ရန်ကုန်တိုင်း၊ ခရမ်းမြို့ပေါ်သာမက ခရမ်းမြို့နယ်ရှိ ကျေးရွာတွေပါ စစ်ကောင်စီက ဆိုင်ကယ်မစီးရ အမိန့်ထုတ်ထားတာကြောင့် ဒေသခံ ပြည်သူတွေပါ အခက်အခဲ ကြုံတွေ့နေရပါတယ်။

စစ်ကောင်စီရဲ့ မြို့နယ်အုပ်ချုပ်ရေးအဖွဲ့က နိုဝင်ဘာ ၂၆ ရက်ကစပြီး ဆိုင်ကယ်စီးခွင့် ပိတ်သိမ်းလိုက်တဲ့အတွက် အခုလို အခက်ကြုံနေရတာပါ။

ကဝမြို့နယ်နဲ့ ခရမ်းမြို့နယ် နယ်စပ်ကျေးရွာတရွာဖြစ်တဲ့ ကမ်းမြောင်-ပြည်တော်သာ ကျေးရွာနေ ပြည်သူတဦးက “ကျနော်တို့ဘက်က ခရမ်းကို ဈေးသွားဝယ်တာ၊ ဆေးခန်းပြတာ မှန်သမျှ ဆိုင်ကယ်နဲ့ပဲ သွားကြတာ။ အခုတော့ ဆိုင်ကယ်မစီးရတော့ အတော့်ကို အခက်အခဲ ဖြစ်တယ်ဗျ။ တန်ဖိုးကြီးဆိုင်ကယ်တွေကြ ဘယ်သူက ဘေးတွဲလုပ်ချင်မှာလဲဗျာ။ ဆိုင်ကယ်နာတယ်၊ အင်ဂျင်နာတယ်၊ ဆီပိုကုန်တယ်။ စကစရဲ့ အမိန့်တွေကြောင့် ပြည်သူတွေ အကုန်ဒုက္ခရောက်ရတာ” လို့ ပြောပါတယ်။

ဒါ့အပြင် ကဝမြို့မှ ဆိုင်ကယ် ကယ်ရီဆွဲသူတဦးကလည်း ဆိုင်ကယ်စီးခွင့် ပိတ်လိုက်တာကြောင့် ခရီးသည်လိုက်ပို့ရတာတွေ အဆင်မပြေတော့ကြောင်း ပြောပါတယ်။

ပြီးခဲ့တဲ့ အောက်တိုဘာ ၁၇ ရက်ကတည်းက ခရမ်းမြို့ပေါ်မှာ မော်တော်ဆိုင်ကယ်စီးခွင့် ပိတ်ထားခဲ့ရာကနေ နိုဝင်ဘာ ၁၈ ရက်မှာတော့ တမြို့နယ်လုံးကို ပိတ်ပင်လိုက်တာ ဖြစ်ပါတယ်။

ခရမ်းမြို့မှာ အောက်တိုဘာ ၁၇ ရက်နေ့ကစပြီး ဆိုင်ကယ်စီးနင်းခွင့် ပိတ်ပင်လိုက်ပြီလို့ စစ်ကောင်စီတပ်တွေက ပြီးခဲ့တဲ့ရက်ပိုင်းက ကြေညာထားခဲ့တဲ့နောက် ဒီနေ့မှာတော့ ခရမ်းမြို့အတွင်းမှာ ဆိုင်ကယ်စီးသူ လုံးဝမရှိတော့ဘူးလို့ မြို့ခံတွေဆီက သိရပါတယ်။

စစ်ကောင်စီတပ်တွေက ခရမ်းမြို့နယ်အတွင်းမှာ ဆိုင်ကယ်မစီးရတဲ့နေ့ကို ဒီလ အောက်တိုဘာ ၁၇ ရက်နေ့က စတင်သတ်မှတ်ခဲ့တာဖြစ်ပြီး ဒီနေ့မှာ စစ်တပ်နဲ့ ရဲတွေက စစ်ဆေးဖမ်းဆီးတဲ့ အခြေအနေတွေကို မတွေ့ရသေးဘဲ မြို့အဝင်အထွက်ဂိတ်တွေမှာတော့ ဆိုင်ကယ်တွေကို ဖြတ်သန်းသွားလာခွင့် မပြုကြဘူးလို့ မြို့ခံတွေက ပြောပါတယ်။

