စစ်ကိုင်းတိုင်း၊ ဆားလင်းကြီးမြို့နယ်ထဲမှာ စစ်ကောင်စီတပ် အင်အား ၁၅၀ ကျော်ပါ စစ်ကြောင်းနဲ့ National Revonary Guards - NRG (Salingyi) တပ်ဖွဲ့ အပါအဝင် ပြည်သူ့ကာကွယ်ရေး ပူးပေါင်းတပ်တွေ တိုက်ပွဲ ဖြစ်ပွားခဲ့တယ်လို့ တာဝန်ရှိသူတွေဆီက သိရပါတယ်။

မေ ၈ ရက် မနက်အစောပိုင်းက စတင်ကာ မြိုင်မြို့ပေါ်က အင်အား ၁၅၀ ကျော်ပါ စစ်ကြောင်းက ဆားလင်းကြီးနယ်ထဲကို စစ်ကြောင်းစတင်ထိုးလာခဲ့တာဖြစ်ပြီး ညနေ ၃ နာရီခွဲလောက် ဆားလင်းကြီးနယ် အိုမထန်းတော ဇက်(​လှေဆိပ်)အရောက်မှာ မျိုးဆက်သစ်လူငယ်တပ်ဖွဲ့က မိုင်းဆွဲတိုက်ခိုက်ခဲ့တယ်လို့ National Revonary Guards-NRG (Salingyi) တပ်ဖွဲ့ ပြောရေးဆိုခွင့်ရှိသူ ဗိုလ်သူရိန်က ဒီဗွီဘီကို ပြောပါတယ်။

“ပထမ ကျနော်တို့မဟာမိတ်တွေဘက်ကနေ မိုင်းအရင်ဆွဲတာ၊ ၃ ယောက် လေပေါ်ကို မြောက်တက်ပြီးတော့ကို သေတာဗျ။ အဲ့ဒါကြောင့် ဒေါသထွက်သွားတာလားမသိဘူး၊ ပြည်သူပိုင် စျေးဆိုင်တန်းတွေကို မီးရှို့တယ်။ အဲ့စျေးဆိုင်တွေမှာ အရင်က လူရှိတယ်။ ဒီကောင်တွေ စစ်ကြောင်းကို ကြောက်လို့ ရတာဆွဲပြေးရတော့တာပဲဗျာ။ ပြီးတော့ ဇက်ဆိပ်ကနေ မုံရွာဘက်ကမ်းကို ကူးဖို့ ဇက်တွေပေါ် ဒီကောင်တွေ တက်တဲ့အချိန် ကျနော်တို့ အရဲစွန့်ပြီး ဝင်တိုက်တာ ပွဲစတော့တာပါပဲ။ ဒီကောင်တွေ သေတာနဲ့ ဒဏ်ရာရတာကတော့ သေချာတဲ့ ဖရဲသီးသတင်းပါခင်ဗျ။ ကျနော်တို့ ပွဲတွေဆက်နေလို့ ကျည်ဖိုးတွေလည်း လိုအပ်နေပါတယ်ဗျ။”

အဆိုပါ ဇက်(လှေ)ပေါ်တက်နေဆဲ  စစ်ကောင်စီတပ်သားတွေကို ပြည်သူ့ကာကွယ်ရေးတပ်တွေက ၄၀ မမ၊ လက်နက်ငယ်တွေနဲ့ မီတာ ၁၀၀ ခန့်ကနေ ပစ်ခတ်ခဲ့ရာမှ မိနစ် ၄၀ လောက်အထိ အပြန်အလှန် ထိတွေ့တိုက်ပွဲဖြစ်ပွားခဲ့ပြီး စစ်ကောင်စီတပ်ဘက်က တပ်ဖွဲ့ဝင် ၁၀ ဦး သေဆုံးကာ ၅ ဦး ဒဏ်ရာထပ်မံရရှိခဲ့တယ်လို့ ဆိုပါတယ်။

စစ်ကောင်စီတပ်ဘက်က သေဆုံး၊ ဒဏ်ရာရတာတွေနဲ့ ပတ်သက်ပြီးတော့ သတင်းထုတ်ပြန်ထားတာမျိုးတော့ မတွေ့ရသေးပါဘူး။

