စစ်တပ်အာဏာသိမ်းပြီးနောက်ပိုင်း ကရင်ပြည်နယ်ရဲ့ အထင်ကရ နေရာတခုဖြစ်တဲ့ ဇွဲကပင် တောင်ကို ခရီးသွားလာရောက်လည်ပတ်မှုနဲ့ တောင်ပေါ် လာရောက်တဲ့သူ ဦးရေ များစွာ ကျဆင်း သွားတယ်လို့ ဇွဲကပင်တောင်ဂေါပကအဖွဲ့ကနေ သိရပါတယ်။
စစ်အာဏာမသိမ်းခင်က တရက်ကို တောင်ပေါ်တက်သူဦးရေ ၁၅၀ ကျော်ရှိခဲ့ပြီး အခုခါမှာတော့ တရက်ကို ၁၀ ယောက်လောက်သာ လာရောက်တော့တယ်လို့ ဆိုပါတယ်။
အဲဒီလို လူလာနည်းတဲ့အတွက် တောင်ပေါ်မှာရှိတဲ့ မျောက်တွေကို အစာကျွေးတဲ့သူလည်း နည်းလာသလို တောင်တက်သူ အနည်းအကျဉ်းကလည်း ကျန်းမာရေး လိုက်စားတဲ့ ဒေသခံတွေနဲ့ အနီးနားမြို့တွေက လူတွေသာ လာရောက်ကြတယ်လို့ ပြောပါတယ်။
ဒါ့အပြင် ဇွဲကပင်တောင်ကို အမှီပြုပြီး ဈေးရောင်းနေတဲ့ ဈေးသည်တွေလည်း ဒေသထွက် ရိုးရာ အစားအစာနဲ့ အဝတ်ထည်၊ အသုံးဆောင်ပစ္စည်းတွေ မရောင်းရတော့တာကြောင့် ဆိုင်ခန်းတွေ ပိတ်ပြီး ထိုင်းနိုင်ငံထဲမှာ အလုပ်သွားရောက်လုပ်ကိုင်ဖို့ စဉ်းစားထားတယ်လို့ ဈေးသည်တဦးက ပြောပါတယ်။
ဇွဲကပင်တောင်ဟာ ကရင်ပြည်နယ် ဘားအံမြို့မှာတည်ရှိပြီး ပင်လယ်ရေ မျက်နှာပြင်အထက် ၂,၃၆၉ ပေ မြင့်ကာ မြန်မာနိုင်ငံရဲ့ အထင်ကရ တောင်တခုဖြစ်သလို ကရင်လူမျိုးတွေရဲ့ ရာဇ၀င်သမိုင်းကြောင်းတွေနဲ့ ပြည့်နှက် ကျော်ကြားတဲ့ တောင်တခုလည်း ဖြစ်ပါတယ်။
ကရင်ပြည်နယ်၊ ဘားအံမြို့၊ ဇွဲကပင်တောင်တက်လမ်းမှာ အမျိုးသမီးငယ်သေဆုံးမှုနဲ့ ထွက်ပြေးတိမ်းရှောင်နေတဲ့ အဖော်အမျိုးသားကို ဧပြီ ၂ ရက် ည ၉ နာရီခွဲလောက်မှာ တိုင်းရင်းသားလက်နက်ကိုင်အဖွဲ့တခုက ဖမ်းဆီးရမိခဲ့တယ်လို့ သိရပါတယ်။
အဆိုပါ အမျိုးသားကို ကြာအင်းဆိပ်ကြီးမြို့နယ်မှာ ကေအန်ယူ၊ ကရင်အမျိုးသားလွတ်မြောက်ရေးတပ်မတော် (ငြိမ်းချမ်းရေးကောင်စီ) KNU KNLA(PC) တပ်ဖွဲ့ဝင်တွေက ဖမ်းဆီးရမိခဲ့တာဖြစ်ပြီး ဘားအံမြို့နယ်၊ ထုံးအိုင်နယ်မြေရဲစခန်းကို လွှဲပြောင်းပေးခဲ့တယ်လို့ သိရပါတယ်။
