ဆီရီယာလီယွန်နိုင်ငံရဲ့ မြို့တော်မှာ နိုဝင်ဘာ ၅ ရက်က လောင်စာဆီတင်ယာဉ်တစီး ကားတိုက်မှုအပြီး ပေါက်ကွဲခဲ့လို့ လူ ၉၉ ယောက်ထက်မနည်း သေဆုံးပြီး အယောက် ၁၀၀ ကျော် ဒဏ်ရာရခဲ့တယ်လို့ ဒေသခံ အာဏာပိုင်တွေက ပြောပါတယ်။
နိုဝင်ဘာ ၆ ရက် မနက်ပိုင်းထိ လောင်စာတင်ယာဉ်ကနေ လောင်စာဆီတွေ ယိုစိမ့်နေဆဲမို့ ရဲနဲ့ စစ်သားတွေက လမ်းပေါ်ကနေ လာကြည့်တဲ့လူအုပ်ကိုရှင်းဖို့ ကြိုးစားနေခဲ့ရတယ်လို့ ရိုက်တာ သတင်းထောက်က ပြောပါတယ်။
ဝယ်လင်တန်မြို့ ဖရီးတောင်းရပ်ကွက် အရှေ့ပိုင်းက လမ်းပေါ်မှာ မီးကျွမ်းနေတဲ့ အလောင်းတွေ၊ မီးလောင်ထားတဲ့ ကားတွေ မော်တော်ဆိုင်ကယ်တွေလည်း လမ်းပေါ် ပြန့်ကျဲနေပြီး ရာချီတဲ့ လူတွေလည်း စုရုံးနေကြပါတယ်။
လောလောဆယ်အထိ သေဆုံးသူ ၉၉ ယောက် ရှိပြီး လူ ၁၀၀ ကျော်ကို မြို့တော်တလွှားက ဆေးရုံ ဆေးခန်းတွေမှာ တင်ပို့ ကုသပေးထားတယ်လို့ ကျန်းမာရေးဒုဝန်ကြီး အမာရာဂျမ်ဘီယာက ရိုက်တာသတင်းဌာနကို ပြောပါတယ်။
ပျက်စီးသွားတဲ့ယာဉ်ကနေ ယိုစိမ့်လာတဲ့ လောင်စာတွေကို ယူဖို့ စုပြုံရောက်လာသူတွေ သေဆုံး ဒဏ်ရာရကုန်တာလို့ မြို့တော်ဝန်က ဖေ့စ်ဘွတ်လူမှုကွန်ရက်ပေါ်ကနေ ပြောပါတယ်။
အာဖရိကတိုက် ဆာဟာရဒေသမှာ လောင်စာဆီတင်ယာဉ်တွေ မတော်တဆဖြစ်လို့ ယိုဖိတ်လောင်စာ ယူဖို့ လာတဲ့လူတွေ ပေါက်ကွဲချိန် သေဆုံးတာမျိုး အရင်ကလည်း ဖြစ်ဖူးတယ်လို့ ရိုက်တာ သတင်းမှာ ဖော်ပြထားပါတယ်။