ဆားလင်းကြီးမြို့ခံ ဘုန်းကြီးတပါးက “မနေ့ နေ့လယ်ကတည်းက မိုင်းကွဲသံတွေ၊ စက်သေနတ်နဲ့ ပစ်ခတ်တာတွေ ကြားနေရတာ။ အဲ့နေရာတွေက စစ်တပ်စစ်ကြောင်းထိုးခဲ့တဲ့ နေရာတွေချည်းပါပဲ။ မနှစ်ကလည်း ဒီလိုအချိန်ပဲ ဦးဇင်းတို့နယ်ထဲက ဖိုလ်ဝင်တောင်အရှေ့ဘက်က လူငယ်လေးနှစ်ဦးကို ဖမ်းသွားပြီး တောင်အနောက်ဘက်ခြမ်းက မင်စုရွာဘက်မှ သတ်ပြီးထားပစ်ခဲ့တယ်” လို့ ဒီဗွီဘီကို ပြောပါတယ်။

အဆိုပါတိုက်ပွဲတွေကို National Revolutionary Guards-NRG (Salingyi)၊ Chindwin Dynamite၊ မျိုးဆက်သစ်လူငယ်တပ်ဖွဲ့တို့က ပူးပေါင်းတိုက်ခိုက်ခဲ့တာဖြစ်ပြီး တိုက်ပွဲအတွင်း ပြည်သူ့ကာကွယ်ရေးတပ်သားတဦး ကျည်ထိမှန် (မစိုးရိမ်ရ) ဒဏ်ရာရရှိခဲ့ပြီး စစ်ကောင်စီ အကြမ်းဖက်စစ်ကြောင်းထိုး ဝင်ရောက်မှုကြောင့် ဒေသခံပြည်သူ သောင်းဂဏန်းလောက် စစ်ဘေးလွတ်ရာကို ထွက်ပြေးတိမ်းရှောင်နေရပါတယ်။

ဆားလင်းကြီးမြို့နယ်ထဲက ထန်တောရွာကို စစ်ကောင်စီတပ်က မေ ၈ ရက် ညနေ ၃ နာရီကျော်မှာ မီးရှို့တာကြောင့် လူနေအိမ် ၁၅ လုံးကျော်နဲ့ ဆိုင်ကယ်အစီး ၂၀၀ ကျော် မီးလောင်ဆုံးရှုံးသွားတယ်လို့ ထန်တောရွာ ဒေသခံတွေဆီကနေ သိရပါတယ်။

အဆိုပါစစ်သားတွေဟာ အင်အား ၂၀၀ ကျော်နဲ့ စလင်းမြို့ကနေ ဆားခါးရွာ၊ ရေခါးရွာ၊ ဖောင်းကတာရွာကိုဖြတ်ပြီး ဝမ်ပေါင်ကုမ္ပဏီဝင်းအ‌တွင်း‌ ဝင်ရောက်ညအိပ်ကာ မေ ၈ ရက် မနက်မှာ ထန်တောရွာကို ဝင်ရောက်ယာယီတပ်စွဲကာ ချက်ပြုတ်စားသောက်ပြီး အခုလို မီးရှို့သွားတာလို့ ဒေသခံတွေက ပြောပါတယ်။

ထန်တောရွာသားတဦးက “အစပိုင်းကတော့ ရွာထဲမှာ ချက်ပြုတ်စားသောက်ပြီး မုံးရွာဘက်ပြန်ဖို့ရာ ဇက်ဆိပ်ကမ်းကို သွားတဲ့အချိန် မိုင်းပေါက်ကွဲအသံနှစ်ခု ကြားလိုက်တယ်။ ဘယ်ဘက်က ဖောက်ခွဲတယ် ဆိုတာတော့ အတိအကျမသိဘူး။ ကွဲတာက ညောင်ပင်ကြီးသစ်ကွင်းနဲ့ ချင်းတွင်းမြစ်ကမ်းဘေး ဇက်ဆိပ်အနီးအနားက ပေါက်ကွဲတာ။ အဲ့ပေါက်ကွဲသံကြားရပြီး သစ်ကွင်းဘေးအနီးက အိမ်တွေကို မီးရှို့တော့တာပဲ။ နောက်ပြီး ကျနော်တို့ဘက်က အလုပ်သမားတွေက မုံရွာဘက် အလုပ်သွားလုပ်တဲ့အခါ ဆိုင်ကယ်တွေကို မုံရွာဘက်ခြမ်းမယူဘဲ ဇက်ဆိပ်အနီးအနားမှာ အပ်ပြီး ထားခဲ့တဲ့ ဆိုင်ကယ်တွေကိုလည်း မီးရှို့သွားတယ်။ အစီးအရေအတွက်က အတော်များမယ်။ ခန့်မှန်းခြေဆိုရင် ၂၀၀ အထက်မှာရှိမယ်” လို့ ပြောပါတယ်။

