တနင်္သာရီတိုင်း၊ မြိတ်ခရိုင်၊ ပုလောမြို့နယ်၊ ပလမြို့မှာ စစ်ကောင်စီတပ်သား၊ ရဲနဲ့ ပျူစောထီးတွေက မတ်လနဲ့ ဧပြီလအတွင်း ဖမ်းဆီးထိန်းသိမ်းထားတဲ့ ဆိုင်ကယ်တွေကို ဒေသခံတွေဆီ ပြန်မပေးတော့ဘဲ အဓမ္မ သိမ်းယူ ရောင်းစားနေတယ်လို့ ဒေသခံတွေထံက သိရပါတယ်။

ဒေသခံတဦးက “ပလဂိတ်ကနေ ဖြတ်သွားတဲ့ ဆိုင်ကယ်မှာလည်း လိုင်စင်မရှိရင် ဖမ်းတာမျိုး အခုထိ ရှိနေတုန်းပဲ။ မြိတ်ဘက်လမ်းကြောင်းက အဆင်ပြေတော့ ဆိုင်ကယ်တွေ မြိတ်ဘက်ဆီ သယ်သွားတာရှိတယ်။ တချို့ဆိုင်ကယ်တွေကျတော့ ပလမြို့အနီးနားဝန်းကျင်မှာပဲ အရောင်းအဝယ် လုပ်လိုက်ကြတယ်။ လိုင်စင်ရှိတဲ့ ဆိုင်ကယ်တွေဆိုလည်း တစီးကို သဲအိတ် ၃၀ ပေးပြီး ထုတ်ရတာတွေရှိတယ်” လို့ ပြောပါတယ်။

ဆိုင်ကယ်ဖမ်းဆီးခံရတဲ့ ဒေသခံတဦးကလည်း “ဆိုင်ကယ်ဖမ်းခံထိချိန်မှာ လိုင်စင်စာအုပ်မပါလို့ အိမ်ပြန်ပြီး လိုင်စင်စာအုပ် ပြန်သွားယူပြီး ပြန်သွားထုတ်ချိန်မှာ မထုတ်ပေးဘူး။ အခုချိန်ထိလည်း ကျနော့်ဆိုင်ကယ် ဘယ်နားရောက်နေမှန်းတောင် မသိဘူး” လို့ ပြောပါတယ်။

ပိုင်ရှင်တွေဆီ ပြန်မရောက်တဲ့ ဆိုင်ကယ် စုစုပေါင်း ၇၀ နီးပါးလောက်ရှိပြီး အဆိုပါ ဆိုင်ကယ်တွေကို စစ်ကောင်စီတပ်သားတွေက ရောင်းစားလိုက်တယ်လို့လည်း ဒေသခံတွေက ပြောဆိုနေကြပါတယ်။

“ပုလောမှာက တခါတလေမှပဲ ဖမ်းတယ်။ အဓိက ဖမ်းတာက ပလမှာ ဖမ်းတာပိုများတယ်။ တပိုတို့ ဇရပ်ဆိပ်တို့ စတဲ့ ပုလောတောင်ပိုင်းမှာရှိတဲ့ ကျေးရွာတွေက ရွာသားတွေက ပလကိုဖြတ်တဲ့အချိန်မှာ ဖမ်းဆီးခံထိတာ ပိုများတယ်။ စစ်သားတွေက ဆိုင်ကယ်တွေကို ပြန်သူတွေဆီပြန်မပေးဘဲ မြိတ်ဘက်ကို ရောင်းစားကြတယ်” လို့ ပလမြို့ခံတဦးက ပြောပါတယ်။

တနင်္သာရီတိုင်းအတွင်းမှာရှိတဲ့ ပုလောမြို့နယ်ဟာ ပြီးခဲ့တဲ့ ဖေဖော်ဝါရီ ၂ ရက်က စစ်အုပ်ချုပ်ရေး ကြေညာခံထားရပြီး စစ်ကောင်စီတပ်သားတွေနဲ့ ဒေသခံ ပြည်သူ့ကာကွယ်ရေးတပ်တို့ မကြာခဏ တိုက်ပွဲဖြစ်ပွားနေတဲ့ ဒေသလည်း ဖြစ်ပါတယ်။

ရန်ကုန်တိုင်းအတွင်း ဆိုင်ကယ်အများဆုံးစီးတဲ့ မြို့နယ်တွေကို စစ်ကောင်စီတပ်တွေက စစ်ဆင်ရေးတခုလို လုပ်ဆောင်ပြီး လိုက်လံဖမ်းဆီး ပြန်ရောင်းစားနေတာကြောင့် ဆိုင်ကယ် စီးနင်းသူတွေ အခက်အခဲကြုံနေရတယ်လို့ မြို့ခံပြည်သူတွေက ပြောပါတယ်။

