တရုတ်နဲ့ လုံခြုံရေးသဘောတူစာချုပ် လက်မှတ်ထိုးဖို့ ဆော်လမွန်ကျွန်းနိုင်ငံရဲ့ ဆုံးဖြတ်ချက်ဟာ ဒေသတွင်း ငြိမ်းချမ်းရေးကို ထိခိုက်စေမှာ မဟုတ်ဘူးလို့ ဆော်လမွန်ဝန်ကြီးချုပ်က လွှတ်တော်ကို ဧပြီ ၂၀ ရက်မှာ ပြောခဲ့ပါတယ်။

ဒီဆုံးဖြတ်ချက်ဟာ ဒေသတွင်း ငြိမ်းချမ်း ဟန်ချက်ညီရေးကို ဆိုးဆိုးရွားရွား လှိုက်စား ထိခိုက်ပျက်စီးစေမယ့်ဟာမျိုး မဟုတ်ဘူးဆိုတဲ့ အာမခံချက်နဲ့အညီ ဆော်လမွန်အစိုးရရဲ့ အချုပ်အခြာအာဏာ အကျိုးစီးပွားကို လေးစားဖို့ အိမ်နီးချင်းတွေ၊ မိတ်ဆွေတွေ၊ သူငယ်ချင်းတွေ အားလုံးကို တောင်းဆိုတယ်လို့လည်း ဝန်ကြီးချုပ်က ပြောခဲ့ပါတယ်။

ဒီသဘောတူစာချုပ်ကို နိုင်ငံ ၂ နိုင်ငံက နိုင်ငံခြားရေးဝန်ကြီးတွေ လက်မှတ်ရေးထိုးခဲ့တာလို့လည်း သူက အတည်ပြုခဲ့ပါတယ်။

ဆော်လမွန်ကျွန်းနဲ့ သဘောတူလက်မှတ်ထိုးတဲ့ ကိစ္စကို တရုတ်အစိုးရက ပုံမှန် သတင်းစာရှင်းလင်းပွဲမှာ ကြေညာခဲ့တာ ဖြစ်ပါတယ်။

အမေရိကန်သမ္မတ အိမ်ဖြူတော်ရဲ့ အင်ဒို-ပစိဖိတ်ဒေသ ညှိနှိုင်းဆောင်ရွက်ရေးမှူး ကာ့တ် ကမ့်ဘဲနဲ့ အမေရိကန်အစိုးရ အရှေ့အာရှနဲ့ ပစိဖိတ်ရေးရာ လက်ထောက်နိုင်ငံခြားရေးဝန်ကြီး ဒယ်နီယယ် ခရစ်တန် ဘရင့်ခ်တို့ဟာ ဆော်လမွန်ကျွန်းစုတွေဆီ ဒီသီတင်းပတ်ထဲမှာ ခရီးသွားမယ်လို့ အိမ်ဖြူတော်က ဧပြီ ၁၈ ရက်မှာ ပြောထားပါတယ်။

သူတို့ ၂ ဦး ခေါင်းဆောင်တဲ့ ကိုယ်စားလှယ်အဖွဲ့ထဲမှာ ကာကွယ်ရေးဝန်ကြီးဌာနနဲ့ နိုင်ငံတကာ ဖွံ့ဖြိုးတိုးတက်ရေး အေဂျင်စီတို့က အရာရှိတွေလည်းပါပြီး ဆော်လမွန်ကျွန်းနိုင်ငံ၊ ဖီဂျီနိုင်ငံနဲ့ ပါပူအာနယူးဂီနီ နိုင်ငံတွေဆီကို သွားရောက်လည်ပတ်မယ်လို့ အိမ်ဖြူတော် အမျိုးသားလုံခြုံရေးကောင်စီက ကြေညာချက် ထုတ်ပြန်ခဲ့တာပါ။

ပစိဖိတ်ကျွန်းနိုင်ငံဖြစ်တဲ့ ဆော်လမွန်နိုင်ငံဟာ တရုတ်နဲ့ လုံခြုံရေး သဘောတူစာချုပ်ကို လက်မှတ်ထိုးခဲ့လို့ စိုးရိမ်မှု တိုးလာချိန်မှာ ခုလို ခရီးစဉ် ထွက်ပေါ်လာတာပါ။

ကိုယ်စားလှယ်အဖွဲ့ဟာ ဟာဝိုင်ယီကျွန်းပေါ်မှာလည်း ရပ်နားမှာဖြစ်ပြီး အမေရိကန်ရဲ့ အင်ဒို-ပစိဖိတ် စစ်တိုင်းမှာ ဒေသတွင်းမိတ်ဘက်တွေ၊ အကြီးတန်း စစ်ရေးအရာရှိတွေနဲ့ တိုင်ပင် အကြံယူမယ်လို့လည်း ကြေညာချက်က ဆိုပါတယ်။ ခရီးစဉ်အတွက် ရက်စွဲတွေကိုတော့ မပြောခဲ့ပါဘူး။

ဆော်လမွန်ကျွန်း အရာရှိတွေနဲ့ ဆွေးနွေးမယ့် အကြောင်းအရာတွေထဲမှာ တရုတ်နဲ့ပတ်သက်တဲ့ စိုးရိမ်ချက်တွေလည်း ပါတယ်လို့ အမေရိကန် နိုင်ငံခြားရေးဌာန ပြောခွင့်ရ နဒ်ပရိုက်စ်က ပြောပါတယ်။

ဆော်လမွန် အစိုးရကတော့ သူ့နိုင်ငံထဲမှာ တရုတ်စစ်တပ် အခြေစိုက်စခန်း တည်ဆောက်ဖို့ ခွင့်ပြုမှာမဟုတ်ဘူးလို့ ပြောထားပါတယ်။ ဒါပေမယ့် တရုတ်ရဲ့ အဆိုပြု သဘောတူညီချက်တွေရဲ့ ကျယ်ပြန့်တဲ့ သဘောသဘာဝကြောင့် တရုတ်တပ်တွေ ဆော်လမွန်ကျွန်းတွေပေါ်မှာ တပ်ချဖို့ လမ်းပွင့်သွားမှာကို အမေရိကန် အရာရှိတွေက စိုးရိမ်နေဆဲလို့ ပရိုက်စ်က ပြောခဲ့ပါတယ်။

တရုတ်ဟာ ၂၀၁၈ ခုနှစ်တုန်းက ပါပူအာ နယူးဂီနီမှာ ရေတပ်အခြေစိုက်စခန်းကို ပြန်တိုးတက်အောင် လုပ်ဖို့ ကမ်းလှမ်းခဲ့ဖူးပါတယ်။ ဒါပေမယ့် ဩစတြေးလျနိုင်ငံရဲ့ အနီးကပ်ဆုံး မြောက်ပိုင်းအိမ်နီးချင်းဖြစ်တဲ့ ပါပူအာ နယူးဂီနီကတော့ စခန်းကို တရုတ်အစား ဩစတြေးလျကို တည်ဆောက်ခွင့်ပေးဖို့ ဆုံးဖြတ်ခဲ့ပါတယ်။