စစ်ကောင်စီတပ်မီးရှို့တဲ့ ထန်တောရွာဟာ မုံရွာမြို့ရဲ့တဖက်ကမ်း ချင်းတွင်းမြစ်အနောက်ဘက်မှာ တည်ရှိတဲ့ ကျေးရွာဖြစ်သလို ညောင်ပင်ကြီး၊ ရွာရှည်၊ ထန်တော သုံးရွာစပ်တန်းရွာရှိတဲ့ ကျေးရွာတွေလည်းဖြစ်တယ်လို့ သိရပါတယ်။

မကွေးတိုင်း၊ ဆိပ်ဖြူမြို့နယ်မှာ မေ ၇ ရက် မနက်က စစ်ကောင်စီရဲ့ ကာကွယ်ရေးပစ္စည်းစက်ရုံ ကပစ ၂၂ ကို ဒေသကာကွယ်ရေး ပူးပေါင်းတပ်ဖွဲ့တွေက Short Range Missile ၁၂ လုံးနဲ့ ပစ်ခတ်တိုက်ခိုက်ခဲ့တယ်လို့ ဆိပ်ဖြူ သိန်းငှက်နက် တော်လှန်ရေးတပ်ဦး တာဝန်ခံ ဗိုလ်မိုရှေက ပြောပါတယ်။

လက်လုပ်လက်နက်ကြီး ၄ လုံးကတော့ ပစ်မှတ်ကိုမရောက်ဘဲ လေပေါ်မှာပဲ ပေါက်ကွဲပြီး ၈ လုံးကတော့ ပစ်မှတ်ကို တည့်တည့်ကျရောက်ပေါက်ကွဲကာ ၆ လုံးတန်း လက်နက်ဂိုဒေါင်တခု ပျက်စီးခဲ့တယ်လို့ ဆိုပါတယ်။

ဗိုလ်မိုရှေက “အတွင်းသတင်းရတာကတော့ သူတို့ဘက်က လူထိခိုက်မှုမရှိဘူး။ ပထမတလုံးကျတာနဲ့ အကုန်လုံး ထွက်ပြေးကြတယ်ပြောတယ်။ ကင်းသမားတွေကော အပြင်ရောက်နေတဲ့ ပတ်ကင်းပတ်နေတဲ့သူတွေကော ဘယ်ကပစ်လို့ ပစ်မှန်းမသိဘဲ ထွက်ပြေးကြတယ်” လို့ ပြောပါတယ်။

အဲဒီတိုက်ခိုက်မှုဖြစ်ပြီးနောက်ပိုင်း စက်ရုံအနီးတဝိုက်မှာ အင်အားအလုံးအရင်းနဲ့ ပတ်ကင်းပတ်ပြီး လက်နက်ငယ်တွေ၊ စက်လတ်တွေနဲ့ ပစ်ခတ်ကြတယ်လို့ ဆိုပါတယ်။

အဲဒီ ကပစ ၂၂ စက်ရုံဟာ ပုသိမ်-မုံရွာကားလမ်းနဲ့ ပေါက်-ဆိပ်ဖြူ လမ်းကြားထဲမှာတည်ရှိပြီး လက်နက်ငယ်တွေ အဓိကထုတ်လုပ်နေတာလို့ သိရပါတယ်။

အဲဒီတိုက်ခိုက်မှုကို စစ်ဒေသကွပ်ကဲ ၁၊ မကွေးတိုင်း ဒရုန်းအထူးတပ်ရင်း တပ်ခွဲ ၅၊ သိန်းငှက်နက် ဆိပ်ဖြူတော်လှန်ရေးတပ်ဦးနဲ့ ပခုက္ကူခရိုင် တပ်ရင်း ၁၁ ပြည်သူ့စွမ်းအား တပ်ပေါင်းစုတို့ ပူးပေါင်းတိုက်ခိုက်ခဲ့ကြတာလို့ သိရပါတယ်။

