မန္တလေး၊ မဟာအောင်မြေမြိုနယ် ၈၂ လမ်းနဲ့ ၄၂ လမ်းထောင့်မှာ ဧပြီ ၂၈ ရက် ည ၈ နာရီ လောက်က ဆိုင်ကယ်စီးလာတဲ့ အမျိုးသားနှစ်ယောက်ကို လူတစ်စုက ဓားနဲ့ထိုးပြီး ဆိုင်ကယ် လုယက်ခဲ့တဲ့အတွက် ဆိုင်ကယ်စီး အမျိုးသား ၁ ယောက် သေဆုံးပြီး ၁ ယောက် ဒဏ်ရာ ရခဲ့တယ်လို အနီးအနားနေထိုင်သူတွေက ပြောပါတယ်။
ဒေသခံတဦးက "ယောက်ျားလေးနှစ်ယောက် ဆိုင်ကယ်စီးလာတာ ဆိုင်ကယ်ကိုတားပြီး လူတ အုပ်က ဓားတွေနဲ့ ဝင်ခုတ်တာ တစ်ယောက်ကပွဲချင်းပြီးသေသွားတယ်။ နောက်တစ်ယောက်က တော့ ဒဏ်ရာရရှိသွားတယ်။ ဆိုင်ကယ်ကိုတော့ လုယူသွားကြတယ်"လို့ ပြောပါတယ်။
ဓားနဲ့ အထိုးခံရတဲ့အတွက် ဆိုင်ကယ်စီးလာသူ နှစ်ဦးအနက် တစ်ဦးဟာ ဆေးရုံကို ပို့ဆောင်တဲ့လမ်းမှာ သေဆုံးသွားပြီး နောက်တစ်ဦးကတော့ မစိုးရိမ်ရ ဒဏ်ရာနဲ့ ဆေးရုံကို ပို့ဆောင်ပေးခဲ့တယ်လို မဏိစလ(မန္တလေး) လူမှူကူညီရေးအသင်းက ပြောပါတယ်။
စစ်အာဏာသိမ်းပြီးနောက်ပိုင်း ခိုးဆိုးလုယက် လူသတ်မှုတွေ နေ့စဉ်နဲ့အမျှ များပြားလာသလို နယ်မြေခံ လုံခြုံရေးတပ်ဖွဲတွေက ထိထိရောက်ရောက် မနှိမ်နင်းနိုင်တာကြောင့် ပြည်သူတွေရဲ့ ဘဝလုံခြုံမှု မရှိတော့တဲ့အပြင် လမ်းသွားလာတဲ့အခါ မိမိလုံခြုံရေးကို မိမိကိုယ်တိုင် အထူး ဂရုစိုက်ဖို့ လိုတယ်လို့ ရပ်ကွက်နေသူတဦးက ပြောပါတယ်။
မွန်ပြည်နယ်၊ ရေးမြို့နယ်၊ လမိုင်းမြို့ သောင်ပြင် - ကျိုက်မင်ဝကမ်းခြေမှာ မတ် ၄ ရက် နေ့လယ် ၁၂ နာရီလောက်က သေနတ်နဲ့ ပစ်ခတ်ပြီး ဆိုင်ကယ်စီးလုယက်မှုဖြစ်ပွားခဲ့တယ်လို့ ဒေသခံတွေက ပြောပါတယ်။
လူငယ် နှစ်ယောက် ပင်လယ်ကမ်းခြေဘက်သို့ ဆိုင်ကယ်နဲ့သွားနေစဉ် ဆိုင်ကယ်စီးလာသူ အမျိုးသား နှစ်ယောက် အနောက်က လိုက်လာပြီး သေနတ်ပစ်ကာ ဆိုင်ကယ်လုယက်သွားခဲ့တယ်လို့ ဒေသခံ လူမှုကယ်ဆယ်ရေးသမားတွေက ပြောပါတယ်။
ဆိုင်ကယ်လုယက်ခံရပြီး သေနတ်ဒဏ်ရာရခဲ့တဲ့ လူငယ် နှစ်ယောက်ကို လမိုင်းဆေးရုံကနေ မော်လမြိုင်ဆေးရုံကို ပို့ဆောင်ပေးခဲ့တယ်လို့ လူမှုကယ်ဆယ်ရေးသမားတွေက ပြောပါတယ်။
ဆိုင်ကယ်လုယက်ခံရသူတွေဟာ မော့ကနင်ကျေးရွာက ဖြစ်ပြီး သေနတ်ဒဏ်ရာရသူ အမျိုးသမီး တယောက်ဟာ ဘယ်ဘက် ဝမ်းဗိုက် ကျည်ထိမှန်ထားခဲ့ရတာကြောင့် စိုးရိမ်ရတဲ့ အခြေအနေမှာ ရှိနေခဲ့တယ်လို့သိရပါတယ်။
လမိုင်းမြို့ဘက်မှာ စစ်တပ်အာဏာသိမ်းပြီးတဲ့နောက် ခိုးဆိုးလုယက်မှုတွေ အများဆုံးဖြစ် လာပြီး တော့ အခုလို သေနတ်ကိုင်ဆောင်ပြီး လုယက်မှုဖြစ်စဥ်တွေဟာ ရေးမြောက်ပိုင်းဘက်မှာ မကြာခဏသလို ဖြစ်လာခဲ့ပါတယ်။
