ဆူဒန်ဝန်ကြီးချုပ် အဗ်ဒူလာဟမ်းဒေါ့ခ်ဟာ စစ်တပ်နဲ့ နိုင်ငံရေးအရ သဘောတူညီချက် အစိတ် အပိုင်းအနေနဲ့ ရာထူး ပြန်လက်ခံယူအပြီး သီတင်းပတ် ခြောက်ပတ် အကြာမှာ ရာထူးကနေ ပြန်နုတ်ထွက်လိုက်ပြီလို့ ဇန်နဝါရီ ၂ ရက်က ပြောပါတယ်။
အောက်တိုဘာလက စစ်တပ်က အာဏာသိမ်းတာကို ဆန့်ကျင်တဲ့ ဆန္ဒပြပွဲတွေ ဆက်တိုက် ပေါ်ပေါက်နေလို့ ဟမ်းဒေ့ါခ်ဟာ အစိုးရတရပ် မဖွဲ့နိုင်ခဲ့ပါဘူး။
ဆူဒန်မှာ ဒီမိုကရေစီပန်းတိုင်အတွက် နိုင်ငံရေးအသွင်ကူးပြောင်းဖို့ သဘောတူညီချက်တရပ် ရနိုင်ရေး စားပွဲဝိုင်း ဆွေးနွေးပွဲတရပ် လိုအပ်တယ်လို့ ဟမ်းဒေါ့ခ်က ပြောပါတယ်။
ဟမ်းဒေါ့ခ်ရဲ့ နုတ်ထွက်မှုကြောင့် ဆူဒန်နိုင်ငံရေး အနာဂတ်ဟာ မသေချာမှု ပိုနက်ရှိုင်းသွားခဲ့ပြီလို့ မီဒီယာတွေက သုံးသပ်ပါတယ်။
ဆူဒန်မှာ သက်တမ်းရှည်ခေါင်းဆောင် အိုမာအယ်လ်ဘတ်ရှားကို ဖြုတ်ချတဲ့ ဆန္ဒပြပွဲအပြီး သုံးနှစ်ကြာတဲ့အထိ နိုင်ငံရေးအခြေအနေ မတည်မငြိမ် ဖြစ်နေတာပါ။
ဘတ်ရှား ပြုတ်ကျအပြီး စစ်တပ်နဲ့ အရပ်သားတွေကြား အာဏာမျှဝေယူမယ့် သဘောတူညီချက် အောက်မှာ စီးပွားရေးပညာရှင်နဲ့ ကုလသမဂ္ဂအရာရှိဟောင်း ဟမ်းဒေါ့ခ်က ဝန်ကြီးချုပ် ဖြစ်လာခဲ့ပါတယ်။
အဲဒီနောက် အောက်တိုဘာ ၂၅ ရက်က အာဏာသိမ်းမှုအတွင်း စစ်တပ်က ဖြုတ်ချပြီး နေအိမ်အကျယ်ချုပ်ချခံထားရတဲ့ ဟမ်းဒေါ့ခ်ဟာ နိုဝင်ဘာလမှာ ဝန်ကြီးချုပ်အဖြစ် ပြန်ခန့်အပ်ခံခဲ့ရပါတယ်။
ဆူဒန်ဝန်ကြီးချုပ် အဗ်ဒါလာ ဟမ်းဒေါ့ခ်ဟာ လာမယ့် နာရီပိုင်းအတွင်း ရာထူးက နုတ်ထွက်ဖို့ ရည်ရွယ်ထားတယ်လို့ အမျိုးသားနိုင်ငံရေးနဲ့ ထောက်လှမ်းရေး တာဝန်ရှိသူတွေကို ပြောခဲ့တယ်လို့ ဟမ်းဒေါ့နဲ့ နီးကပ်တဲ့ သတင်းရင်းမြစ် ၂ ရပ်ကို ကိုးကားပြီး ဒီဇင်ဘာ ၂၂ ရက်နေ့ ရိုက်တာသတင်းမှာ ဖော်ပြပါတယ်။
ဟမ်းဒေါ့ခ်ဟာ အောက်တိုဘာလက စစ်တပ်ရဲ့ အာဏာသိမ်းတာခံရအပြီး နိုဝင်ဘာ ၂၁ ရက်မှာ ဝန်ကြီးချုပ် နေရာကို ပြန်ခန့်အပ်ခံထားရတာပါ။
အာဏာသိမ်းမှုကြောင့် နိုင်ငံရေးပါတီတွေကြား အသွင်ကူးပြောင်းရေး မဟာမိတ်ကဏ္ဍ အဆုံးသတ်ခဲ့ပါတယ်။
သဘောတူညီချက်ကို မူကြမ်းရေးရာမှာ နိုင်ငံရေးအင်အားစု အများအပြား ပါဝင်ခဲ့ပေမဲ့ ပါတီတွေနဲ့ သာမန်ပြည်သူတွေဆီက ဝေဖန်မှုကို ကျယ်ကျယ်ပြန့်ပြန့် ရင်ဆိုင်ခဲ့ရတယ်လို့ သတင်းရင်းမြစ်တွေ က ပြောပါတယ်။
ဒီဇင်ဘာ ၁၈ ရက်က ထောင်သောင်းချီနေတဲ့ ပြည်သူတွေဟာ စစ်အုပ်ချုပ်ရေးကိုရော ဝန်ကြီးချုပ်ရာထူးကို ပြန်လက်ခံတဲ့ ဟမ်းဒေါ့ရဲ့ ဆုံးဖြတ်ချက်ကိုပါ ပယ်ချရင်း သမ္မတ နန်းတော်ဆီကို ချီတက်ဆန္ဒပြခဲ့ကြပါတယ်။
ဟမ်းဒေါ့ကတော့ အသွင်ကူးပြောင်းရေးကာလအတွင်း ရသင့်တာတွေကို ထိန်းသိမ်းဖို့နဲ့ သွေးချောင်းစီးတာကို အဆုံးသတ်ဖို့ ရာထူးပြန် လက်ခံတာလို့ ပြောပါတယ်။
စစ်အုပ်ချုပ်ရေးကို ဆန့်ကျင်တဲ့ ဆန္ဒပြပွဲတွေကို စစ်တပ်က အကြမ်းဖက်နှိမ်နင်းလို့ လူ ၄၇ ဦး သေဆုံးခဲ့တာပါ။
အမျိုးသမီးနဲ့ မိန်းကလေး ၁၃ ယောက်ကို အုပ်စုဖွဲ့ အဓမ္မပြုကျင့်မှု အစီရင်ခံစာတွေ ရထားတယ်လို့ ကုလသမဂ္ဂက ဒီဇင်ဘာ ၂၁ ရက်က ပြောထားပါတယ်။