စစ်ကိုင်းတိုင်း၊ ဆားလင်းကြီးမြို့နယ်မှာတော့ မိုင်းနဲ့တိုက်ခိုက်ခံရတဲ့ စစ်ကောင်စီတပ်ဖွဲ့ဝင်တွေက အနီးအနားက အိမ်တွေကို မီးရှို့ဖျက်ဆီးခဲ့တာကြောင့် အိမ် ၁၀ လုံးကျော် ပျက်စီးသွားတယ်လို့ ဒေသခံတွေက ပြောပါတယ်။

မေ ၇ ရက်က မကွေးတိုင်း၊ ရေစကြိုမြို့နယ်ကနေ အင်အား ၂၀၀ လောက်ပါတဲ့ စစ်ကြောင်းဟာ ဆားလင်းကြီးမြို့ပေါ်ကိုရောက်ပြီး တညအိပ်ခဲ့ပါတယ်။ နောက်နေ့ မနက်ပိုင်းမှာတော့ စစ်ကြောင်း ၂ ကြောင်းခွဲပြီး တကြောင်းက ကြေးနီစီမံကိန်း ဝမ်ပေါင် ကုမ္ပဏီထဲကို ဝင်သွားတယ်လို့ ချင်းတွင်းမြစ်ကမ်းဘေး ကျေးရွာများ သပိတ်ကော်မတီဝင် တယောက်က ပြောပါတယ်။

ဝမ်ပေါင်ကနေတဆင့် ညောင်ပင်ကြီးရဲစခန်းကို ဝင်နားပြီး ညနေ ၃ နာရီကျော်အချိန် မုံရွာဘက်ကိုကူးဖို့ ဇက်ဆိပ်ကိုလာချိန်မှာ မိုင်းဆွဲတိုက်ခိုက်ခံရလို့ စစ်သား ၂ ယောက် ဒဏ်ရာရခဲ့တယ်လို့ ဆိုပါတယ်။

စစ်သားတွေရဲ့ ပစ်ခတ်မှုကြောင့် ပြည်သူ့ကာကွယ်ရေးတပ်ဖွဲ့ဝင်တယောက် မစိုးရိမ်ရတဲ့ ဒဏ်ရာရခဲ့ပြီး စစ်သားတွေဟာ ထန်းတောဇက်ဆိပ်က နေအိမ်တွေကို မီးရှို့ဖျက်ဆီးခဲ့တယ်လို့ ဆိုပါတယ်။

ချင်းတွင်းမြစ်ကမ်းဘေး ကျေးရွာများ သပိတ်ကော်မတီဝင်တယောက်က “နေအိမ် ၁၂ လုံးလောက်နဲ့ ဆိုင်ကယ်တချို့ ပါသွားတယ်။ နောက်ထပ် စစ်ကြောင်းတကြောင်းကတော့ ဘယ်ကိုရောက်နေမှန်း မသိရသေးဘူး” လို့ ပြောပါတယ်။

အဆိုပါ ပစ်ခတ်တိုက်ခိုက်မှုတွေနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။

စစ်ကိုင်းတိုင်း၊ ဆားလင်းကြီးမြို့နယ်ထဲမှာရှိတဲ့ ကျေးရွာတွေကို စစ်ကောင်စီက အင်အား ၂ဝဝ ခန့်နဲ့ မြေပြင်စစ်ကြောင်းတွေ ထိုးနေတဲ့အတွက် ဒေသခံပြည်သူ ၃,ဝဝဝ ကျော် ထပ်မံထွက်ပြေး တိမ်းရှောင်နေရတယ်လို့ ဒေသခံတွေဆီက သိရပါတယ်။

မေလ ၈ ရက် ဒီနေ့မနက်အစောပိုင်းမှာ စတင်စစ်ကြောင်းထိုးလာတာဖြစ်ပြီး မြိုင်မြို့ကနေလာတဲ့ စစ်ကြောင်းဖြစ်ကာ ဆားလင်းကြီးမြို့ပေါ်မှာ ညအိပ်ပြီး ဒီမနက်မှာ ဆားလင်းကြီးမြို့ထဲကို ပုသိမ်-မုံရွာ လမ်းအတိုင်း စစ်ကြောင်းထိုး ဝင်ရောက်လာတာလို့ ဆားလင်းကြီးမြို့မှ အမည်မဖော်လိုသူ ရဟန်းတပါးက ဒီဗွီဘီကို ပြောပါတယ်။