အင်းစိန်၊ မင်္ဂလာဒုံ၊ လှိုင်သာယာ၊ ရွှေပြည်သာ၊ သန်လျင်၊ မြောက်ဥက္ကလာ၊ တောင်ဥက္ကလာ၊ သင်္ဃန်းကျွန်း၊ ဒဂုံမြို့သစ်မြို့နယ်တွေမှာ ညနေပိုင်းအချိန် ရောက်ပြီဆိုရင် ကုန်တင်ကားတစီး၊ စစ်သားတွေအပြည့် တင်ဆောင်လာတဲ့ DC ကား ၂ စီးလောက်နဲ့ လမ်းဆုံလမ်းခွတွေမှာ စစ်ကောင်စီ လက်နက်ကိုင်တပ်တွေ ချထားကာ ကားအပြည့်ရတဲ့အထိ ဆိုင်ကယ်တွေကို နေ့စဉ် အဓမ္မဖမ်းဆီးနေတာ ဖြစ်ပါတယ်။

ဆိုင်ကယ်အဖမ်းခံရသူတဦးက “ညနေ သုံးနာရီခွဲလောက်ဆို လမ်းဆုံတွေ၊ မီးပွိုင့်အကျော်တွေမှာ သူတို့ စစ်သား လေးယောက်ကို ချထားခဲ့တယ်။ နောက်ထပ် ကားတစီးပေါ်က စစ်သားတွေကို နောက်တနေရာမှာ ချထားပေးပြီး လာသမျှဆိုင်ကယ် အကုန်ဖမ်းတယ်။ ဘုန်းကြီး ဆိုင်ကယ်ကအစ အကုန်ဖမ်းတာ။ ရပ်ခိုင်းပြီး သော့တန်းဖြုတ်တာ” လို့ ပြောပါတယ်။

စစ်ကောင်စီတပ်တွေဟာ အရင်က ရဲ၊ စစ်သား၊ ယာဥ်ထိန်းရဲတွေနဲ့အတူ ဆိုင်ကယ်တွေကို ဖမ်းဆီးပေမဲ့ အခုနောက်ပိုင်းမှာတော့ စစ်တပ်က စစ်သားတွေနဲ့ ဖမ်းဆီးနေပြီး ဖမ်းဆီးလာတဲ့ ဆိုင်ကယ်တွေကို သူတို့ရဲ့ တပ်ရင်းဌာနချုပ်တွေထဲကို ယူဆောင်သွားတယ်လို့လည်း သိရပါတယ်။

ဖမ်းဆီးရမိခဲ့တဲ့ ဆိုင်ကယ်တွေကို စစ်တပ်နဲ့ နီးစပ်သူတွေထံ အပ်နှံပြီး ပုတ်ပြတ် ကြိုက်တာယူ ၆ စီးကို ကျပ်သိန်း ၂၀ နဲ့ ပြန်လည်ရောင်းချကာ ဝင်ငွေရှာဖွေနေပြီး တစီးချင်းယူမယ်ဆိုရင်တော့ အနည်းဆုံး ကျပ်နှစ်သိန်းခွဲနဲ့ ပြန်လည်ရောင်းချနေတယ်လို့လည်း စစ်တပ်နဲ့ နီးစပ်သူတဦးက ပြောပါတယ်။

အခုအခါ စစ်တပ်က မြို့နယ်အသီးသီးမှာ ဆိုင်ကယ် ကယ်ရီဂိတ်တွေကို သီးခြား သတ်မှတ်ပေးထားပြီး ကယ်ရီဆွဲခွင့် သတ်မှတ်ပေးထားပေမဲ့ သူတို့ မထင်ရင် မထင်သလို အဲဒီဆိုင်ကယ် ကယ်ရီဂိတ်က ဆိုင်ကယ်တွေကိုပါ ဖမ်းဆီးနေတာကြောင့် ဝမ်းရေးအတွက် ကယ်ရီဆွဲနေသူတွေလည်း အခက်အခဲတွေ ဖြစ်နေကြပါတယ်။

ရန်ကုန်မြို့တော် စည်ပင်သာယာနယ်နိမိတ်အတွင်း ဆိတ်ကြီးခနောင်တိုနဲ့ ဒလမြို့နယ်တွေမှအပ ကျန်မြို့နယ်တွေမှာ ဆိုင်ကယ်မစီးကြဖို့ ၂၀၁၃ ခုနှစ်ကတည်းက သတ်မှတ်ခဲ့တာ ဖြစ်ပါတယ်။

အခုအခါမှာတော့ အင်းစိန်၊ မင်္ဂလာဒုံ၊ လှိုင်သာယာ၊ ရွှေပြည်သာ၊ သန်လျင်၊ မြောက်ဥက္ကလာ၊ တောင်ဥက္ကလာ၊ သင်္ဃန်းကျွန်း၊ ဒဂုံမြို့သစ်တောင်ပိုင်း၊ ဒဂုံမြို့သစ်မြောက်ပိုင်း၊ ဒဂုံမြို့သစ်အရှေ့ပိုင်း၊ ဒဂုံမြို့သစ်ဆိပ်ကမ်းမြို့နယ်တွေမှာ ဆိုင်ကယ် အများဆုံးစီးနင်းနေကြပြီး အင်းစိန်မြို့နယ်၊ လှိုင်သာယာ၊ ရွှေပြည်သာ၊ သန်လျင်၊ မြောက်ဥက္ကလာပမြို့နယ်တွေမှာတော့ ဆိုင်ကယ်ဖမ်းဆီးခံရမှု အများဆုံး ဖြစ်ပါတယ်။