ခရမ်း PDF ရဲ့ တိုက်ခိုက်မှုတွေကြောင့် စစ်ကောင်စီတပ်တွေနဲ့ စစ်ကောင်စီ လုံခြုံရေးယူထားတဲ့ နေရာတွေ ထိခိုက်တာ များလာကြောင့် စစ်ကောင်စီတပ်တွေဟာ ရန်ကုန်တိုင်း ခရမ်းမြို့နယ်အတွင်းမှာ ဆိုင်ကယ်မစီးရတော့ဘူးလို့ လွန်ခဲ့တဲ့ ရက်သတ္တပတ်က ကြေညာပြီးတဲ့နောက် သတ်မှတ်ရက်ပြည့်တဲ့ ဒီနေ့မှာတော့ ခရမ်းမြို့နယ်အတွင်း ဆိုင်ကယ်စီးနေတာတွေ မတွေ့ရတော့ဘူးလို့ ဆိုပါတယ်။

ခရမ်းမြို့ရဲ့ မြို့အဝင်အထွက်ဂိတ်အားလုံးမှာ တာဝန်ကျနေတဲ့ စကစတပ်သားတွေက ဆိုင်ကယ်တွေကို မြို့တွင်း စီးနင်းဝင်ရောက်ခွင့်လည်း မပြုသလို စီးနင်းလာသူတွေကိုလည်း နောက်ရက်တွေမှာ ဆိုင်ကယ်မစီးလာဖို့ ပြောဆိုနေကြပြီး လာရာလမ်းအတိုင်း ပြန်လှည့်ခိုင်းနေကြပါတယ်။

စစ်ကောင်စီတပ်တွေက ဆိုင်ကယ်တွေကို စီးနင်းခွင့်မပြုကြပေမယ့် ဆိုင်ကယ်နဲ့ ပြုလုပ်ထားတဲ့ ဘေးတွဲဆိုင်ကယ်တွေကိုတော့ စီးနင်းခွင့်ပြုထားပြီး မြို့အဝင်အထွက်ဂိတ်တွေမှာလည်း ဖြတ်သန်းခွင့်ပြုထားကြတယ်လို့လည်း သိရပါတယ်။

ရန်ကုန်မြို့တောင်ပိုင်း၊ ခရမ်းမြို့နယ်မှာ အောက်တိုဘာ ၇ ရက် မနက်ပိုင်းက စစ်ကောင်စီတပ်တွေ ရှိတဲ့ ပစ်မှတ်နေရာ ၄ ခုကို ဒေသကာကွယ်ရေးအဖွဲ့ (PDF)က တပြိုင်တည်း တိုက်ခိုက်ခဲ့ပါတယ်။

အဲဒီနေရာတွေက ခရမ်းမြို့ ၂ ရပ်ကွက်ရှိ မြို့နယ်အထွေထွေအုပ်ချုပ်ရေးရုံး၊ တလမ်းကျော်ရှိ ရဲစခန်း၊ ထွေအုပ်ရုံးနဲ့ ကိုက် ၅၀ ခန့်အကွာရှိ ကင်းစခန်း၊ ၇ ရပ်ကွက်ရှိ ခရမ်း-ပဲခူးကားလမ်း စစ်ဆေးရေးဂိတ်(သစ်တောဂိတ်)တို့ ဖြစ်ပြီး အဲဒီပစ်ခတ်မှုတွေပြီးတဲ့နောက် ဆိုင်ကယ်စီးနင်းခွင့်ကို ပိတ်လိုက်တာလည်း ဖြစ်ပါတယ်။