“စစ်သားအင်အား ၂၀၀ နဲ့ မြိုင်မြို့ကနေ ဆားလင်းကြီးမြို့ပေါ် ညအိပ်၊ ဒီနေ့မနက် ပုသိမ်-မုံရွာလမ်းအတိုင်း ဝင်လာတာပါပဲ။ လောလောဆယ်တော့ ညောင်ပင်ကြီးကျေးရွာမှာ နားနေကြတယ်။ ဦးဇင်းတို့ရွာဘက်ကိုတော့ စစ်ကြောင်းထိုးတာက ‌၈ ကြိမ်ရှိပြီ။ ဆားလင်းကြီးမြို့နယ်ထဲမှာဆို ၁၅ ကြိမ်နီးပါးပဲ စစ်ကြောင်းထိုးနေတာ။ ပြည်သူတွေ ထပ်ပြီးပြေးရပြီ။”

National Revolutionary Guards - NRG (Salingyi) တပ်ဖွဲ့မှ ဗိုလ်သူရိန်က “၆ ရက်နေ့က မြိုင်နယ်ကနေ ထိုးလာတဲ့ စစ်ကြောင်းပါ။ မြိုင်ကနေ ရေစကြို၊ အဲ့ကနေမှ စစ်ကိုင်းတိုင်း ဆားလင်းကြီးနယ်ထဲက လင်းစားကျက်၊ ဘုတ်စုရွာကို တညအိပ်ပြီး ဆားလင်းကြီးမြို့ကို မနက်စောစော ထိုးလာတယ်။ ဆားလင်းကြီးကို တညအိပ်ပြီး ဒီမနက်မှာ ဆားလင်းကြီးမြောက်ဘက်ကို ဆက်ထိုးနေရာ ခုလက်ရှိ ဆားလင်းကြီးမြို့နယ် ထန်းတော အိုမရွာမှာ ရောက်ရှိနေပါတယ်။ စစ်ရေးအရတော့ တင်းမာလျက်ပါပဲဗျ။ ဒီကောင်တွေ တခုလုပ်တာနဲ့ ကျနော်တို့လည်း တိုက်မှာပါ” လို့ ဒီဗွီဘီကို ပြောပါတယ်။

လက်ရှိမှာ အကြမ်းဖက် စစ်ကြောင်းထိုးဝင်ရောက်လာတဲ့ စစ်ကောင်စီိစစ်ကြောင်းက ညောင်ပင်ကြီးကျေးရွာ၊ ညောင်ပင်ကြီးရဲစခန်းမှာ စခန်းချထားပြီး ဝမ်ပေါင်ကြက်ခြံဘက်ကို သွားဖို့ အလားအလာရှိတယ်လို့ ဒေသခံတွေက ပြောပါတယ်။

အမည်မဖော်လိုသူ ရဟန်းတပါးက “မနှစ် ၅ လပိုင်းလောက်ကတည်းက ပထမဆုံး စစ်ကြောင်းထိုးပြီး ဖိုလ်ဝင်တောင်အရှေ့ဘက်မှာ လူငယ်နှစ်ယောက်ကို ဖမ်းသွားပြီး တောင်အနောက်ဘက်က မင်စုရွာအနားမှာ နှစ်ယောက်စလုံးကို သတ်ထားခဲ့တယ်လေ။ အခုစစ်ကြောင်းက ဝမ်ပေါင်ဘက်သွားမယ်လို့တော့ ယူဆရတယ်” လို့ ပြောပါတယ်။

ပြီးခဲ့တဲ့ ဧပြီ ၂၅ ရက်ကစတင်ကာ ဆားလင်းကြီးမြို့ထဲကို စစ်ကြောင်းထိုးခဲ့တဲ့အတွက် အခုတကြိမ်နဲ့ပါဆိုရင် ဒေသခံပြည်သူ သောင်းဂဏန်းအထိ စစ်ဘေးရှောင်နေရပြီး အဆိုပါ စစ်ကောင်စီစစ်ကြောင်းတွေက ရွာတွေကို ကွင်းသွားတဲ့ စစ်ကြောင်းရှိသလို မီးရှို့သွားတဲ့ စစ်ကြောင်းတွေလည်း ရှိပြီး စစ်အုပ်ချုပ်ရေးဒေသဖြစ်တဲ့အတွက် ဖမ်းဆီးရမိတဲ့ လူငယ်တွေကို ပစ်သတ်ထားခဲ့တာနဲ့ ဖမ်းဆီးခေါ်ဆောင်သွားတာတွေ၊ ပစ္စည်းတွေ ယူဆောင်သွားတာတွေ ရှိတယ်လို့ ဒေသခံတွေက ပြောပါတယ်။