စစ်ကိုင်းတိုင်း၊ ကန့်ဘလူမြို့နယ်၊ ဇော်ချောင်းကျေးရွာကို နိုဝင်ဘာ ၃၀ ရက်နေ့ မနက် ၁၁ နာရီလောက် စစ်ကောင်စီတပ်က စစ်ကြောင်းထိုး ဝင်ရောက်မီးရှို့ခဲ့တဲ့အတွက် နေအိမ် ၂၀ နဲ့ ကျေးရွာမီးရထားဘူတာရုံ မီးလောင်သွားတယ်လို့ ဒေသခံတွေက ပြောပါတယ်။

အင်အား ၅၀ ကျော်ပါစစ်ကောင်စီတပ်ဖွဲ့ဟာ မနေ့မနက်က သင်တောကျေးရွာမှတဆင့် ဇော်ချောင်းကျေးရွာကို စစ်ကြောင်းထိုးဝင်ရောက်လာပြီး မီးရှို့ခဲ့တာလို့ ဆိုပါတယ်။

“ကိုးတောင်ဘို့ရွာမှာ အထိုင်ချထားတဲ့ ခမရ ၃၆၃ တပ်ရင်းကပါ။ သင်တောရွာမှာ ၃ ရက်လောက် ညအိပ်တပ်စွဲထားရာကနေ ဇော်ချောင်းရွာဘက်ကို ပစ်ခတ်ဝင်လာပြီး မီးရှို့သွားတာ။ မီးရထားဘူတာရုံလည်း မီးထဲပါသွားတယ်။ ရွာကဒေသခံတွေကတော့ သူတို့‌တွေ ဝင်လာပြီဆိုတာ သိလို့ အရင်ပြေးရတာ။ လက်ရှိမှာ စစ်ရှောင်တွေအနေနဲ့ကတော့ တောထဲမှာပဲ တဲထိုးနေကြရတာပေါ့ဗျာ” လို့ ဒေသခံတဦးက ပြောပါတယ်။

စစ်ကောင်စီတပ်က အိမ်ခြေ ၂၀၄ လုံးရှိတဲ့ ဇော်ချောင်းကျေးရွာကို မီးရှို့တာ အခုအကြိမ်နဲ့ဆို ၆ ကြိမ်မြောက်ရှိပြီဖြစ်ပြီး နေအိမ်စုစုပေါင်း ၁၆၅ လုံး ဆုံးရှုံးခဲ့တယ်လို့ ဆိုပါတယ်။

ပြီးခဲ့တဲ့ နိုဝင်ဘာ ၂၁ နေ့ကနေ ၂၄ ရက်နေ့အတွင်း ကန့်ဘလူမြို့နယ်ရှိ ကျောက်တိုင်၊ ကျီစု၊ ဖိုလ်ကုန်း၊ သောက္ကန်ကျေးရွာတွေကို စစ်ကောင်စီတပ် မီးရှို့ခဲ့တာကြောင့် လူနေအိမ်ခြေ စုစုပေါင်း ၈၆၀ ကျော် မီးလောင်ဆုံးရှုံးခဲ့ရပြီး သက်ကြီးရွယ်အို ၂ ဦးအပါဝင် စုစုပေါင်း ဒေသခံပြည်သူ ၅ ဦးလည်း သတ်ဖြတ်ခံခဲ့ရပါတယ်။

ကန့်ဘလူမြို့နယ်အတွင်းက ကျေးရွာတွေကို စစ်ကောင်စီတပ်ဖွဲ့အနေနဲ့ ဆက်တိုက်စစ်ကြောင်းထိုး မီးရှို့နေတာကြောင့် စစ်ရှောင်ပြည်သူ သောင်းနဲ့ချီ ထွက်ပြေးတိမ်းရှောင်နေရပါတယ်။

စစ်ကိုင်းတိုင်း၊ ကန့်ဘလူမြို့နယ်မြောက်ခြမ်းက ဇော်ချောင်းရွာကို အောက်တိုဘာ ၂၄ ရက် မနက် ၁၁ နာရီကျော်မှာ စစ်ကောင်စီတပ်က မီးရှို့နေတယ်လို့ ဒေသခံရပ်ကျေး  ပြည်သူ့ကာကွယ်ရေးအဖွဲ့ တွေက ပြောပါတယ်။

မီးရှို့တဲ့ စစ်ကောင်စီတပ်ဟာ ဝက်သဲအင်းရွာက ထွက်လာတဲ့ ခမရ-၃၆၃ ကိုးတောင်ဘို့ အထိုင်တပ်ဖြစ်တယ်လို့လည်း ဒေသခံတွေက ပြောပါတယ်။

ဒေသခံရွာသား တဦးက “ရွာက အိမ်ခြေ ၁၈၀ ရှိတယ်။ သူတို့ လာပြီဆိုကတည်းက ရွာသားတွေ အကုန်ထွက်ပြေး နေရတယ်။ အရင်တုန်းကလည်း ရွာကို မီးရှို့တယ်။ အခုလည်း မီး ထပ်ရှို့ နေတယ်။ မီးခိုးတွေကို အဝေးကနေ မြင်နေရတယ်။  ရွာထဲက အခုထိ မထွက်သေးလို့ မီးလောင် အရေအတွက်ကို မပြောနိုင်သေးဘူး”လို့ ပြောပါတယ်။

စစ်ကောင်စီတပ်ရဲ့ မီးရှိုမှုကြောင့် ၄ ကြိမ်မြောက်အထိ ရွာရှိ နေအိမ် ၁၃၉ လုံး ဆုံရှုံးခဲ့ပြီး နေအိမ် အလုံး ၄၀ ကျော်ကျန်နေတာကြောင့် အခုထပ်ပြီး မီးရှို့တာဖြစ်တယ်လို့ သိရပါတယ်။ 

စစ်ကောင်စီတပ်က ဒေသတွင်းစစ်ကြောင်းထိုးနေပြီး ကျေးရွာတွေကို လက်နက်ကြီးနဲ့ ပစ်ခတ်နေတာကြောင့် ဇော်ချောင်းရွာသားတွေအပြင် အနီးဝန်းကျင်က ဒေသခံရွာသား ထောင်နဲ့ချီ ဘေးလွတ်ရာ ထွက်ပြေးနေကြရတယ်လို့လည်း ဒေသခံတွေက ပြောပါတယ်။

ဒီနေ့ ​မနက်ပိုင်းကလည်း အိမ်​ခြေ ၁၅၀ ​ကျော်ရှိတဲ့ ကန့်ဘလူမြိုနယ် ဉာဏ်အင်း​ကျေးရွာကို စစ်ကောင်စီတပ်တွေ မီးရှို့ခဲ့သေးတယ်လို့လည်း ဒေသခံတွေက ဆိုပါတယ်။