ဆွစ်ဇာလန်ဘဏ် Credit Suisse မှာ အပ်နှံထားတဲ့ ဂျော်ဒန်ဘုရင် အဘ်ဒူလာရဲ့ ငွေကြေးစာရင်းတွေ ပေါက်ကြားမှုဟာ မှားယွင်းတဲ့၊ မတိကျတဲ့ သတင်းအချက်အလက်တွေသာ ဖြစ်ကြောင်း ဂျော်ဒန်ဘုရင့်နန်းတော်က ထုတ်ပြန်ကြေညာပါတယ်။

၁၉၄၀ နဲ့ ၂၀၁၀ ခုနှစ်ကာလအတွင်း ဆွစ်ဇာလန်ဘဏ် Credit Suisse မှာ လျှို့ဝှက်အပ်နှံထားတဲ့ ဘဏ်အကောင့် ထောင်ကျော်ရဲ့ စာရင်းအသေးစိတ်ကို ပြီးခဲ့တဲ့ ဖေဖော်ဝါရီ ၂၀ ရက်က နိုင်ငံတကာ မီဒီယာတွေ အတော်များများမှာ ဖော်ပြခဲ့တာပါ။ 

အဲဒီဖွင့်ချတဲ့စာရင်းမှာ ဂျော်ဒန်ဘုရင်ဟာ ဆွစ်ဖရန်စ်ငွေ သန်းများစွာကို ဘဏ်အကောင့် ၆ ခုနဲ့ အပ်နှံတယ်လို့ ဖော်ပြထားပါတယ်။ 

နောက် ဂျော်ဒန်ဘုရင်က ပုံမှန်စီးနေကျ ဂျက်တိုက်လေယာဉ်ငယ်ကို ဒေါ်လာ ၂၁၂ သန်း တန်ကြေးရှိ အဲယားဘတ်စ်လေယာဉ်နဲ့ အစားထိုးခဲ့တယ်လို့ ဆိုပါတယ်။

ဘုရင့်နန်းတော်ကတော့ အဆိုပါပေါက်ကြားတဲ့စာရင်းတွေဟာ မှားယွင်းဖော်ပြတဲ့ အချက်အလက်တွေဖြစ်ပြီး ဘုရင့်အပေါ် အကြည်အညိုပျက်အောင် လုပ်တာလို့ ကြေညာချက် ထုတ်ပြန်ခဲ့တာပါ။