဲမှာ ဖေဖော်ဝါရီ ၅ ရက် မနေ့ကဖြစ်ပွားခဲ့တဲ့ တိုက်ပွဲမှာ အကြမ်းဖက်စစ်ကောင်စီတပ်တွေဘက်က ၁၂ ယောက် သေဆုံးခဲ့ပြီး တော်လှန်ရေးတပ်ဖွဲ့တွေဘက်က ဆေးတပ်သူ ရဲဘော် ၁ ယောက် ကျဆုံးခဲ့တယ်လို့ မြေအောက်လျှပ်စီးပြောက်ကျားတပ်ဖွဲ့က ထုတ်ပြန်ပါတယ်။
ဖေဖော်ဝါရီ ၅ ရက် ညနေ ၅ နာရီလောက်မှာ စစ်ကောင်စီအင်အား ၄၀ ကျော်နဲ့ မြေပြင်တော်လှန်ရေးပူးပေါင်းတပ်ဖွဲ့တွေ ထိပ်တိုက်တွေ့ဆုံ တိုက်ပွဲဖြစ်ပွားခဲ့ပြီး စစ်ကောင်စီဘက်က ၉ ယောက် ထိခိုက်ဒဏ်ရာရရှိခဲ့တယ်လို့ ထုတ်ပြန်ချက်မှာ ဖော်ပြပါတယ်။
အဆိုပါတိုက်ပွဲမှာ မြေအောက်လျှပ်စီးပြောက်ကျားတပ်ဖွဲ့က အသက် ၂၀ အရွယ် ဆေးတပ်သူ ရဲဘော် မဆုမွန်ထက်ဟာ မြင့်မြတ်စွာ အသက်ပေးလှူသွားခဲ့တာလို့ ဆိုပါတယ်။
ဒီဖြစ်စဥ်နဲ့ပတ်သက်ပြီး စစ်ကောင်စီဘက်က အလောင်း ၆ လောင်းကို စစ်ကောင်စီအင်အား ၅၀ လောက်နဲ့ ဒီကနေ့မှာ ဒုတိယအကြိမ် ပြန်လည်လာကောက်ယူချိန် အုန်းတောလမ်းပိုင်းမှာ မြေအောက်လျှပ်စီးပြောက်ကျားတပ်ဖွဲ့၊ အုန်းတော Dragon GZ၊ နွေဦးရောင်နီ ပြောက်ကျားတပ်ဖွဲ့ စုစုပေါင်း မဟာမိတ် ၃ ဖွဲ့နဲ့ ညနေ ၃ နာရီလောက်မှာ ပူးပေါင်းတိုက်ခိုက်ခဲ့ရာ တိုက်ပွဲကြာချိန် မိနစ် ၂၀ လောက်အတွင်းမှာ စစ်ကောင်စီဘက်က ၇ ယောက် ထပ်မံကျဆုံးပြီး ၄ ယောက်ထက်မနည်း ထိခိုက်ဒဏ်ရာရရှိခဲ့တယ်လို့ ဆိုပါတယ်။
နွေဦးရောင်နီ ပြောက်ကျားအဖွဲ့က ရဲဘော် ၁ ယောက်ကတော့ မစိုးရိမ်ရတဲ့ဒဏ်ရာ ရရှိခဲ့ပြီး အဆိုပါမစ်ရှင်ကို မဆုမွန်ထက်အတွက် သွေးကြွေးပြန်ယူဖို့ တိုက်ခိုက်ခဲ့တာဖြစ်ကာ တော်လှန်ရေးမဟာမိတ် ၃ ဖွဲ့ဘက်က ရဲဘော်တွေအားလုံး ဘေးကင်းလွတ်မြောက်စွာ ပြန်လည်ဆုတ်ခွာနိုင်ခဲ့တယ်လို့ ထုတ်ပြန်ချက်မှာ ဖော်ပြပါတယ်။
မြန်မာနိုင်ငံမှာတော့ အကြမ်းဖက်စစ်အုပ်စုက မတရားအာဏာသိမ်းယူထားခဲ့တဲ့ ကာလဟာ ၂ နှစ်ကျော် ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး၊ ပညာရေး စတဲ့ ကဏ္ဍတွေအသီးသီးမှာ အဘက်ဘက်က ကျဆင်းလာနေခဲ့ပြီး လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာ ဖြစ်ပါတယ်။
စစ်ကိုင်းမြို့နယ်၊ ဆားတောင်မြို့၊ ညောင်ငုတ်တိုရွာအနီးမှာ နိုဝင်ဘာ ၁၀ ရက် နေ့လယ်ပိုင်းက ပျူစောထီးတွေအတွက် မိုင်းထောင်ရာမှာ အသုံးပြုဖို့ ယမ်းသယ်ဆောင်လာတဲ့ စစ်ကောင်စီခန့်အုပ်ချုပ်ရေးမှူး ဆရာတပည့်ကို စစ်တပ်က PDF ဆိုပြီး မှားယွင်းပစ်ခတ်ဖမ်းဆီးခဲ့တယ်လို့ ဒေသခံတွေဆီကသိရပါတယ်။
“ညောင်ငုတ်တိုရွာ အုပ်ချုပ်ရေးမှူး နဲ့ သူ့တပည့်တစ်ယောက်ဗျ၊ ရွာကပျူတွေအတွက် မိုင်းလုပ်ဖို့ ယမ်းသယ်လာတာဖြစ်မယ်။ ဆားတောင်မြို့အထွက် ညောင်ငုတ်တိုမရောက်ခင် စစ်တပ်က တားစစ်တော့ အုပ်ချုပ်ရေးမှူးပဲဆိုပြီး ရပ်မပေးဘဲ စီးသွားတာ သေနတ်နဲ့ပစ်ခံရတာ။” လို့ ဒေသခံတစ်ဦးက ပြောပါတယ်။
ပစ်ခတ်ခံရသူတွေဟာ ညောင်ငုတ်တိုအုပ်ချုပ်ရေးမှူး ကိုနိုင်ဌေး (ဦးခေါင်းကျည်မှန်) အသက် ၄၀ ခန့်နဲ့ သူတပည့် ကိုအောင်ကို (ဗိုက်ကျည်မှန်) အသက် ၂၀ ခန့်တို့ဖြစ်ပြီး အပြင်းအထန် ဒဏ်ရာတွေနဲ့ မန္တလေးဆေးရုံကြီးမှာ အတွင်းလူနာအဖြစ် ဆေးကုသမှုခံယူနေတယ်လို့ ဆိုပါတယ်။
အဆိုပါ စစ်ကောင်စီက ပစ်ခတ်ခံရသူနှစ်ဦးမှာ ညောင်ငုတ်တိုအနီးက PDF စခန်းငယ်တခုရဲ့ တည်နေရာကို စစ်တပ်သတင်းပေး တိုင်ကြားခဲ့သူတွေဖြစ်တယ်လို့လည်း သိရပါတယ်။
ဆားတောင်မြို့၊ ညောင်ငုတ်တိုရွာ၊ အရိပ်မထွက်ဘုရားအနီးက PDF စခန်းငယ်တခုကို အောက်တိုဘာ ၁၇ ရက်နေ့မှာ စစ်ကောင်စီတပ်က ဝင်ရောက်စီးနင်း ပစ်ခတ်ခဲ့လို့ လူငယ်နှစ်ဦးကျဆုံးခဲ့ရပြီး တစ်ဦး အဖမ်းခံခဲ့ရပါတယ်။
Photo-ဒါနကြယ်စင်ပရဟိတလူငယ်အဖွဲ့။
