ကိုဗစ်ကူးစက်နှုန်းများလာတာကြောင့် ကိုဗစ်လူနာတွေအတွက် နိုင်ငံတဝန်းက ဆေးရုံတွေ အသင့်ပြင်ထားကြဖို့ စစ်ကောင်စီလက်အောက်ခံ ကျန်းမာရေးဝန်ကြီးဌာနက ဧပြီ ၂၄ ရက်မှာ ညွှန်ကြားခဲ့တယ်လို့ ကျန်းမာရေးဦးစီးဌာနနဲ့နီးစပ်သူတွေဆီက သိရပါတယ်။
ညွန်ကြားစာမှာတော့ ထိုင်း၊ ဘင်္ဂလားဒေရှ်နဲ့ အိန္ဒိယတို့မှာ ကူးစက်မြန် ကိုဗစ်-၁၉ မျိုးကွဲ 1.16 (Arcturus) ကြောင့် ၂၀၂၃ ဇန်နဝါရီကစပြီး ကူးစက်နှုန်းမြင့်တက်လာပြီး မြန်မာနိုင်ငံအတွင်း ဧပြီလမှစတင်ကာ ကိုဗစ်ကူးစက်သူများပြားလာတဲ့အတွက် ဆေးရုံတွေ အသင့်ပြင်ထားဖို့ ပါရှိတယ်လို့ ကျန်းမာရေးဝန်ကြီးဌာနနဲ့နီးစပ်သူတဦးက ဒီဗွီဘီကို ပြောပါတယ်။
"စစ်တပ်က ကိုဗစ်ကူးစက်တဲ့လူတွေ ဒီလောက်များတာတောင် သင်္ကြန်ကိုလိမ်ပြီးလုပ်သွားတာ။ ယိမ်းကတဲ့အဖွဲ့အထဲက ၁၂ ဦးလောက် ကိုဗစ်ဖြစ်တယ်၊ အခုစစ်ဆေးရုံမှာကြိတ်ကုနေတယ်။ ဒီလူအများကြီးက ထပ်ပြန့်သွားရင် မလွယ်ဘူး။"
ကျန်းမာရေးဝန်ကြီးဌာနက ဗဟိုအဆင့် ဆေးရုံအုပ်ကြီးတွေဦး၊ နေပြည်တော်ကုသရေးဦးစီးမှူးတွေ၊ တိုင်းဒေသကြီးနဲ့ ပြည်နယ်ကုသရေးဦးစီးမှူးတွေကို ကူးစက်မြန် ကိုဗစ်ရောဂါကုသရေးအတွက် ဆေးရုံတွေ အသင့်ပြင်ထားဖို့ ဧပြီ ၂၄ ရက်က စာထုတ်ပြန်ခဲ့တာလို့ အမည်မဖော်လိုသူ ဦးစီးမှူးတဦးက ဒီဗွီဘီကိုပြောပါတယ်။
"မနေ့ကပဲ ကျနော်တို့ဆေးရုံကို စာရောက်တယ်၊ ကိုဗစ်ဖြစ်နေမှန်းသိတယ်။ ကုသရေးရော၊ ပညာရေးရော မလုပ်ဘဲ ဆေးရုံတွေ၊ ခုတင်တွေ အသင့်ပြင်ထားပါဆိုတော့ မပြောချင်ဘူး။"
အခုကာလ ကိုဗစ်ပြန်လည်ဖြစ်လာပါက စစ်ကောင်စီရဲ့ ကျန်းမာရေး အသိမရှိမှုကြောင့် ပြည်သူတွေ ထောင်နဲ့ချီ ထပ်မံသေဆုံးမှာစိုးရိမ်တယ်လို့ ပြည်သူတဦးက ဝေဖန်ပြောဆိုပါတယ်။
"အခုချိန် ကိုဗစ်အမှန်တကယ်သာဖြစ်၊ သေလိုက်မဲ့လူတွေ။ လူတွေက mask မတပ်သလို လက်လည်းမဆေးဘူး၊ လူစုလူဝေးအများကြီးနဲ့နေကြတယ်။ ဒါကိုပညာပေးမဲ့သူမရှိဘူး။"
မြို့နယ်ဆေးရုံတွေမှာ လက်တလော လူနာတွေအတေက် Covid Clinical Management Committee တွေ ပြန်လည်ဖွဲ့စည်းနေတယ်လို့ ကျန်းမာရေးအသိုက်အဝန်းက သိရပါတယ်။
ပြီးခဲ့တဲ့ ကိုဗစ်ဒုတိယလှိုင်းမှာ အာဏာသိမ်းစစ်ကောင်စီရဲ့ စီမံခန့်ခွဲမှုညံ့ဖျင်းမှု၊ ဆရာဝန်တွေ မလုံလောက်မှု နဲ့ ဆေးဝါးမလုံလောက်မှုတွေကြောင့် ပြည်သူတွေ ထောင်နဲ့ချီကာ သေဆုံးခဲ့ပါတယ်။
စစ်ကောင်စီက တိုင်ရင်းသားလက်နက်ကိုင်များအပေါ်အထင်အမြင်လွဲမှားစေဖို့ ရည်ရွယ်ပြီး ဝါဒဖြန့်ရိုက်ကူးထားတဲ့ "စောင်နီလေးတစ်ထည်" ရုပ်ရှင်ကားကို တပ်မိသားစုနဲ့ ဌာနဆိုင်ရာဝန်ထမ်းများကို ဖိအားပေးကာ မဖြစ်မနေ ကြည့်ရှု့ခိုင်းတယ်လို့ ဝန်ထမ်းအသိုက်အဝန်းက သိရပါတယ်။
