ပဲခူးတိုင်း၊ ညောင်လေးပင်မြို့နယ်၊ ညောင်လေးပင်-မဒေါက် ကားလမ်းပေါ်က ရေကြည်ချောင်းတံတားကို ဧပြီ ၃၀ ရက် ည ၁၂ နာရီလောက်မှာ တော်လှန်ရေးပူးပေါင်းအင်အားစုတွေက မိုင်းခွဲဖျက်ဆီးခဲ့တယ်လို့ ညောင်လေးပင်မြို့နယ် ပြည်သူ့ကာကွယ်ရေးတပ်ဖွဲ့က မေ ၁ ရက်နေ့မှာ ထုတ်ပြန်ထားပါတယ်။

အဲဒီတံတားဟာ စစ်တောင်းမြစ်အရှေဘက်ရှိ စစ်ကောင်စီရဲ့ ရွှေကျင်ဗျူဟာစခန်းနဲ့ အဓိကဆက်သွယ်ထားတာဖြစ်လို့ ဖြတ်တောက်ရှင်းလင်းရေးဗျူဟာအရ ဖောက်ခွဲ ဖျက်ဆီးခဲ့တာလို့ ဆိုပါတယ်။

အဲဒီတံတားကို ဖောက်ခွဲဖျက်ဆီးခဲ့တာနဲ့ပတ်သက်လို့ အသေးစိတ်သိရှိနိုင်အောင် ညောင်လေးပင်မြို့နယ် ပြည်သူ့ကာကွယ်ရေးတပ်ဖွဲ့ကို ဆက်သွယ်ခဲ့ပေမယ့် “ကျနော်တို့က ERO နဲ့ တွဲထားလို့ ပြောရေးဆိုခွင့်မရှိဘူး” လို့ ညောင်လေးပင်မြို့နယ် ပြည်သူ့ကာကွယ်ရေးတပ်ဖွဲ့ရဲ့ တာဝန်ရှိသူတယောက်က ပြန်လည်ဖြေကြားခဲ့ပါတယ်။

ပဲခူးတိုင်း၊ ညောင်လေးပင်မြို့နယ်၊ ညောင်ပင်ကြီးကျေးရွာနဲ့ ပုဇွန်ချောင်းကျေးရွာမှာ ဖေဖော်ဝါရီ ၂၂ ရက် ဒီမနက် ၅ နာရီခွဲလောက်က စစ်ကောင်စီတပ်က လက်နက်ကြီးနဲ့ ကျေးရွာတွေအတွင်းကို ပစ်ခတ်လို့ ဒေသခံပြည်သူ ၃ ဦး ထိမှန်သေဆုံးခဲ့သလို ဘုန်းကြီးကျောင်းတစ်ကျောင်း လည်း ထိမှန် ပျက်စီးခဲ့တယ်လို့ ဒေသခံတွေက ပြောပါတယ်။

မနက် ၅ နာရီလောက်က စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့တို့ တိုက်ပွဲဖြစ်ပွားခဲ့ရာ စစ်ကောင်စီတပ်က ကျေးရွာတွေအတွင်းကို လက်နက်ကြီးနဲ့ပစ်ခတ်ခဲ့တာဖြစ်ပြီး နှစ်ဖက်တိုက်ပွဲအတွင်း စစ်ကောင်စီတပ်ဖွဲ့ဝင် ၁၀ ယောက်လောက် သေဆုံးခဲ့တယ်လို့ ဆိုပါတယ်။

ကရင်လူမှုရေးရာအဖွဲ့တာဝန်ရှိသူက"လက်နက်ကြီးထိလို့ ထိမှန်သေဆုံးသူလည်းရှိတယ်။ ဘယ်ရွာက ဘယ်သူတွေဆိုတာ အတိအကျမသိရသေးဘူး။ လောလောဆယ် ရွာသားတွေလည်း ပြေးနေရတယ်။ အသေးစိတ်တော့ မသိရသေးဘူး"လို့ ဆိုပါတယ်။

