စစ်ကိုင်းတိုင်း၊ ဆားလင်းကြီးမြို့နယ်ထဲမှာ ချင်းတွင်းမြစ်ကြောင်းအတိုင်း ဆန်တက်လာတဲ့ စစ်ကောင်စီတပ်တွေကို ပြည်သူ့ကာကွယ်ရေးမဟာမိတ်တပ်တွေက ဝိုင်းဝန်းတိုက်ခိုက်ခဲ့လို့ အထိနာခဲ့ပြီး စစ်တပ်တွေဟာ ပြည်သူတွေရဲ့ ကျေးရွာ ၄ ရွာကို မီးရှို့ဖျက်ဆီးခဲ့ပါတယ်။ 

နိုဝင်ဘာ ၂၄ ရက်ကစလို့ ချင်းတွင်းမြစ်ကြောင်းအတိုင်း စစ်ကောင်စီတပ်သားတွေ ပါလာတဲ့ ရေယာဉ်တွေ ဆန်တက်လာတယ်ဆိုတဲ့ သတင်းကြောင့် မဟာမိတ်တပ်တွေဟာ စောင့်ဆိုင်းနေခဲ့ကြပြီး အဲဒီရေယာဉ်တွေဟာ ၂၇ ရက်နေ့မှာ ဆားလင်းကြီးမြို့နယ်ထဲကို ရောက်လာပါတယ်။ 

နိုဝင်ဘာ ၂၈ မနက်ပိုင်းမှာတော့ ဆန်တက်လာတဲ့ ရေယာဉ်တွေကို မဟာမိတ် ၂၃ ဖွဲ့က မိုင်းခွဲတိုက်ခိုက်ခဲ့လို့ ၆ စင်းထဲမှာ ၃ စင်းက သောင်တင်သွားပေမယ့် ကျန် ၃ စင်းကတော့ မုံရွာဘက်ကို ဆက်လက်ဆန်တက်သွားခဲ့တယ်လို့ One Star Task Force (ယင်းမာပင်ခရိုင်တပ်ရင်း (၁၆)၊တပ်ခွဲ(၂) ရဲ့ တာဝန်ခံက ဗိုလ်ကျော်ကြီးက ပြောပါတယ်။ 

တိုက်ခိုက်ခံရလို့ သေဆုံးသွားတဲ့ စစ်သား ၂ လောင်းနဲ့ ဒဏ်ရာရသူ ၉ ယောက်ကို မုံရွာကမ်းဘေးမှာထားခဲ့ပြီး သောင်တင်နေတဲ့ ရေယာဉ်တွေဆီကို ပြန်လာတဲ့ အချိန်မှာလည်း မဟာမိတ်တပ်တွေက ၂ ကြိမ်ထပ်ပြီး မိုင်းခွဲ ပစ်ခတ်တိုက်ခိုက်ခဲ့လို့ စစ်သား ၁၀ ယောက်လောက် အနည်းဆုံး သေဆုံးနိုင်တယ်လို့ ဆိုပါတယ်။ 

နိုဝင်ဘာ ၂၉ ရက်နေ့မှာတော့ မဟာမိတ်တပ်တွေ ထပ်ရောက်လာတာကြောင့် အဖွဲ့ ၃၀ ကျော်သွားပြီး ကျောက်ချထားတဲ့ စစ်တပ်ရေယာဉ် ၅ စင်းကို မနက်ပိုင်းမှာ RPG တွေ၊ လက်နက်ငယ်တွေနဲ့ သွားရောက်တိုက်ခိုက်လို့ စစ်သားအသေအပျောက် ရှိနိုင်ပေမယ့် အရေအတွက်ကိုတော့ မသိရသေးပါဘူး။ 

မဟာမိတ်တပ်တွေဟာ လက်နက်အင်အားမမျှတာနဲ့ ကျည်မလုံလောက်တာကြောင့် ပြန်ဆုတ်ခွာလာခဲ့ပြီး တပ်သားရဲဘော် နှစ်ယောက်ကတော့ မိုင်းမတော်တဆဖြစ်လို့ ဒဏ်ရာနည်းနည်းရခဲ့တယ်လို့ ဆိုပါတယ်။ 

ဗိုလ်ကျော်ကြီးကတော့ ဒီရက်ပိုင်းမှာ စစ်ကောင်စီတပ်တွေနဲ့ မဟာမိတ်တပ်တွေ ထိတွေ့ တိုက်ခိုက်တာ ၆ ကြိမ်ဖြစ်ခဲ့ပြီး စစ်သား ၂၀ လောက်သေဆုံးနိုင်တယ်လို့ ခန့်မှန်းပေမဲ့ စစ်ကောင်စီက တိုက်ပွဲသတင်းထုတ်ပြန်တာမရှိသလို သေဆုံးဒဏ်ရာရသူ အရေအတွက်ကို သီးခြား အတည်ပြုနိုင်တာလည်း မရှိသေးပါဘူး။ 

အထိနာသွားတဲ့ စစ်ကောင်စီတပ်တွေဟာ ဆားလင်းကြီးမြို့နယ်ထဲက ဆားထုံး၊ ထန်းဇင်၊ တောကျောင်းနဲ့ လက်ပံကျွန်းရွာတို့ကို မီးရှို့ဖျက်ဆီးခဲ့ပါတယ်။ 

