တနင်္သာရီတိုင်း တနင်္သာရီမြို့နယ်မှာ ဆိုင်ကယ်မောင်းနှင်လာသူ ရွာသား ၂  ယောက်ကို ဧပြီ ၇ ရက်မှာ စစ်ကောင်စီတပ်က ပစ်ခတ်ခဲ့တယ်လို့ ပြည်သူ့ကာကွယ်ရေးတပ်ဖွဲ့ဝင်တွေက ပြောပါတယ်။

ဒီနေ့ မွန်းတည့် ၁၂ နာရီလောက်က  ဘန်းလမွတ်ကျေးရွာအုပ်စု မော်တုန်းကျေးရွာအနီး ‌  ဆိုင်ကယ် တစီးကို ၂ ယောက်စီးလာချိန် စစ်ကောင်စီတပ်က ပစ်ခတ်ခဲ့တာလို့ ဆိုပါတယ်။

ပစ်ခတ်ခံရသူအမျိုးသား ၂ ယောက်ထဲက ကိုကျော်ထွေးဆိုသူမှာ နေရာတင် သေဆုံးခဲ့ပြီး အတူပါလာတဲ့ ၁ ယောက်ကိုတော့ စစ်ကောင်စီတပ်က ဖမ်းဆီးထားတယ်လို့ သိရပါတယ်။

ပြည်သူ့ကာကွယ်ရေးတပ်ဖွဲ့ဝင်တဦးက "နှစ်ယောက်ဆိုင်ကယ်တစီးနဲ့သွားတာ။ တယောက် သေတာပဲ သိရသေးတယ်။ ကျန်တယောက်က သေလား ရှင်လား မသိရသေးဘူး။ စစ်တပ်က ရွာထဲမှာ နေရာယူထားကြတယ်" လို့ ပြောပါတယ်။

ဒါအပြင် ပြီးခဲ့တဲ့ရက်ပိုင်းကလည်း သဲဖြူ-သိန်ခွန်းကျေးရွာအနီးရှိ မိန်းလမ်းမကြီးမှာ ဆိုင်ကယ်မောင်းနင်းလာတဲ့ ဒေသခံတဦးကို စစ်ကောင်စီတပ်က ပစ်သတ်ခဲ့သေးတယ်လို့ သိရပါတယ်။

ပြည်သူ့ကာကွယ်ရေးဘက်ကလည်း အဆိုပါ လမ်းမတလျှောက် တိုက်ပွဲပြင်းထန်နေတာကြောင့် ခရီးသွားလာမှုတွေကို ပိတ်ပင်ထားတယ်လို့ သိရပါတယ်။

မြိတ်-မောတောင်လမ်းမတလျှောက်မှာ မတ် ၂၈  ရက်နေ့ကစတင်ကာ တိုက်ပွဲပေါင်း ၂ဝ ကျော် ဖြစ်ပွားခဲ့ပြီး ဒေသခံအများအပြား စစ်ဘေးရှောင်နေရတယ်လို့ သိရပါတယ်။

မန္တလေးတိုင်း၊ မိုးကုတ်မြို့နယ်၊ ကင်းကျေးရွာမှာ နိုဝင်ဘာ ၂၇ ရက်က ဆိုင်ကယ်မောင်းနှင်လာသူ တယောက် ကျွဲခတ်ခံရလို့ သေဆုံးခဲ့တယ်လို့ ဒေသခံတွေဆီက သိရပါတယ်။

လမ်းမပေါ်မှာ ကျွဲနှစ်ကောင် ရန်ဖြစ်နေချိန် ဆိုင်ကယ်မောင်းနှင်လာသူကို ကျွဲက အနောက်ကနေ ခွေ့လိုက်တာကြောင့် ဆိုင်ကယ်ပေါ်က ပြုတ်ကျပြီး သေဆုံးတာလို့ ဒေသခံ တဦးက ပြောပါတယ်။

"ဆိုင်ကယ်မောင်းလာသူက အရက်မူးနေတာ။ ကျွဲနှစ်ကောင်ခတ်နေလို့ မသွားနဲ့ပြောတာကို သွားလိုက်တာ။ အဲဒီမှာ ကျွဲ တကောင်က နောက်ကနေ ဂျိုနဲ့ ထိုးလိုက်တာ။"

ကျွဲခတ်ခံရသူက နှာခေါင်းနဲ့ ပါးစပ်တွေကနေ သွေးထွက်လာပြီးနောက် ဆေးရုံပို့ဆောင်ချိန်မှာ သေဆုံးသွားတာလို့ သိရပါတယ်။