ဧရာဝတီတိုင်း၊ ပုသိမ်မြို့အကျဉ်းထောင်တွင်းမှာ ဇန်နဝါရီ ၆ ရက် မနက်ပိုင်းက ဆူပူမှုဖြစ်ပွားနေတယ်လို့ ဒေသခံတွေက ပြောပါတယ်။

ဇန်နဝါရီ ၅ ရက်‌ ည ၈ နာရီလောက်က စတင်ကာ ဆူပူမှုခဏကြာဖြစ်ခဲ့ပြီး ဒီနေ့မနက် ၈ နာရီခွဲလောက် ထပ်ဖြစ်တဲ့အချိန်မှာ သေနတ်ပစ်ဖောက်သံတွေပါ ကြားရတယ်လို့ ဆိုပါတယ်။

မျက်မြင်တွေ့သူ ဒေသခံတဦးက “ညကလည်း အထဲကနေ အော်သံ‌တွေ ခဏကြားလိုက်ရတယ်။ ဒီနေ့မနက်ပိုင်း ထပ်ဖြစ်တာပေါ့။ ဒီနေ့မနက်ပိုင်းကတော့ ပိုကြမ်းတယ်။ ခုဆို သေနတ်ဖောက်တာ ၇ ချက်ရှိသွားပြီ။ တမြို့လုံးကရဲတွေလည်း ထောင်ထဲကိုဝင်သွားတာ တွေ့တယ်” လို့ ပြောပါတယ်။

ပုသိမ်မြို့က ဒေသခံတချို့လည်း ထောင်အနီးနားတဝိုက်မှာ လာရောက်ကြည့်ရှုတာကြောင့် စစ်ကောင်စီတပ်သားတွေက ထောင်ရှေ့မှာစောင့်နေပြီး ရဲတွေကတော့ ထောင်ထဲဝင်သွားတာ တွေ့ရတယ်လို့ ဆိုပါတယ်။

နိုင်ငံရေးအကျဉ်းသားတချို့ကို ထောင်ပိုင်အသစ်က ရိုက်ခိုင်းပြီး ထိုင်ကြည့်နေတာကြောင့် ဆူပူမှုတွေ စတင်ဖြစ်ပွားတာလို့ ထောင်နဲ့နီးစပ်သူတွေက ပြောဆိုပေမဲ့ ဒီဗွီဘီက သီးခြားအတည်မပြုနိုင်သေးပါဘူး။

ဇန်နဝါရီ ၄ ရက်က ပုသိမ်အကျဉ်းထောင်ကနေ နိုင်ငံရေးအကျဉ်းသား ၃၈ ဦးကို လွတ်ငြိမ်းချမ်းသာခွင့်နဲ့ ပြန်လွှတ်ပေးခဲ့ပေမဲ့ အကျဉ်းထောင်ထဲမှာ မကြာခဏဆိုသလို နိုင်ငံရေးအကျဉ်းသားတွေကို ဖိနှိပ်ညှဉ်းပန်းလေ့ရှိတယ်လို့ ပြန်လွတ်လာတဲ့သူတွေက ပြောပါတယ်။

ဧရာဝတီတိုင်း၊ လပွတ္တာမြို့မှာ ဇွန်လ ၂၄ ရက်နေ့ ညပိုင်းက မြို့မရဲစခန်းအတွင်း သေနတ်ပစ်ခတ်သံများထွက်ပေါ်ခဲ့တယ်လို့ သိရပါတယ်။

လပွတ္တာမြို့မရဲစခန်း အချုပ်မှာ ဆူပူမှုဖြစ်ပေါ်ခဲ့ရာကနေ ည ၉ နာရီခွဲလောက်မှာ သေနတ်သံ ၈ ချက်လောက်ထွက်ပေါ်လာတာလို့ ရဲတပ်ဖွဲ့နဲ့ နီးစပ်သူတွေက ပြောပါတယိ။

လပွတ္တာမြို့မရဲစခန်းက လုံခြုံရေးအရ အမည်မဖော်လိုတဲ့ ရဲဝန်ထမ်းတဦးက "တိုက်ပွဲဖြစ်တာမဟုတ်ပါဘူး အချုပ်ခန်းမှာ ဆူပူမှုဖြစ်လို့ သေနတ်ဖောက်တာပါ၊ အပြင်မှာ သတင်းထွက်နေသလို စခန်းကို လာတိုက်တာလည်း မဟုတ်ပါဘူး'' လို့ DVB ကို ပြောပါတယ်။

လူသတ်မှုနဲ့ အချုပ်ကျနေတဲ့ တရားခံနဲ့ အခြားအချုပ်သားတွေ ပြသနာဖြစ်ရာကနေ အချုပ်ခန်းဆူပူမှုဖြစ်လို့ သေနတ်ပစ်ဖောက်ရတာဖြစ်တာကြောင့် ထိခိုက်ဒဏ်ရာရတာမျိုးတော့ မရှိဘူးလို့ ဆိုပါတယ်။

လပွတ္တာမြို့မှာ စစ်တပ်အာဏာသိမ်းမှုအပြီး မြို့ပေါ်နေရာတော်တော်များများကို လုံခြုံရေးတင်းကြပ်ထားခဲ့သလို ရဲစခန်းထဲက သေနတ်သံကြားရတာ ပထမဆုံးဖြစ်တယ်လို့ သိရပါတယ်။