KNU KNLA(PC) တာဝန်ရှိသူက "မနေ့ညကပဲ ကျနာ်တို့ တပ်ဖွဲ့ဝင်တွေက လူသတ်မှုနဲ့ မသင်္ကာတဲ့ သူကို တွေ့ထားတယ်ဆိုပြီး သတင်းလှမ်းပို့တယ်။ ဒါနဲ့ ကျနော်တို့တပ်ဖွဲ့ဝင်တွေက သွားရောက်ဖမ်းဆီးပြီး ညတွင်းချင်းပဲ သက်ဆိုင်ရာရဲတပ်ဖွဲ့ကို လွှဲပြောင်းပေးလိုက်ပြီ” လို့ ပြောပါတယ်။
အဆိုပါ ဖမ်းဆီးရမိတဲ့ အမျိုးသားဟာ ဘားအံမြို့နယ်၊ နွားခြံကုန်းကျေးရွာနေ တမီလ်လူမျိုး ဒယ်ကလစ်ဆိုသူဖြစ်ပြီး ထုံးအိုင်နယ်မြေရဲစခန်းက ပထမသတင်းပေးတိုင်ကြားချက် လူသတ်မှု ၃၀၂ နဲ့ အမှုဖွင့်အရေးယူထားပြီး အမှုတည်ဆောက်နိုင်ဖို့ စစ်ဆေးနေတယ်လို့ ရဲတပ်ဖွဲ့နဲ့နီးစပ်သူဆီက သိရပါတယ်။
သေဆုံးသူ၊ ဖမ်းဆီးရမိတဲ့ အမျိုးသားနဲ့ ပတ်သက်ပြီး ထုံးအိုင်နယ်မြေရဲစခန်းကို ဆက်သွယ်ပေးမယ့် လက်ခံဖြေဆိုတာ မရှိပါဘူး။
အဆိုပါ သေဆုံးသူအမျိုးသမီးဟာ ဘားအံမြို့ နယ်၊ ဘားကပ်၊ တောကြီးကုန်းကျေးရွာမှ ာနေထိုင်တဲ့ အသက် ၂၀ နှစ်အရွယ် မဇာခြည်လှိုင်ဖြစ်ပြီး ဒုတိယနှစ် (သင်္ချာ) ကျောင်းသူဖြစ်ပါတယ်။
မတ် ၃၀ ရက်က ဇွဲကပင်တောင်ပေါ်ကို ဘုရားဖူးလာရင်း ပျောက်ဆုံးနေတဲ့ အမျိုးသမီးကို ဇွဲကပင်တောင်တက်လမ်း၊ အထက်ရေတံခွန်အလွန်၊ ဘုရားလေးအနီးရှိ မရမ်းပင်အောက်မှာ ဦးခေါင်းမှာ ထိခိုက်ဒဏ်ရာတွေရရှိထားပြီး သစ်ရွက်တွေနဲ့ ဖုံးအုပ်လျက်သား ကယ်ဆယ်ရေးအဖွဲ့တွေက ပြန်လည်တွေ့ရှိခဲ့တာပါ။
ပြီးခဲ့တဲ့ ၂၀၁၇ ခုနှစ်က နိုင်ငံခြားသားခရီးသွား ၁ ဦး၊ ၂၀၂၀ ခုနှစ်မှာ ဒေသခံ ဘားအံတက္ကသိုလ်ကျောင်းသူ ၁ ဦး၊ ကျောင်းသား ၁ ဦး တောင်ပေါ်က ပြုတ်ကျသေဆုံးခဲ့ပါတယ်။
ဇွဲကပင်တောင်ဟာ ပင်လယ်ရေမျက်နှာပြင်အထက် ၂၃၇၂ ပေမြင့်ပြီး ကရင်ပြည်နယ်ရဲ့ အထွဋ်အမြတ်ထားရာ သမိုင်းဝင်ဆံတော်ရှင်ဘုရားတည်ရှိသလို့ ပြည်တွင်း၊ ပြည်ပ ခရီးသွားတွေ အများဆုံးလာရောက်လည်ပတ်တဲ့ အထင်ကရတောင်ဖြစ်ပြီး တောင်ပေါ်ကို တောင်ရဲ့အရှေ့ခြမ်း ခလောက်နို့ကျေးရွာနဲ့ တောင်ရဲ့အနောက်ခြမ်း တော်ပုံကျေးရွာကနေ တက်ရောက်နိုင်ပါတယ်။
