စစ်ကိုင်းတိုင်း အနောက်မြောက်ဘက် ဆားလင်းကြီးမြို့နယ်မှာ ဒီဇင်ဘာ ၇ ရက်နေ့က ဒေသခံ ရွာသားတွေ ရက်ရက်စက်စက် သတ်ဖြတ်ခံခဲ့ရတဲ့အပေါ် အထူးစိုးရိမ်ကြောင်းနဲ့ မြန်မာလုံခြုံရေး တပ်ဖွဲ့တွေရဲ့ အကြမ်းဖက်လုပ်ရပ်တွေအပေါ်  ကုလသမဂ္ဂက  ပြစ်တင်ရှုတ်ချလိုက်ပါတယ်။

ဒီဇင်ဘာ ၈ ရက်နေ့ နယူးယောက် ကုလသမဂ္ဂရုံးချုပ် သတင်းစာရှင်းလင်းပွဲမှာ ကုလသမဂ္ဂ အတွင်းရေးမှူးချုပ်ရဲ့ ပြောခွင့်ရ Stephane Dujarric က ထုတ်ပြန်ပြောဆိုလိုက်တာပါ။

အခုလို အကြမ်းဖက်တာတွေတွေကို ပြင်းပြင်းထန်ထန် ရှုတ်ချပြီး နိုင်ငံတကာ အသိုင်းအဝန်းက တညီတညွတ်တည်း တုံ့ပြန်ဖို့လည်း တောင်းဆိုခဲ့ပါတယ်။

ကုလသမဂ္ဂ အတွင်းရေးမှူးချုပ်ရုံးကတော့ ခိုင်လုံတဲ့ သတင်းတွေအရ သေဆုံးသူတွေထဲမှာ ဆားလင်းကြီးသတ်ဖြတ်ခံရသူတွေထဲမှာ ကလေး ၅ ယောက် ပါဝင်တယ်လို့ ပြောထားပါတယ်။

ဒီဇင်ဘာ ၇ ရက်​နေ့က ဆားလင်းကြီးမြို့နယ် ဒုန်း​တော​ကျေးရွာအပြင်ဘက် ကိုင်း​တောထဲပုန်း​ရှောင်နေတဲ့ စစ်​ရှောင်ပြည်သူ ၁၁ ဦးကို စစ်​ကောင်စီတပ်ဖွဲ့က ပစ်သတ်မီးရှို့ထားခဲ့တာပါ။

ဒီဇင်ဘာ ၈ ရက်မနက်ပိုင်းကလည်း စစ်ကောင်စီတပ်က သတ်ဖြတ်ထားခဲ့တဲ့ ဒုန်း​တော​ကျေးရွာက ၁၁ နှစ်အရွယ်ကလေး ၁ ဦးအပါအဝင် အလောင်း ၄ လောင်း ထပ်မံတွေ့ရှိခဲ့ပြီး စုစုပေါင်း အသတ်ခံထားရသူ ၁၅ ဦး ရှိပြီ ဖြစ်ပါတယ်။

မုံရွာ-ပုသိမ် လမ်းအတိုင်းလာ​နေတဲ့ စစ်​ကောင်စီတပ်ဖွဲ့ကို ​လမ်းခုလပ်တစ်​နေရာမှာ ဒေသခံ PDF အဖွဲ့က မိုင်းဆွဲတိုက်ခိုက်ခံခဲ့တာကြောင့် စစ်​ကောင်စီဘက်က အထိနာသွားခဲ့ပြီး ခုလို သတ်ဖြတ်ခဲ့တာဖြစ်နိုင်ပြီး လက်နက်ကြီးလက်နက်ငယ်တွေနဲ့ ပစ်ခတ်ခဲ့တာကြောင့် ပြည်သူ​တွေလည်း ထွက်​ပြေးတိမ်း​ရှောင်​ကြရတယ်လို့ ဒေသခံတွေက ပြောပါတယ်။ 

စစ်ကိုင်းတိုင်း ယင်းမာပင်မြို့နယ်နဲ့ ဆားလင်းကြီးမြို့နယ်တို့ရဲ့  ပူး​ပေါင်းသပိတ်ကို မတ်လ ၂၇ ရက်​ ဖက်ဆစ်တော်လှန်ရေးနေ့က ဆက်လက်ပြုလုပ်ခဲ့ရာမှာ  စစ်​ကောင်စီအကြမ်းဖက်အဖွဲ့က ပစ်ခတ်လို့ ပြည်သူ  ၁ ဦးသေဆုံးပြီး  ၃ ဦးခန့် ဒဏ်ရာရရှိခဲ့တယ်လို့ ​ဆန္ဒပြပြည်သူ​တွေက​ပြောပါတယ်။

ပူး​ပေါင်းသပိတ်ဟာ မုံရွာ-ပုသိမ်လမ်းဆုံ ​ရွှေ​တောင်ဦးအနီးမှာ ထိုင်သပိတ်ပြုလုပ်အပြီး ပြန်လည်ဆုတ်ခွာ​ချိန်မှာ စစ်တပ်နဲ့ရဲက ​ရောက်လာကာ ပစ်ခတ်ဖြိုခွင်းခဲ့တာဖြစ်ပါတယ်။

လက်ရှိအချိန်ထိ ​၁ ဦးသေ​ဆုံးပြီး  ဒဏ်ရာရရှိသူ​တွေကို​တော့ သပိတ်မှာဝန်းရံတဲ့ပြည်သူ​တွေက တစ်ခြား​နေရာမှာ​ဆေးကုမှုသ​မှုပေး​နေပါတယ်။

ဒီက​နေ့ဆန္ဒပြပွဲမှာ ဒေသတွင်း ကျေးရွာ​ပေါင်းစုံ စု​ပေါင်းပြုလုပ်ခဲ့ကြတာဖြစ်ပြီး လူအင်အား ​သောင်းဝန်းကျင်ထိရှိတယ်လို့ သိရပါတယ်။