သြစတြေးလျနိုင်ငံရဲ့ အကြီးဆုံးကျန်းမာရေးအာမခံကုမ္ပဏီ မက်ဒီဘဏ် ပရိုက်ဗိတ်ရဲ့ လက်ရှိ ဖောက်သည်တွေနဲ့ ဖောက်သည်ဟောင်း ၁၀ သန်းနီးပါးရဲ့ အချက်အလက် အသေးစိတ်တွေ ပေါက်ကြားခဲ့ရတဲ့ ဆိုက်ဘာတိုက်ခိုက်ခံရမှု နောက်ကွယ်မှာ ရုရှားအခြေစိုက်ဟက်ကာတွေ ရှိနေကြောင်း သြစတြေးလျ ဖက်ဒရယ်ရဲတပ်ဖွဲ့က နိုဝင်ဘာ ၁၁ ရက်မှာ ပြောပါတယ်။

လက်ရှိနဲ့ လက်ဟောင်း ဖောက်သည်တွေရဲ့ ဒေတာပေါင်း ၉ ဒသမ ၇ သန်းလောက်ကို ဟက်ကာတွေက ခိုးယူခဲ့ပြီး သောကြာနေ့မှာတော့ နောက်ထပ် ကိုယ်ရေးကိုယ်တာ အသေးစိတ် အချက်အလက်တွေကို ဖွင့်ချခံခဲ့ရပါတယ်။

ကုမ္ပဏီက ဟက်ကာ အကျပ်ကိုင်တောင်းခံတဲ့ ငွေကြေးပေးဖို့ ငြင်းဆိုပြီးနောက်မှာ ဒါမျိုးတွေ နေ့စဉ်နဲ့အမျှ ကြုံနေရမယ်လို့ ကုမ္ပဏီက မျှော်လင့်ထားပါတယ်။

ကုမ္ပဏီဟာ အောက်တိုဘာ ၁၃ ရက်မှာ ဟက်ကာအကြောင်း ထုတ်ဖော်ခဲ့ကတည်းက မက်ဒီဘဏ်ရှယ်ယာတွေ ၂၀ ရာခိုင်နှုန်းလောက် ကျဆင်းသွားရပြီး သောကြာနေ့မနက် အရောင်းအဝယ်မှာတော့ ရှယ်ယာတွေဟာ ၂ ရာခိုင်နှုန်းနီးပါး တက်လာခဲ့ပါတယ်။

မက်ဒီဘဏ်ကို တိုက်ခိုက်တဲ့အတွက် ဆိုက်ဘာရာဇဝတ်ကောင်အုပ်စုကို သြစတြေးလျ ဖက်ဒရယ်ရဲတပ်ဖွဲ့ (AFP) ကော်မရှင်နာ ရိစ် ခါရှောက အပြစ်တင်ထားပြီး လူပုဂ္ဂိုလ် တဦးချင်းစီနဲ့ ပတ်သက်ပြီးတော့ ရုရှား တရားဥပဒေစိုးမိုးရေးဌာနနဲ့ ဆွေးနွေးမှုတွေ လုပ်မှာဖြစ်ကြောင်း ခါရှောက ပြောပါတယ်။

ဒါဟာ သြစတြေးလျနိုင်ငံသား သန်းပေါင်းများစွာအပေါ် သက်ရောက်မှုရှိပြီး သြစတြေးလျ စီးပွားရေးကို ထိခိုက်စေနိုင်တဲ့ သိသာထင်ရှားတဲ့ ရာဇဝတ်မှုတခုဖြစ်ကြောင်းနဲ့ ဒီဆိုက်ဘာတိုက်ခိုက်မှုဟာ သြစတြေးလျအတွက် လက်မခံနိုင်တဲ့ တိုက်ခိုက်မှုဖြစ်ပြီး ဒီရာဇဝတ်မှုဖြစ်စေတဲ့ အန္တရာယ်ရှိတဲ့ ကျယ်ပြန့်တဲ့အကျိုးဆက်တွေနဲ့ ကိုက်ညီတဲ့ တုံ့ပြန်မှုတခု ရထိုက်ကြောင်းလည်း ခါရှောက ပြောပါတယ်။

