စစ်ကိုင်းတိုင်း ဒီပဲယင်းမြို့နယ်၊ ညောင်လှကျေးရွာကို ဒီဇင်ဘာ ၁၇ ရက် မနက် ၉ နာရီမှာ စစ်တပ်က လက်နက်ကြီးနဲ့ ပစ်ခတ်ခဲ့တာကြောင့် ၁၀ နှစ်အရွယ် ကလေး ၃ ယောက်အပါအဝင် ၄ ယောက် ဒဏ်ရာရခဲ့တယ်လို့ ရွာသားတွေက ပြောပါတယ်။
စစ်ကောင်စီတပ်ဟာ သံချပ်ကာ ကား ၂ စီးနဲ့ ဒီပဲယင်းအရှေ့ခြမ်း စစ်ကြောင်းထိုးကာ လက်နက်ကြီးနဲ့ ပစ်ခတ်ခဲ့တာကြောင့် ညောင်လှကျေးရွာမှာ ကျရောက် ပေါက်ကွဲခဲ့ပြီး အခုလို ထိခိုက်ဒဏ်ရာရခဲ့တာလို့ ညောင်လှကျေးရွာဒေသခံတဦးက ပြောပါတယ်။
“ရေဦးနယ်ဘက်ကနေ ရွာသာလေး၊ ကုက္ကိုစု၊ မူးသာကုန်း ကျေးရွာအတွင်းဝင်ပြီး ကျနော်တို့ ရွာဘက်ကို လက်နက်ကြီးနဲ့ ပစ်တယ်။ နာလည်တဲ့သူတွေပြောတာကတော့ ၁၂၀ မမလို့ ပြောတယ်။ ၉ လုံးပစ်တဲ့ထဲက ၇ လုံးပေါက်တယ်။”
လက်နက်ကြီး ကျရောက်ပေါက်ကွဲတာကြောင့် အသက် ၄၀ ကျော် အမျိုးသမီး တယောက်၊ အသက် ၁၀ နှစ်အရွယ် ကလေး ၂ ယောက်နဲ့ ၁၆ နှစ်အရွယ် တယောက် ကျည်စမှန်ကာ ဒဏ်ရာရခဲ့ပြီး အနီးရှိ သစ်ပင်နဲ့ အိမ်တချို့လည်း ပျက်စီးခဲ့တယ်လို့ ဆိုပါတယ်။
ဒီဇင်ဘာလအတွင်း စစ်ကိုင်းတိုင်းက ဒီပဲယင်း၊ ကန့်ဘလူ၊ ကျွန်းလှ၊ ရေဦး၊ တန့်ဆည်၊ ထီးချိုင့် နဲ့ ကသာမြို့နယ်တွေကို PDF ရှင်းလင်းတယ်ဆိုပြီး ကျေးရွာအများအပြားကို မီးရှို့နေတာလည်း ဖြစ်ပါတယ်။
အခုလက်နက်ကြီးပစ်ခံရတဲ့ ညောင်လှရွာကိုလည်း ဒီဇင်ဘာလအတွင်း ဝင်ရောက် မီးရှို့ခဲ့တာ ကြောင့် အိမ်ခြေ ၂၀၀ ကျော်၊ စပါးအပါအဝင် သီးနှံအများအပြားနဲ့ လယ်ယာသုံး ပစ္စည်းတွေ မီးလောင်ဆုံးရှုံးခဲ့တယ်လို့ ဒေသခံတွေက ပြောပါတယ်။
စစ်ကိုင်းတိုင်း၊ ဒီပဲယင်းမြို့နယ်၊ ညောင်လှကျေးရွာမှာ စစ်ကောင်စီတပ်က အကြမ်းဖက် မီးရှို့ဖျက်ဆီးခဲ့တာကြောင့် ပျက်စီးဆုံးရှုံးခဲ့ရတဲ့ မီးဘေးသင့်ပြည်သူ တွေ စားဝတ်နေရေးအခက်အခဲကြုံနေရတယ်လို့ နေအိမ်ဆုံးရှုံးခဲ့ရသူတွေထံက သိရပါတယ်။
ညောင်လှကျေးရွာမှ နေအိမ်မီးလောင်ဆုံးရှုံးရသူတစ်ဦးက “ဦးလေးတို့ လတ်တလော အခက်အခဲကတော့ နေစရာစားစရာ ခက်ခဲတာပေါ့။ အိမ်တောင်မှပြန်မဆောက်နိုင်တဲ့အဆင့်ပေါ့။ မီးလောင်တာ ဘာမှ မကျန်ရစ်ဘူး။ ရှေ့ဆက်ပြီးတော့က ကျရာ ကြုံရာဘဲပေါ့ ဘယ်လို လုပ်ရှေ့ဆက်သွားဖို့က လွယ်မှာတုန်း။” လို့ ပြောပါတယ်။