တောကျောင်းမှာ ၃၂ အိမ်၊ ထန်းဇင်မှာ ၂၄ အိမ်၊ ဆားထုံးမှာ အိမ် ၂၀၀ ကျော်နဲ့ လက်ပံကျွန်းမှာ ၃၄ အိမ် မီးလောင်သွားတယ်လို့  ဒေသခံတယောက်က ပြောပါတယ်။ 

ဆားလင်းကြီးမြို့နယ်ထဲမှာ စစ်ကောင်စီတပ်တွေ စစ်ကြောင်းထိုးနေလို့ ရွာပေါင်း ၁၅ ရွာလောက်က ဒေသခံ ၁၀၀၀၀ ကျော် ထွက်ပြေး တိမ်းရှောင်နေရပါတယ်။

စစ်ကိုင်းတိုင်း၊ ဆားလင်းကြီးမြို့နယ်၊ ကျားတက်ရွာက စစ်ကောင်စီစစ်ဆေးရေးဂိတ်မှာ ဩဂုတ် ၂၄ ရက် နေ့လယ် ၁၂ နာရီခွဲလောက်က မိုင်းတစ်လုံးပေါက်ကွဲပြီး စစ်ကောင်စီတပ်ဖွဲ့ဝင်တချို့ ထိခိုက်သေဆုံး ဒဏ်ရာရခဲ့တယ်လို့ ဒေသခံတွေက ပြောပါတယ်။

အခုပေါက်ကွဲခဲ့တဲ့ စစ်ကောင်စီ စစ်ဆေးရေးဂိတ်ဟာ ပုလဲ-ကျားတက်-မုံရွာသွား ကားလမ်းမပေါ်မှာ ဖွင့်လှစ်ထားပြီး ပြည်သူတွေကို အဓမ္မဆက်ကြေးကောက်နေတဲ့ ဂိတ်ဖြစ်တယ်လို့လည်း ဒေသခံတွေဆီက သိရပါတယ်။

ပေါက်ကွဲမှုဖြစ်ပွားတာကို မျက်မြင်တွေ့တဲ့ ကျားတက်ရွာ ဒေသခံတစ်ဦးက “ဖြိုးကျော်လက်ဖက်ရည်ဆိုင်အနီးမှာ ပေါက်ကွဲတာဗျ။ အဲနေရာက ကျားတက်စာသင်ကျောင်းထဲမှာ တပ်စွဲထားတဲ့ စစ်သားတွေက နေ့တိုင်းထွက်ပြီး အဲဒီဇရပ်ကနေ ပုလဲကလာတဲ့ ကားတွေ၊ မုံရွာဘက်ကလာတဲ့ ကားတွေကို စစ်ဆေးပြီး ဆက်ကြေးတောင်းနေတဲ့ကြတာ ကြာပြီဗျ။ ဒီနေ့တော့ ငါးယောက်ထိုင်ပြီး စခတွေ စကားပြောနေတဲ့အချိန် အခုလို ပေါက်ကွဲပြီး။ နှစ်ယောက်ကတော့ နေရာတင် သေတယ်။ သုံးယောက်ကတော့ ဒဏ်ရာအတော်လေး ဆိုးဝါးတယ်။ အဲဒီဒဏ်ရာရတဲ့သူတွေကို သူတို့ တပ်စွဲထားတဲ့ ကျားတက်စာသင်ကျောင်းထဲ‌ သယ်သွားတာမြင်လိုက်ရတယ်” လို့ ပြောပါတယ်။

အခုမိုင်းကွဲမှုဟာ အဖွဲ့အစည်းတစ်ခုက မိုင်းထောင်ဖောက်ခွဲခဲ့တာမျိုးမဟုတ်ဘဲ စစ်အာဏာရှင် တော်လှန်သူတယောက်က တကိုယ်တော်လှုပ်ရှားခဲ့တာဖြစ်တယ်လို့ ဒေသခံ ပြည်သူကာကွယ်ရေးဒေါင်းနက်အဖွဲ့ခေါင်းဆောင် ဆရာပေက ပြောပါတယ်။

“ကျနော့်အသိထဲက တကိုယ်တော် စစ်အာဏာရှင်ကို တော်လှန်နေတဲ့သူက ဖောက်ခွဲခဲ့တာဗျ။ အခုလို တဦးချင်း တယောက်ချင်းတိုင်းက  စစ်အာဏာရှင်ကို တော်လှန်သွားမယ်ဆိုရင် ဒီတော်လှန်ရေးက အမြန်ဆုံးပြီးဆုံးသွားမယ်။”

စစ်ကောင်စီရဲ့ အကြမ်းဖက်တပ်ဖွဲ့တွေဟာ တစ်နှစ်ကျော်ကြာ စစ်ကိုင်းတိုင်းက ပြည်သူ့ကာကွယ်ရေးတပ်တွေကို ထိန်းချုပ်ဖို့ ကြိုးစားနေပေမဲ့ လက်ရှိအချိန်အထိ ထိန်းချုပ်နိုင်ခြင်းမရှိသေးပါဘူး။