တနင်္သာရီတိုင်း ထားဝယ်မြို့နယ်၊ ဇဟာရွာမှာ ခရီးသည်တင်ယာဉ်တစီး တိမ်းမှောက်ခဲ့တာကြောင့် အမျိုးသမီး ၁ ဦး သေဆုံး၊ ၄ ဦး မစိုးရိမ်ရ ဒဏ်ရာရခဲ့တယ်လို့ သွားရောက်ကူညီပေးခဲ့တဲ့ လူမှုကူညီကယ်ဆယ်ရေးအဖွဲ့တွေက ပြောပါတယ်။

မော်လမြိုင်မြို့မှ ထားဝယ်မြို့ကိုလာတဲ့ ထွန်းရွှေမြင့်မိုရ်ယာဉ်လိုင်းမှ အန်စာတုံး အမျိုးအစား မော်တော်ယာဉ်တစီးဟာ နိုဝင်ဘာ ၃၀ ရက် ညနေ ၄ နာရီလောက် ဇဟာရွာအရောက်မှာ တိမ်းမှောက်ခဲ့တာလို့ ဆိုပါတယ်။ 

“မိုးကလည်းရွာထားတော့ လမ်းချော်တဲ့ပုံစံမျိုးနဲ့ အရှိန်ထိန်းမနိုင်ဘဲ လမ်းဘေးထိုးကျသွားတာ။ အသက် ၅၀ အရွယ် အမျိုးသမီးတယောက်ကတော့ ကားနဲ့ပိသွားတာ မနည်းဆွဲထုတ်ရတယ်။ ကျန်တဲ့လူတွေက ကားမှောက်ပြီးတာနဲ့ အနီးအနားက အိမ်တွေက လာခေါ်ကြပြီး ပြုစုတာတွေ လုပ်ပေးနေတယ်၊ လူနာတင်ယာဉ်တွေရောက်တော့ ဆေးရုံကြီးကို ခေါ်သွားကြတယ်” လို့ မျက်မြင်တွေ့ရှိခဲ့တဲ့ ဒေသခံတဦးက ပြောပါတယ်။

ကားပေါ်မှာ အမျိုးသား ၁ ဦး နဲ့ အမျိုးသမီး ၆ ဦး စုစုပေါင်း ၇ ဦး လိုက်ပါလာပြီး ယာဉ်လိုင်းခရီးစဉ်မဟုတ်ဘဲ စင်းလုံးဖြတ်ငှားလာတာလို့ သိရပါတယ်။

ဒဏ်ရာရရှိတဲ့ အမျိုးသမီး ၄ ဦးကိုတော့ ထာဝယ်မြို့နယ်မီးသတ်၊ ကြက်ခြေနီနဲ့ ဇမ္ဗူသီရီအဖွဲ့က ပူးပေါင်းကူညီကယ်ဆယ်ရေးတွေ ပြုလုပ်ပေးခဲ့ပြီး ထားဝယ်ဆေးရုံကြီးကို ပို့ဆောင်ပေးခဲ့ပါတယ်။

အခုနှစ် စက်တင်ဘာလတုန်းကလည်း ဇဟာရွာ ထားဝယ်ဖားအောက်တောရ အဝင်လမ်းအနီးမှာ ခရီးသည်တင်မှန်လုံယာဉ်တစီး တိမ်းမှောက်သွားပြီး ယာဉ်နောက်လိုက်တဦး ဒဏ်ရာရခဲ့ပါသေးတယ်။

ရေး-ထားဝယ် ကားလမ်းပိုင်း ထားဝယ်မြို့အဝင်အနီး မောင်မယ်ရှောင်ရွာနဲ့ ဇဟာရွာအကြားမှာ ရေဖြူဘက်ကလာတဲ့ ကား ၂ စီးပါ စစ်ကောင်စီယာဉ်တန်းကို ထားဝယ်ပြောက်ကျားတော်လှန်ရေး တပ်ဖွဲ့ DGRF က စက်တင်ဘာလ ၁၀ ရက် ညနေ ၅ နာရီမှာ မိုင်းဆွဲတိုက်ခိုက်ခဲ့ပါတယ်။

မိုင်းဆွဲခံရမှုကြောင့် စစ်ကောင်စီတပ်သား အထိခိုက်အကျဆုံးရှိနိုင်ပြီး အတိအကျကို အတည်မပြုနိုင်ဘူးလို့ DGRF က ပြောပါတယ်။

စစ်ကောင်စီတပ်က ပစ်ခတ်မှုကြောင့် လမ်းသွားလမ်းလာ နှစ်ဦး မစိုးရိမ်ရ ဒဏ်ရာရရှိပြီး ဆေးရုံပို့ထားရတယ်လို့ ဒေသခံတွေက ပြောပါတယ်။

မောင်မယ်ရှောင် ကားလမ်းပိုင်းမှာ ပြီးခဲ့တဲ့သြဂုတ်လအတွင်း စစ်ကောင်စီယာဉ်တန်းတွေ ၃ ကြိမ် ထက်မနည်း မိုင်းဆွဲခံခဲ့ရပါတယ်။

အဲဒါကြောင့် ပြည်သူတွေအနေနဲ့ စစ်ကောင်စီ ယာဉ်တန်းတွေနဲ့ ကပ်မလိုက်ကြဖို့ ထားဝယ်ပြောက်ကျား တော်လှန်ရေးတပ်ဖွဲ့က သတိပေးထားပါတယ်။