မကွေးတိုင်း၊ ဆိပ်ဖြူမြို့နယ်မှာ မေ ၇ ရက် မနက်က စစ်ကောင်စီရဲ့ ကာကွယ်ရေးပစ္စည်းစက်ရုံ ကပစ ၂၂ ကို ဒေသကာကွယ်ရေး ပူးပေါင်းတပ်ဖွဲ့တွေက Short Range Missile ၁၂ လုံးနဲ့ ပစ်ခတ်တိုက်ခိုက်ခဲ့တယ်လို့ ဆိပ်ဖြူ သိန်းငှက်နက် တော်လှန်ရေးတပ်ဦး တာဝန်ခံ ဗိုလ်မိုရှေက ပြောပါတယ်။

လက်လုပ်လက်နက်ကြီး ၄ လုံးကတော့ ပစ်မှတ်ကိုမရောက်ဘဲ လေပေါ်မှာပဲ ပေါက်ကွဲပြီး ၈ လုံးကတော့ ပစ်မှတ်ကို တည့်တည့်ကျရောက်ပေါက်ကွဲကာ ၆ လုံးတန်း လက်နက်ဂိုဒေါင်တခု ပျက်စီးခဲ့တယ်လို့ ဆိုပါတယ်။

ဗိုလ်မိုရှေက “အတွင်းသတင်းရတာကတော့ သူတို့ဘက်က လူထိခိုက်မှုမရှိဘူး။ ပထမတလုံးကျတာနဲ့ အကုန်လုံး ထွက်ပြေးကြတယ်ပြောတယ်။ ကင်းသမားတွေကော အပြင်ရောက်နေတဲ့ ပတ်ကင်းပတ်နေတဲ့သူတွေကော ဘယ်ကပစ်လို့ ပစ်မှန်းမသိဘဲ ထွက်ပြေးကြတယ်” လို့ ပြောပါတယ်။

အဲဒီတိုက်ခိုက်မှုဖြစ်ပြီးနောက်ပိုင်း စက်ရုံအနီးတဝိုက်မှာ အင်အားအလုံးအရင်းနဲ့ ပတ်ကင်းပတ်ပြီး လက်နက်ငယ်တွေ၊ စက်လတ်တွေနဲ့ ပစ်ခတ်ကြတယ်လို့ ဆိုပါတယ်။

အဲဒီ ကပစ ၂၂ စက်ရုံဟာ ပုသိမ်-မုံရွာကားလမ်းနဲ့ ပေါက်-ဆိပ်ဖြူ လမ်းကြားထဲမှာတည်ရှိပြီး လက်နက်ငယ်တွေ အဓိကထုတ်လုပ်နေတာလို့ သိရပါတယ်။

အဲဒီတိုက်ခိုက်မှုကို စစ်ဒေသကွပ်ကဲ ၁၊ မကွေးတိုင်း ဒရုန်းအထူးတပ်ရင်း တပ်ခွဲ ၅၊ သိန်းငှက်နက် ဆိပ်ဖြူတော်လှန်ရေးတပ်ဦးနဲ့ ပခုက္ကူခရိုင် တပ်ရင်း ၁၁ ပြည်သူ့စွမ်းအား တပ်ပေါင်းစုတို့ ပူးပေါင်းတိုက်ခိုက်ခဲ့ကြတာလို့ သိရပါတယ်။

စစ်ကိုင်းတိုင်း၊ ဆားလင်းကြီးမြို့နယ်မှာတော့ မိုင်းနဲ့တိုက်ခိုက်ခံရတဲ့ စစ်ကောင်စီတပ်ဖွဲ့ဝင်တွေက အနီးအနားက အိမ်တွေကို မီးရှို့ဖျက်ဆီးခဲ့တာကြောင့် အိမ် ၁၀ လုံးကျော် ပျက်စီးသွားတယ်လို့ ဒေသခံတွေက ပြောပါတယ်။

မေ ၇ ရက်က မကွေးတိုင်း၊ ရေစကြိုမြို့နယ်ကနေ အင်အား ၂၀၀ လောက်ပါတဲ့ စစ်ကြောင်းဟာ ဆားလင်းကြီးမြို့ပေါ်ကိုရောက်ပြီး တညအိပ်ခဲ့ပါတယ်။ နောက်နေ့ မနက်ပိုင်းမှာတော့ စစ်ကြောင်း ၂ ကြောင်းခွဲပြီး တကြောင်းက ကြေးနီစီမံကိန်း ဝမ်ပေါင် ကုမ္ပဏီထဲကို ဝင်သွားတယ်လို့ ချင်းတွင်းမြစ်ကမ်းဘေး ကျေးရွာများ သပိတ်ကော်မတီဝင် တယောက်က ပြောပါတယ်။

