ရခိုင်ပြည်နယ်၊ စစ်တွေမြို့၊ ဗုဒ္ဓေါမော်ဘုန်းတော်ကြီးကျောင်းက စစ်ဘေးရှောင် အမျိုးသားတယောက် စစ်ကောင်စီတပ်ရဲ့ ဖမ်းဆီးခံရစဉ် ညှဉ်းပန်းနှိပ်စက်ခံခဲ့ရတဲ့အတွက် စစ်တွေဆေးရုံမှာ ဆေးကုသမှုခံယူနေရပြီး အကူအညီတွေ လိုအပ်နေတယ်လို့ မိသားစုဝင်တွေဆီက သိရပါတယ်။

မိသားစုဝင်တဦးက “ပခုံးနဲ့ မျက်နှာကို သေနတ်နဲ့ အထုခံရတဲ့ဒဏ်ရာတွေက များပါတယ်။ စစ်တွေဆေးရုံမှာ ဆေးကုသနေရတယ်။ လူတဦးကို ဟုတ်မဟုတ် မသေချာဘဲ အခုလိုမျိုး နှိပ်စက်ညှဥ်းပန်းခံရတာကတော့ အလွန်စိတ်မကောင်းစရာပါ။ သားသမီးက ၅ ဦး ရှိပါတယ်။ စားသောက်နေရေးတောင် အခက်အခဲပါ။ ဆေးစရိတ်က မတတ်နိုင်ပါ” လို့ ပြောပါတယ်။

စစ်ကြောရေးမှာ ညှဉ်းပန်းနှိပ်စက်ခံခဲ့ရလို့ ဆေးကုသမှု ခံယူနေရပြီး အကူအညီ လိုအပ်နေသူမှာ အသက် ၃၂ နှစ်အရွယ် ဦးဌေးနိုင် ဖြစ်ပါတယ်။

သူဟာ နိုဝင်ဘာ ၇ ရက် ညနေပိုင်းက စစ်တွေမြို့ ရှုခင်းသာလမ်းရှိ RV စားသောက်ဆိုင်မှာ ပြည်နယ်ငါးလုပ်ငန်းဦးစီးမှူးကို အမည်မသိ လူတချို့က သေနတ်နဲ့ ပစ်ခတ်ခဲ့ပြီးနောက် စစ်ကောင်စီတပ်ဖွဲ့ဝင် အင်အား ၂၀ ခန့်က ပြည်နယ်ငါးလုပ်ငန်းဦးစီးဌာနရုံးရှေ့ရှိ ဗုဒ္ဓေါမော်ဘုန်းတော်ကြီးကျောင်းကို ဝင်ရောက်ရှာဖွေရင်း မသင်္ကာမှုနဲ့ ဖမ်းဆီးခံခဲ့ရတာလည်း ဖြစ်ပါတယ်။

ဦးဌေးနိုင်ဟာ စစ်ကြောရေးမှာမှာ ၁၃ ရက် နေခဲ့ရပြီး နိုဝင်ဘာ ၂၀ ရက်က ပြန်လွှတ်ပေးလိုက်တာဖြစ်ပြီး စစ်ကြောရေးမှာ မှာနည်းမျိုးစုံနဲ့ နှိပ်စက်ခံရလို့ မျက်နှာနဲ့ လက်မောင်းမှာ သေနတ်ဘောင်နဲ့ ထုခံရတဲ့ ညိုမည်းဒဏ်ရာတွေ ပြင်းထန်စွာ ရရှိထားပါတယ်။ 

သူ့ကို အခုလို စစ်ကောင်စီတပ်က ဖမ်းဆီးနှိပ်စက်ခဲ့တာကြောင့် ဗုဒ္ဓေါမော်ဘုန်းတော်ကြီးကျောင်းရှိ စစ်ဘေးရှောင်တွေဟာ နောက်ထပ် ဖမ်းဆီးစစ်ဆေးလာမှာကို စိုးရိမ်ပြီး စစ်ဘေးရှောင်စခန်းမှာ မနေရဲကြတော့ပါဘူး။

စစ်ဘေးရှောင်တဦးက “သူတို့က ဖမ်းချင်တဲ့သူကို ဖမ်းလို့ရတယ်။ လုပ်ချင်သလို လုပ်နေကြတာ။ ဘယ်သူမှလည်း တာဝန်မခံနိုင်ဘူးလေ။ စစ်ချင်တဲ့အချိန် ဝင်စစ်လာနိုင်တယ်။ ဖမ်းချင်ရင် ကြိုက်တဲ့လူကို ဖမ်းမယ်။ အဲ့ဒါကြောင့် အများစုက စိုးရိမ်ပြီး မနေဝံ့ကြတော့ဘူး။”လို့ ပြောပါတယ်။