ဖေဖော်ဝါရီလ ၁၈ ရက် ညပိုင်းက ကရင်အမျိုးသားအစည်းအရုံး(KNU) တပ်မဟာ(၃)နယ်မြေ၊ မုန်းမြို့နယ်၊ ကျွန်းတောကျေးရွာအတွင်းကို စစ်ကောင်စီက လက်နက်ကြီးနဲ့ပစ်ခတ်ခဲ့တဲ့အတွက် နေအိမ်တစ်လုံးပေါ် ကျရောက်ပေါက်ကွဲခဲ့တဲ့အတွက် မိခင်ဖြစ်သူ ထိမှန်သေဆုံးပြီး ကလေး ၂ ဦးထိမှန်ဒဏ်ရာရရှိခဲ့တယ်လို့ ကေအန်ယူက ထုတ်ပြန်ပါတယ်။

တုံးတောကျေးရွာမှာ တပ်စွဲထားတဲ့ စစ်ကောင်စီရဲ့ ခမရ ၅၉၉ တပ်က ကျွန်းတောကျေးရွာထဲကို ၁၂၀ မမ လက်နက်ကြီးနဲ့ပစ်ခတ်လို့ ဒေါ်မြင့်မြင့်ဆန်း(၃၈ နှစ်)နေရာမှာတင်သေဆုံးပြီး သမီးဖြစ်သူ မနှင်းမြတ်မွန်(၁၂နှစ်)ဟာ ညာဘက်ခြေထောက်ထိမှန်ကာ သားဖြစ်သူ မောင်ရန်လင်းထက်ကတော့ ဘယ်ဘက်ခြေထောက် ပြင်းထန်ဒဏ်ရာရရှိခဲ့ပါတယ်။

ဒဏ်ရာရရှိခဲ့တဲ့ ကလေးငယ်နှစ်ဦးကို ဖြူးမြို့ဆေးရုံကိုပို့ဆောင်ပြီး ဆေးကုသမှုပေးထားသလို ကလေးငယ် ၂ ဦးအတွက် ဆေးဝါးအကူအညီတွေလိုအပ်နေပါတယ်။

အလားတူ ည ၉ နာရီကျော်လောက်က စစ်ကောင်စီရဲ့ ခမရ-၃၅၁ တပ်က သစ်ချဆိပ်ကျေးရွာအတွင်းကို လက်နက်ကြီးနဲ့ပစ်ခတ်လို့ နော်ထဲနေထူးရဲ့နေအိမ်ပေါ် ကျရောက်ပေါက်ကွဲတဲ့အတွက် နေအိမ်နဲ့အတူ အိမ်တွင်းပစ္စည်းအားလုံး မီးလောင်ဆုံးရှုံးခဲ့ရပါတယ်။

ဖေဖော်ဝါရီ ၁၆ ရက် မနက် ၈ နာရီခွဲလောက်က နတ်သံကွင်း-ကျောက်ကြီးကားလမ်းပေါ်က ဆိတ်ကြီးဂိတ်မှာတပ်စွဲထားတဲ့ စစ်ကောင်စီရဲ့ ခလရ-၆၀ တပ်က နိုတောတာကျေးရွာသား စောပီးလီး(၃၆ နှစ်)နဲ့ စောပီးပီ(၂၈ နှစ်)တို့ ညီအစ်ကိုနှစ်ဦးကို ဖမ်းဆီးခံခဲ့ရ ပါတယ်။

စစ်ကောင်စီက ညီအစ်ကိုနှစ်ဦးကို တားဆီးစစ်ဆေးရာမှာ စောပီးပီကိုင်ဆောင်တဲ့ ဖုန်းအတွင်းကနေ ကျေးရွာအတွင်းကို စစ်ကောင်စီပစ်ခတ်လိုက်တဲ့ လက်နက်ကြီးကျရောက်ပေါက်ကွဲထားတဲ့ လက်နက်ကြီးအပိုင်းအစတွေကို ရိုက်ယူထားတဲ့ပုံတွေ တွေ့ရှိခဲ့တဲ့အတွက် ဖမ်းဆီးခဲ့တာဖြစ်ပြီး လက်ရှိမှာလည်း ဖမ်းဆီးရိုက်နှက်စစ်ဆေးခံနေရတယ်လို့ ကေအန်ယူက ထုတ်ပြန်ပါတယ်။