တိုင်းပြည်ကို စစ်ကောင်စီတပ်က အသက်ပေးကာကွယ်ခဲ့ပြီး တိုင်းရင်းသားလက်နက်ကိုင်တွေကို တိုင်းပြည်ဖျက်ဆီးသူတွေအဖြစ် ပုံဖော်ရိုက်ကူးကားတဲ့ ဇာတ်ကားဖြစ်တယ်လို့ အမည်မဖော်လိုတဲ့ ပြန်ကြားရေး ဝန်ထမ်းတဦးက ပြောပါတယ်။
"သူတို့ဘာသာရိုက်ပြီး မြဝတီတို့ မြန်မာ့အသံတို့က လွှင့်တာပြသာနာမရှိပေမဲ့ ရုပ်ရှင်ရုံတွေမှာ ဝန်ထမ်းတွေကို ကြည့်ခိုင်းတာတော့ အဆင်မပြေဘူး၊ ဌာနဆိုင်ရာဝန်ထမ်းတွေကိုကြည့်ဖို့ ဖိအားပေးတာတွေ ရှိတယ်။"
အဆိုပါ ဝါဒဖြန့်ဇာတ်ကားကို မတ် ၁၉ ရက်မှ စတင်ကာ ရန်ကင်းမှာရှိတဲ့ စစ်ကောင်စီရဲ့ မြဝတီမီဒီယာစင်တာ Star Cinema ကနေ လူတယောက်ကို ၅,၀၀၀ ကျပ်၊ ၁၀,၀၀၀ ကျပ်နဲ့ ပွဲချိန်နှစ်ချိန် ပြသမယ်လို့ စစ်တပ်နဲ့နီးစပ်သူတဦးက ဒီဗွီဘီကို ပြောပါတယ်။
"တပ်ရင်း တပ်ဖွဲ့က လူတွေ ကြည့်ရမှာပေါ့။ နေပြည်တော်မှာဆို ပြန်ကြာရေးက ဝန်ထမ်းတွေ ကြည့်ရမှာ။ ပြည်ထဲရေးနဲ့ ကာကွယ်ရေးက လူတွေလည်းပါတယ်။ ပြောရရင် ပြည်သူတွေ အားပေးကြတယ်ပေါ့၊ အဲ့လိုမြင်စေချင်တာ။"
အဆိုပါဇာတ်ကားအတွက် စစ်ကောင်စီတပ်ဖွဲ့ဝင် မိသားစုများတဦးလျှင် ၅ ထောင်မှ ၁ သောင်းပေးကြည့်ရမှာဖြစ်တဲ့အတွက် တပ်အတွင်းမကျေနပ်သူတွေလည်း ရှိတယ်လို့ စစ်မှုထမ်းဟောင်းတဦးက ပြောပါတယ်။
"အခုဆို စစ်မှုထမ်းမှာ ဘာဝင်ငွေမှ ရှိတာမဟုတ်ဘူး။ အဲ့ဒါကို တမြို့နယ်ကို လက်မှတ်အစောင် ၅၀၊ မြို့ကြီးရင် ၁၀၀ အားပေးရမယ်။ ကြည့်ချင်ကြည့် မကြည့်ချင်ပြန်ရောင်းဆိုတော့ ဒီကားကို ဘယ်သူက လာကြည့်မှာလဲ၊ အလကားပေးတာတောင် ကြည့်မဲ့သူမရှိဘူး။ အဲ့ဒီနေ့လူပြည့်နေရင် သေချာတယ်၊ ဝန်ထမ်းနဲ့စစ်တပ်က လူတွေပဲ။"
စောင်နီလေးတစ်ထည် ဇာတ်ကားကို TV က မပြခင် ရုပ်ရှင်ဗားရှင်းအနေနဲ့ တပတ်လောက်စောပြီး ၁၉ ရက်မှ ၂၅ ရက်အတွင်းပြသမှာဖြစ်ပြီး ရန်ကုန်မှာ သမ္မတ၊ JCGV၊ Star Cinema၊မန္တလေး- ဝင်းလိုက် နဲ့ နေပြည်တော် - ဥတ္တရသီရိ Ocean JCGV၊ ဇေယျာသီရိ တို့မှာ ပွဲချိန်နှစ်ချိန်ပြသမှာဖြစ်ပါတယ်။
အဆိုပါ "A RED BLANKET စောင်နီလေးတစ်ထည်" ကို စစ်ကောင်စီရဲ့ဝါဒဖြန့်ဇာတ်ကားများ ရိုက်ကူးနေတဲ့ ဒါရိုက်တာတင်အောင်စိုး (ပန်းမြို့တော်) ရိုက်ကူးပြီး ရန်အောင်၊ စိုးမြတ်သူဇာ၊ စိုးမြတ်နန္ဒာ၊ L ဆိုင်းဇီ၊ ကျော်ဇောဟိန်းနဲ့ နေနော် အပါအဝင် စစ်ကောင်စီတပ်ဖွဲ့ဝင်တွေနဲ့ ပူးပေါင်းရိုက်ကူးခဲ့တာဖြစ်ပါတယ်။