ဗုဒ္ဓေါမော်ဘုန်းတော်ကြီးကျောင်းမှာ စစ်ဘေးရှောင်အိမ်ထောင်စု ၁၀၇ စု၊ လူဦးရေ ၄၀၀ ကျော်ရှိ​နေပြီး အဲဒီစစ်ဘေးရှောင်တွေဟာ ၂၀၁၈ ခုနှစ်ကတည်းကဖြစ်ပွားတဲ့ တိုက်ပွဲတွေကြောင့် တွေ့ချင်းပြည်နယ် မီးလက်ဝနဲ့ ကျောက်တော်နယ်ကနေ ဘက ထွက်ပြေးလာကြတဲ့ စစ်ဘေးရှောင်တွေ  ဖြစ်ပါတယ်။

မြန်မာနိုင်ငံမှာ မတရားအာဏာသိမ်းကာလ ၉ လခွဲကျော်အကြာ အကြမ်းဖက်စစ်တပ် ပစ်ခတ် သတ်ဖြတ်မှုကြောင့် အပြစ်မဲ့ကျဆုံးပြည်သူ ၁,၂၆၉ ယောက်ထိရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ဖေဖော်ဝါရီ ၁ ရက်မှ နိုဝင်ဘာ ၁၆ ရက်အထိ အေအေပီပီက ကောက် ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေးကာလအတွင်း ပြည်သူ ၁၀,၂၁၇ ယောက် ဖမ်းဆီးခံခဲ့ရပြီး ၇,၃၂၂ ယောက်ကတော့ လက်ရှိချုပ်နှောင်ခံထားရဆဲဖြစ်ပြီး အဲဒီထဲက ၂၈၉ ယောက်ကတော့ ထောင်ဒဏ်ချမှတ်ခံထားရပါတယ်။

ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက်အပါအဝင် ၂၆ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။

အမှုဖွင့်ခံထားရပြီး ဖမ်းဝရမ်းထုတ်ခံထားရတဲ့အတွက် တိမ်းရှောင်နေသူ အရေအတွက်ကတော့ ၁၉၅၄ ယောက်ရှိနေပြီး သူတို့ထဲက မျက်ကွယ်သေဒဏ်ချမှတ်ခံထားရသူ ၃၉ ယောက်အပါအဝင် ၁၁၈ ယောက်ဟာ မျက်ကွယ်ပြစ်ဒဏ်ချမှတ်ခံထားရကာ  သေဒဏ်ချ မှတ်ခံထားရသူ စုစုပေါင်း ၆၅ ယောက် ရှိခဲ့ပြီဖြစ်ပါတယ်။

ဧရာဝတီတိုင်း၊ လပွတ္တာမြို့နယ်၊ ဘုရားသိကြားကျေးရွာမှ ကိုကျော်သူဝင်းကို အကြမ်းဖက်စစ်အုပ်စုက ဗုံးပေါက်ကွဲမှုသံသယနဲ့ နိုဝင်ဘာ ၁၂ ရက်မှာ ဖမ်းဆီးသွား ခဲ့ပြီးနောက် ကိုကျော်သူဝင်းဟာ ညှဉ်းပန်းနှိပ်စက်ခံရတာကြောင့် နောက်တနေ့ နိုဝင်ဘာ ၁၃ ရက်နေ့မှာပဲ စစ်ကြောရေးမှာ ကျဆုံးသွားခဲ့ပါတယ်။

ဒါ့အပြင် ရှမ်းပြည်နယ်၊ ရွာငံမြို့နယ်၊ လယ်ကိုင်းကျေးရွာမှာ နိုဝင်ဘာ ၁၃ ရက် ည ၁၁ နာရီလောက်က အကြမ်းဖက်စစ်အုပ်စုတပ်က ပစ်ခတ်တာကြောင့် တောင်သူ ကိုဖိုးဖြူဟာ နေရာတင် ကျဆုံးသွားခဲ့ပါတယ်။ ကိုဖိုးဖြူရဲ့ ဘေးအိမ်ကို စစ်တပ်ကလာရောက်ဝိုင်းချိန်မှာ ထွက်ကြည့်ရာကနေ ခုလိုပစ်သတ်ခံ ခဲ့ရတာ ဖြစ်တယ်လို့ ဆိုပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေစတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရတာတွေနဲ့ ပတ်သက်လို့ နွေဦး တော်လှန်ရေးကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီးအချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။