ဒီပဲယင်းမြို့နယ်အရှေ့ခြမ်းက ကျေးရွာတွေကို စစ်ကောင်စီတပ်က ဧပြီ ၁၉ ရက်က စတင်ပြီး စစ်အင်အား ၁၀၀ လောက်နဲ့ စစ်ကြောင်းထိုးခဲ့တာဖြစ်ပါတယ်။
အိမ်ခြေ ၉၀၀ ကျော်ရှိတဲ့ ညောင်လှကျေးရွာကိုတော့ စစ်ကောင်စီတပ်က ဧပြီ ၂၀ ရက် မနက်အစောပိုင်းက ရောက်ရှိလာပြီး မီးရှို့ခဲ့တာကြောင့် လူနေအိမ် ၄၈ လုံး ၊ ကျေးရွာမီးသတ်စခန်းရှိ မီးသတ်ကား ၂စီးနဲ့ ကောက်ရိုးပုံတွေ မီးလောင်ပျက်စီး သွားတယ်လို့ ဒေသခံတွေက ပြောပါတယ်။
အခုအချိန်မှာမီးလောင်ဆုံးရှုံးရတဲ့ နေအိမ်ပိုင်ရှင်တွေအနေနဲ့ စားဝတ်နေရေးခက်ခဲနေသလို နေစရာ အိမ်ပြန်လည်တည်ဆောက်ဖို့လည်း ခက်ခဲနေတယ်လို့ ညောင်လှကျေးရွာက နေအိမ်မီးလောင်ဆုံးရှုံးခဲ့ရတဲ့ အမျိုးသမီးတစ်ဦးက ပြောပါတယ်။
“အခု အိမ်က မီးထဲပါသွားတော့ သူများအိမ် ကပ်နေရတာ။ စားစရာက အခုတော့ ဒုက္ခရောက်တာပေါ့။ ပစ္စည်းတွေက ဘာမှမပါဘူး။ ကလေးတွေနဲ့ လူအလွတ်ရုန်းရတာပေါ့။ နေစရာကလည်း ခက်ခဲတာပေါ့။ တော်တော်နဲ့တော့ ပြန်ဆောက်နိုင်မှာ မဟုတ်ဖူး။ စားဝတ်နေရေးလေးခက်ခဲနေတာပေါ့”
ဒီပဲယင်းမြို့နယ် စစ်ရှောင်ထောက်ပံ့ရေးအဖွဲ့အနေနဲ့လည်း လှူဒါန်းငွေရရှိမှု နည်းပါးနေတာကြောင့် စစ်ရှောင်တွေနဲ့ မီးလောင်ဆုံးရှုံးပြည်သူတွေကို ကူညီထောက်ပံ့ပေးနိုင်မှု နည်းပါးနေတယ်လို့ ဒီပဲယင်းစစ်ရှောင်ကူညီထောက်ပံ့ရေးအဖွဲ့က ပြောပါတယ်။
ဒီပဲယင်းမြို့နယ်အတွင်းမှာ ဧပြီ ၁၉ နဲ့ ၂၀ ရက်အတွင်း စစ်ကောင်စီတပ် မီးရှို့ခဲ့တာကြောင့် လူနေအိမ် ၆၅ လုံး မီးလောင်ခဲ့ပြီး လူဦးရေ ၄၀၀ ကျော် နေအိမ် ဆုံးရှုံးခဲ့တယ်လို့ သိရပါတယ်။
လတ်တလောမှာ ဒီပဲယင်းမြို့နယ် စစ်ရှောင်ကူညီထောက်ပံ့ရေးအဖွဲ့အနေနဲ့ ကျေးရွာ မပြန်နိုင်တော့တဲ့ အမြဲတမ်းစစ်ဘေးရှောင်တွေနဲ့ မီးဘေးသင့်ပြည်သူ စုစုပေါင်း ၁၅၀၀ ကျော်အတွက် စားနပ်ရိက္ခာကူညီပံ့ပေးနို၀င်ဖို့ ကူညီဆောင်ရွက်နေတာဖြစ်ပြီး အလှူငွေတွေ လိုအပ်လျက်ရှိတယ်လို့ ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က သိရပါတယ်။
