မွန်ပြည်နယ်၊ ရေးမြို့နယ်၊ ဇီးဖြူသောင်ကျေးရွာအုပ်ချုပ်ရေးမှူးရုံးကို ဧပြီ ၁၁ ရက်နေ့ မွန်းလွဲ ၂ နာရီခွဲလောက်မှာ ရေးပြောက်ကျား YGF အဖွဲ့က ဝင်ရောက်ပစ်ခတ်ခဲ့ပါတယ်။

တိုက်ခိုက်မှုကြောင့် အုပ်ချုပ်ရေးမှူးရုံးက စစ်ကောင်စီလက်အောက်ခံပြည်သူ့စစ် ၃ ယောက် သေဆုံးခဲ့ပြီး AK ၂ လက်အား သိမ်းဆည်းရရှိခဲ့တယ်လို့ ရေးပြောက်ကျား YGF ဗိုလ်ကျန်ရစ် က ပြောပါတယ်။

တိုက်ခိုက်မှုဖြစ်စဉ်အတွင်း အုပ်ချုပ်ရေးမှူးရုံးမှာ အလုပ်လုပ်နေတဲ့ ၁၄ နှစ်အရွယ် ကောင်းလေးတယောက်လည်း သေဆုံးခဲ့တယ်လို့ မိသားစုနဲ့နီးစပ်တဲ့သူတွေက ပြောပါတယ်။

“အခင်းဖြစ်နေတဲ့အချိန်မှာ စစ်ဆင်ရေးပစ်မှတ်အနီးနားမှာရှိနေတာ သူက ထပြေးလိုက်တော့ မသိဘူးလေ။ စစ်တပ်ဘက်ကပဲ ယူဆပြီး အချိန်ကမရတာကြောင့် ပစ်ခတ်ခံရတဲ့အထဲမှာ ပါသွားတယ်။ သူ့ကို ပြည်သူဖြစ်မှန်းသေပြီးမှ သိရတယ်။ နောက်ဆို စစ်ကောင်စီအပေါင်းပါတွေအနားမှာမနေကြဖို့ လူထုကိုသတိပေးချင်ပါတယ်” လို့ ဗိုလ်ကျန်ရစ်က ပြောပါတယ်။

ရေးမြို့နယ် အဝင်ထွက်အားလုံးကို စစ်ကောင်စီတပ်က လုံခြုံရေးပိတ်ဆို့တင်းကျပ်ထားတဲ့ အခုလို ကျေးရွာအုပ်ချုပ်ရေးမှူးရုံးကို ဝင်ရောက်တိုက်ခိုက်ခဲ့တာလို့ ဆိုပါတယ်။

စစ်ကောင်စီတပ်နဲ့ ဒေသကာကွယ်ရေးတပ်တွေဟာ ရေးမြို့နယ်ထဲမှာ မကြာခဏဆိုသလို တိုက်ပွဲတွေ ဖြစ်ပွားနေပါတယ်။

ပဲခူးတိုင်း၊ ပဲခူးခရိုင်၊ ကဝမြို့နယ် ရှမ်းကန်-သပြုလမ်းမှာ ဆက်ကြေးလာကောက်တဲ့ စစ်ကောင်စီလက်အောက်ခံ ကဝမြို့မရဲစခန်းမှ ရဲတပ်ဖွဲ့ဝင် ၂ ဦးအား ကဝမြို့နယ်ပကဖ က ပိတောက်ဖူးစစ်ဆင်‌ရေးအဖြစ် ဧပြီ ၁၁ ရက် မနက် ၁၀ နာရီခွဲလောက် ပစ္စတိုနဲ့ အနီးကပ် ပစ်ခတ်ခဲ့ရာ ၁ ဦးသေဆုံးခဲ့တယ်လို့ ကဝမြို့နယ် ပကဖက ပြောပါတယ်။