ဝမ်ပေါင်ကနေတဆင့် ညောင်ပင်ကြီးရဲစခန်းကို ဝင်နားပြီး ညနေ ၃ နာရီကျော်အချိန် မုံရွာဘက်ကိုကူးဖို့ ဇက်ဆိပ်ကိုလာချိန်မှာ မိုင်းဆွဲတိုက်ခိုက်ခံရလို့ စစ်သား ၂ ယောက် ဒဏ်ရာရခဲ့တယ်လို့ ဆိုပါတယ်။

စစ်သားတွေရဲ့ ပစ်ခတ်မှုကြောင့် ပြည်သူ့ကာကွယ်ရေးတပ်ဖွဲ့ဝင်တယောက် မစိုးရိမ်ရတဲ့ ဒဏ်ရာရခဲ့ပြီး စစ်သားတွေဟာ ထန်းတောဇက်ဆိပ်က နေအိမ်တွေကို မီးရှို့ဖျက်ဆီးခဲ့တယ်လို့ ဆိုပါတယ်။

ချင်းတွင်းမြစ်ကမ်းဘေး ကျေးရွာများ သပိတ်ကော်မတီဝင်တယောက်က “နေအိမ် ၁၂ လုံးလောက်နဲ့ ဆိုင်ကယ်တချို့ ပါသွားတယ်။ နောက်ထပ် စစ်ကြောင်းတကြောင်းကတော့ ဘယ်ကိုရောက်နေမှန်း မသိရသေးဘူး” လို့ ပြောပါတယ်။

အဆိုပါ ပစ်ခတ်တိုက်ခိုက်မှုတွေနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။

မကွေးတိုင်း၊ ဆိပ်ဖြူမြို့နယ်မှာ ဧပြီ ၂ ရက် ညက စစ်ကောင်စီတပ်ဖွဲ့ဝင် အချင်းချင်း ပစ်ခတ်မှုဖြစ်ပြီး ၃ ယောက်သေဆုံးကာ ၂ ယောက် ဒဏ်ရာရရှိခဲ့တယ်လို့ ပခုက္ကူခရိုင် တပ်ရင်း-၁၉၊ တပ်ခွဲ-၁၊ ဆိပ်ဖြူဘာမထီ ပြည်သူ့ကာကွယ်ရေးတပ်ဖွဲ့ကနေ သိရပါတယ်။

ဆိပ်ဖြူမြို့နယ် ညောင်နီချောင်းနားမှာ ဧပြီ ၂ ရက် ညက အရပ်ဝတ်တွေနဲ့ ကင်းပတ်ထွက်လာတဲ့ လေကြောင်းရန်ကာကွယ်ရေးတပ်က စစ်ကောင်စီတပ်သားတွေကို PDF တွေလို့ထင်ပြီး စစ်ကောင်စီသတင်းပေး ဒလန်တယောက်က ဆိပ်ဖြူဘက်က ထွက်လာတဲ့ စစ်ကားကို သတင်းပို့ခဲ့လို့ အချင်းချင်း ထိပ်တိုက်ပစ်ခတ်မှု ဖြစ်ပွားခဲ့တာလို့ တပ်တွင်းသတင်းပေးတွေဆီက သတင်းရတယ်လို့ ဆိပ်ဖြူဘာမထီ PDF တပ်ရင်းမှူး ကိုပိုင်က ဒီဗွီဘီကို ပြောပါတယ်။

“ကင်းပတ်ထွက်လာတဲ့ စစ်ကောင်စီတပ်သားတွေကလည်း အရပ်ဝတ်တွေနဲ့ဆိုတော့ လူမှားပြီး အပြန်အလှန် ထိပ်တိုက် တိုက်ပွဲဖြစ်ကြတာဗျ။ အဲဒီပစ်ခတ်တိုက်ခိုက်မှုအတွင်းမှာ စစ်ကောင်စီဘက်က ၃ ယောက် သေဆုံးကာ ၂ ယောက်လောက် ဒဏ်ရာရရှိခဲ့ပြီး သူတို့ တပ်တွင်းထဲမှာတော့ PDF က လာပစ်သွားတယ်လို့ သတင်းလွှင့်ထားတယ်။”

အဲဒီ ပစ်ခတ်တိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

စစ်ကောင်စီတပ်သားတွေဟာ ဒီနေ့ ဧပြီ ၄ ရက် မနက် ၁၀ နာရီကျော်လောက်မှာလည်း ကျစ်ပြင်ကျေးရွာကို ဝင်ရောက်ပြီး နေအိမ် ၂ လုံးကို မီးရှို့ဖျက်ဆီးခဲ့ကြတယ်လို့ ဒေသခံတွေဆီကနေ သိရပါတယ်။