သြစတြေးလျနိုင်ငံကို ဆိုက်ဘာတိုက်ခိုက်မှုဟာ ပြီးခဲ့တဲ့ ဘဏ္ဍာရေးနှစ်မှာ ခုန်တက်သွားပြီး အချိန် ၇ မိနစ်တိုင်း ၁ ကြိမ် တိုက်ခိုက်မှုရှိနေကြောင်း နိုဝင်ဘာ ၄ ရက်က ထုတ်ပြန်တဲ့ အစိုးရအစီရင်ခံစာမှာ ဖော်ပြပါတယ်။

သြစတြေးလျ ဆိုက်ဘာလုံခြုံရေးစင်တာ (ACSC) ဟာ ပြီးခဲ့တဲ့ဘဏ္ဍာရေးနှစ်မှာ ဆိုက်ဘာရာဇဝတ်မှု အစီရင်ခံစာ ၇၆,၀၀၀ ရရှိခဲ့ပြီး အရင်ကာလထက် ၁၃ ရာခိုင်နှုန်း ပိုများလာတယ်လို့ သူ့ရဲ့ နောက်ဆုံး နှစ်ပတ်လည် ဆိုက်ဘာခြိမ်းခြောက်မှု အစီရင်ခံစာအရ သိရပါတယ်။

တိုက်ခိုက်မှု ထက်ဝက်ကျော်လောက်က လူတဦးချင်းစီကို လိမ်လည်မှုနဲ့ ခိုးမှုတွေအတွက် ပစ်မှတ်ထားခဲ့ပေမဲ့ နိုင်ငံတော်အထောက်အပံ့နဲ့ တိုက်ခိုက်သူတွေကတော့ ဆိုက်ဘာနယ်ပယ်လောကကို စစ်မြေပြင်လို လုပ်ဆောင်တိုက်ခိုက်ခဲ့တာဖြစ်ကြောင်း အစီရင်ခံစာက သတိပေးထားပါတယ်။

တရုတ်နိုင်ငံ လုံခြုံရေးဝန်ကြီးဌာန၊ အီရန်၊ ရုရှားနိုင်ငံတွေနဲ့ ဆက်နွှယ်နေတဲ့ အဖွဲ့တွေရဲ့ တိုက်ခိုက်မှုတွေကို ကိုးကားပြီး အစီရင်ခံစာမှာ ဖော်ပြထားပါတယ်။

ဆိုက်ဘာကျွမ်းကျင်သူ အင်အားနည်းပါးနေတာဟာ ဒီလိုချိုးဖောက်မှုတွေကို ရပ်တန့်ဖို့ သြစတြေးလျနိုင်ငံမှာ ဝန်ထမ်းနည်းပါးပြီး အလုပ်ဝန်ပိနေတဲ့ ဆိုက်ဘာလုံခြုံရေး အထူးကျွမ်းကျင်သူတွေအတွက် ပိုခက်ခဲစေကြောင်း ပညာရှင်တွေက ရိုက်တာသတင်းဌာနကို ပြီးခဲ့တဲ့သီတင်းပတ်မှာ ပြောကြားခဲ့ပါတယ်။

သောကြာနေ့ကထုတ်ပြန်တဲ့ ဆိုက်ဘာခြိမ်းခြောက်မှု အစီရင်ခံစာမှာ Optus နဲ့ Medibank ဟက်ခ်တွေဟာ အတော်လေးကို ခေတ်နောက်ကျနေကြောင်းနဲ့ အဓိကအဖြစ်အပျက် အများစုဟာ ဆော့ဖ်ဝဲအပ်ဒိတ်လုပ်တာ မလုံလောက်မှုကြောင့်ဖြစ်ကြောင်း စွပ်စွဲချက်တွေကို အလေးပေး ဖော်ပြထားပါတယ်။