ထိုင်းတောင်ပိုင်း၊ ချွန်းဖွန်းခရိုင်ရှိ ပင်လယ်ပြင်ထဲမှာ မတ်လ ၂၁ ရက် မနေ့ညနေပိုင်းက ဆီတင်သင်္ဘော တစီးနဲ့ ငါးဖမ်းလှေတို့ မတော်တဆတိုက်မိပြီး ငါးဖမ်းရေယာဉ်ပေါ်က ရေလုပ်သား ၁ ဦးသေဆုံး ၁ ဦးပျောက်ဆုံးနေတယ်လို့ ထိုင်းရတ်သတင်းမှာ ဖော်ပြပါတယ်။
“Ocean Marine” အမည်ရှိ ဆီတင်သင်္ဘောကြီးနဲ့ ထလေးလုမ်းချုတ် ၈ အမည်ရှိငါးဖမ်းရေယာဉ်တို့ မနေ့ ညနေ ၆ နာရီခွဲလောက်က လန်ဆွန်ကမ်းစပ်နဲ့ မိုင် ၂၀ အကွာ ပင်လယ်ထဲမှာ မတော်တဆတိုက်မိလို့ အရေးပေါ်ကယ်ဆယ်ရေးလှေတွေ စေလွှတ်ခဲ့ရကြောင်း ချွန်းဖွန်းခရိုင် လက်ထောက်ခရိုင်ဝန် နိုင်းဆုမ်ဖွန်း ပါချိမ်းဖေ့ချ်ကပြောပါတယ်။
ကယ်ဆယ်ရေးအဖွဲ့တွေ ရောက်သွားချိန်မှာ လူ ၅ ယောက်ပါသွားတဲ့ ငါးဖမ်းရေယာဉ်ပေါ်ကနေ ကိုချစ်သန်း ( ၄၆ နှစ် )နဲ့ ကိုဦး ( ၃၃ နှစ် ) ရှိမြန်မာရေလုပ်သား နှစ်ယောက်နဲ့ နိုင်းဆွန်ဖွန်းကျရွန်းဆဒ် ဆိုသူ ထိုင်းလှေသူကြီး တယောက် စုစုပေါင်း သုံးယောက်ကိုသာကယ်တင်နိုင်ခဲ့ကြောင်း၊ လာအိုလုပ်သား နိုင်း ဖိုင်းဝမ်း ချစ်ဥဒုမ်း ( ၅၀ နှစ် ) မှာ ခေါင်းတခြား ကိုယ်တခြားဖြစ်သွားပြီး ပြတ်နေတဲ့ ခေါင်းက လှေပေါ်ကျန်ရစ်ကာ ခန္ဓာကိုယ်ပိုင်းကိုတော့ ရှာမတွေ့သေးဘူးလို့ ဆိုပါတယ်။
ဒါ့အပြင် နိုင်းမာနုပ် ဝမ်းထွန်း ( ၆၂ ) ဆိုသူ ထိုင်းရေလုပ်သား တယောက်လည်း ပျောက်ဆုံးနေကြောင်း၊ နိုင်းဖိုင်းဝမ်းရဲ့ ဦးခေါင်းကိုတော့ ပတ်နမ့်လန်ဆွန်ဆေးရုံကို ပို့ဆောင် ထားတယ်လို့ ဆိုပါတယ်။
ဒီကနေ့ မတ်လ ၂၂ မှာလည်း ပျောက်ဆုံးနေသူကို ဆက်လက်ရှာဖွေနေပြီး သင်္ဘောနှစ်စီး တိုက်မိရတဲ့အကြောင်းရင်းကိုတော့ တာဝန်ရှိသူတွေ စုံစမ်းစစ်ဆေးနေဆဲလို့ ထိုင်းသတင်းမှာ ဖော်ပြပါတယ်။
ရန်ကုန်မြို့၊ ဗိုလ်တထောင်မြို့နယ် လင်းစဒေါင်းတံတားအနီး ရန်ကုန်မြစ်အတွင်းမှာ ဆီတင်သင်္ဘောတစီး နိုဝင်ဘာ ၁၀ ရက် ဒီနေ့ နေ့လယ်ပိုင်းက မီးလောင်ခဲ့ရာ အသက် ၁၀ နှစ်အရွယ် ကလေးတဦး အပါအဝင် လေးဦးဒဏ်ရာရရှိခဲ့တယ်လို့ ဆိပ်ကမ်းအနီး နေထိုင်သူတွေက ပြောပါတယ်။
ရန်ကုန်မြစ်အတွင်း ဒီနေ့ နေ့လယ် ၂ နာရီခွဲက သင်္ဘောတစီး မီးလောင်မှုဖြစ်ပွားခဲ့ရာ တာမွေမြို့နယ်၊ ပုဇွန်တောင်မြို့နယ်တို့က မီးသတ်ရေယာဥ် ခြောက်စီးနဲ့ တနာရီကျော်ကြာကြာအောင် မီးငြှိမ်းသတ်ခဲ့ရပြီး လေးဦးဒဏ်ရာရရှိခဲ့တယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
“၂ နာရီ ၂၆ မိနစ်မှာ မီးလောင်တယ်၊ ၃ နာရီ ၅၃ မိနစ်မှာ မီးငြိမ်းသွားတယ်။ မီးလောင်မှုဖြစ်စဥ်နဲ့ ဆုံးရှုံးမှုတန်ဖိုးကို စစ်ဆေးတွက်ချက်နေတုန်းပါ။”
မီးလောင်တဲ့သင်္ဘောမှာ ဆီတင်လာတာဖြစ်ပြီး ပေါက်ကွဲအားပြင်းထန်ကာ ပေါက်ကွဲသံကို ဒလမြို့ကနေ ကြားရတယ်လို့ မြို့ခံတဦးက ဒီဗွီဘီကို ပြောပါတယ်။
“ဆီတင်သင်္ဘောလို့ပြောတယ်၊ ပေါက်တဲ့အသံက ကျနော်တို့နေတဲ့ နေရာအထိပါ ကြားရတယ်။ အကျယ်ကြီးပဲ။ ထိခိုက်ဒဏ်ရာရတဲ့သူတွေလည်း ရှိတယ်။”
သင်္ဘောမီးလောင်မှုဖြစ်စဥ်မှာ အသက် ၁၀ နှစ်ကျော်အရွယ် ကလေးတဦးနဲ့ အမျိုးသားသုံးဦး ထိခိုက်ဒဏ်ရာ ရရှိခဲ့တယ်လို့ ဆိပ်ကမ်းမှာ နေထိုင်သူတဦးက ပြောပါတယ်။
“ဒဏ်ရာရတဲ့အထဲမှာ ကလေးက စိုးရိမ်ရတယ်။ လေးယောက်စလုံးကို ရန်ကုန်ဆေးရုံကြီးကို ပရဟိတသမားတွေက လိုက်ပို့ပေးကြတယ်။”
အဆိုပါမီးလောင်တဲ့သင်္ဘောမှာ စစ်ကောင်စီတပ်အတွက် ဆီတင်လာတာလို့ သတင်းအရင်းအမြစ်တွေရဲ့ ပြောဆိုချက်အရ သိရပြီး ဒီဗွီဘီအနေနဲ့ သီးခြားအတည်မပြုနိုင်သေးပါဘူး။
