ဆိုမာလီယာနိုင်ငံမြို့တော် မိုဂါဒစ်ရှူးက ပညာရေးဝန်ကြီးဌာနမှာ အောက်တိုဘာ ၂၉ ရက်က ကားဗုံး နှစ်လုံး ပေါက်ကွဲခဲ့တာကြောင့် လူအများအပြား သေဆုံး ဒဏ်ရာရခဲ့တယ်လို့ ရဲတပ်ဖွဲ့နဲ့ နိုင်ငံပိုင် သတင်းအေဂျင်စီက ပြောပါတယ်။
ဗုံးခွဲမှု နောက်ကွယ်မှာ ဘယ်သူဘယ်ဝါတွေ ရှိသလဲဆိုတာ မသိရသေးပေမဲ့ အစ္စလာမ္မစ်အုပ်စု အယ်လ်ရှာဘတ်က မိုဂါဒစ်ရှူးနဲ့ တခြားနေရာတွေမှာ မကြာခဏ ဗုံးခွဲနေသလို သေနတ်နဲ့ ပစ်ခတ်တိုက်ခတ် နေပါတယ်။
“ဝန်ကြီးဌာနရဲ့ နံရံတွေကို ကားဗုံးနှစ်လုံး ထိမှန်သွားတယ်” လို့ ရဲမှူး နူးရ်ဖာရာက ပြောပါတယ်။
ပထမပေါက်ကွဲမှုက ဝန်ကြီးဌာနကို ထိမှန်ခဲ့တာပါ။ လူနာတင်ယာဉ်တွေ ရောက်လာပြီး သေဆုံးသူတွေကို ကူညီဖို့ လူတွေ စုလာချိန်မှာ ဒုတိယအကြိမ် ပေါက်ကွဲခဲ့တာလို့ ဖှာရာက ရိုက်တာ သတင်းဌာန ကို ပြောခဲ့ပါတယ်။
ဝန်ကြီးဌာနကို စောင့်ကြပ်နေတဲ့ ရဲအရာရှိ ဟတ်ဆန်ကတော့ ဗုံးကွဲမှုကြောင့် အလောင်း ၁၂ လောင်းထက်မနည်း မြင်ခဲ့ပြီး လူ ၂၀ ကျော် ဒဏ်ရာရခဲ့တယ်လို့ ရိုက်တာသတင်းဌာနကို ပြောပါတယ်။
ပေါက်ကွဲမှုတွေကြောင့် အလွတ်တန်း သတင်းထောက် မိုဟာမဒ် အစ်ဆေကိုနာ အပါအဝင် အရပ်သား အသေအပျောက်ရှိခဲ့တယ်လို့ အစိုးရ သတင်းဌာန ဆွန်နာက ပြောပါတယ်။
ဆိုမာလီယာနိုင်ငံမှာ ဆယ်စုနှစ်တစ်ခုကျော်ကြာ တိုက်ခိုက်နေတဲ့ အယ်လ်ကိုင်ဒါတွေနဲ့ မဟာမိတ် အယ်လ်ရှာဘတ်တွေက ဗဟိုအစိုးရကို ဖြုတ်ချပြီး ရှရီယာဥပဒေရဲ့ တင်းကျပ်တဲ့ အဓိပ္ပာယ် ဖွင့်ဆိုချက်အပေါ် အခြေခံတဲ့ ကိုယ်ပိုင်အုပ်ချုပ်ခွင့်ကို ထူထောင်ဖို့ ကြိုးပမ်းနေကြပါတယ်။