ဆိုင်ကယ်စီး စစ်ကောင်စီရဲတပ်ဖွဲ့ ၂ ဦးအား ကဝမြို့နယ်ပကဖ တော်လှန်ရေးရဲဘော် ၂ ဦးက အနီးကပ် ပစ်ခတ်ခဲ့တာဖြစ်ပြီး ဆိုင်ကယ်နောက်မှာ ထိုင်လာတဲ့ ရဲတပ်ဖွဲ့ဝင် သေဆုံးသွားပြီး ကျန်တဦးက မောင်းပြေးသွားတယ်လို့ ဆိုပါတယ်။

ကန့်ဘလူမြို့နယ်၊ ပဇီကြီးကျေးရွာကို စစ်ကောင်စီက လေကြောင်းနဲ့ ရက်စက်ယုတ်မာစွာ တိုက်ခိုက်ခဲ့မှုအတွက် ကဝမြို့နယ်ပြည်သူ့ကာကွယ်ရေးတပ်ဖွဲ့အနေနဲ့ စစ်ကောင်စီနဲ့ ဒေါက်တိုင်တွေကို ပြင်းပြင်းထန်ထန် လက်တုံ့ပြန်တိုက်ခိုက်သွားမယ်လို့ ပြောပါတယ်။

ပြည်သူတွေအနေနဲ့ စစ်ကောင်စီက ကျင်းပမယ့်သင်္ကြန်ကို သပိတ်မှောက်ဆန့်ကျင်ပြီး တော်လှန်သင်္ကြန်ဆင်နွှဲကြဖို့လည်း ကဝမြို့နယ် ပကဖ က တိုက်တွန်းလိုက်ထားပါတယ်။

ကဝမြို့နယ်ထဲမှာ စစ်ကောင်စီတပ်ဖွဲ့ဝင်တွေ မကြာခဏဆိုသလို အလစ်ငိုက်တိုက်ခိုက်ခံနေရပြီး အကျအဆုံး များတယ်လို့ ဒေသခံတွေက ပြောပါတယ်။

မွန်ပြည်နယ်  ရေးမြို့နယ် ဇီးဖြူသောင်ကျေးရွာ ရဲကင်းစခန်းကို အောက်တိုဘာ ၁၇ ရက်နေ့ ညနေမှာ အမည်မသိ သေနက်သမားတွေ ဝင်ရောက်ပစ်ခတ်ခဲ့ကြတယ်လို့ ဒေသခံတွေက ပြောပါတယ်။ 

“ပစ်ခတ်တာပဲ ကြားတယ်၊ ဘယ်သူတွေ ဝင်ပစ်တာလဲမသိဘူး။ ရဲ ၃ ဦး ထိခိုက်ကျဆုံးတာပဲ ကြားရတယ်။ ပစ်တဲ့အဖွဲ့က ထိခိုက်တာ၊ လူတွေ ထိခိုက်တာ မကြားရသေးဘူး”လို့ ဒေသခံတဦးက ပြောပါတယ်။ 

ပစ်ခတ်မှုအပြီးမှာ ဇီးဖြူသောင်ကျေးရွာ အဝင်အထွက်လမ်း အားလုံးကို စစ်ကောင်စီတပ်ဘက်မှ ပိတ်ဆို့ထားပြီး လုံခြုံရေးပါ တင်းကျပ်ထားတယ်လို့ ဆိုပါတယ်။ 

အခုဖြစ်စဉ်မှာ ရဲစခန်းကို ပထမဆုံးအကြိမ် ဝင်ရောက် ပစ်ခတ်တာဖြစ်ပြီး ဘယ်အဖွဲ့အစည်းက လုပ်ဆောင်ခဲ့တယ်ဆိုတာ မသိရသေးလို သတင်းထုတ်ပြန်တာလည်း မရှိသေးပါဘူး။ 

ဖြစ်စဉ်နဲ့ပတ်သက်ပြီး စစ်ကောင်စီလက်အောက်ခံ ရဲတပ်ဖွဲ့ဝင်တွေကို ထပ်မံ အတည်ပြုချက်ရယူဖို့ ဆက်သွယ်မေးမြန်းလို့ မရသေးပါဘူး။