ဘရာဇီးလ်သမ္မတ လူးဝစ်ဇ် အင်နာစီယို လူလာဒါဆေးလ်ဗားဟာ သူ့ရဲ့မဲဆွယ်စည်းရုံးရေးကတိကို ဖြည့်ဆည်းပေးတဲ့အနေနဲ့ ဌာနေတိုင်းရင်းသားနယ်မြေ ၆ ခုကို ဧပြီ ၂၈ ရက်က တရားဝင် အသိ အမှတ်ပြုခဲ့ပါတယ်။
သမ္မတ လူလာဟာ ဌာနေတိုင်းရင်းသား ၁ သန်းကျော်အတွက် ကိုယ်စားလှယ်တွေရဲ့ ၅ ရက်ကြာ နှစ်ပတ်လည်အစည်းအဝေး ကျင်းပနေတဲ့ ဘရာစီလီယာ မြို့တော်က Free Land Camp မှာ လက်မှတ်ရေးထိုးခဲ့တာပါ။
အမေဇုန်မိုးသစ်တောမှာ သစ်ခုတ်သမားတွေနဲ့ ရွှေတူးဖော်သူတွေရဲ့ ကျူးကျော် ဝင်ရောက်ခြင်းနဲ့ လယ်ယာစိုက်ပျိုးခြင်းတွေ တိုးမြင့်လာတာကနေ ဌာနေတိုင်းရင်းသားမြေတွေကို ကာကွယ် စောင့်ရှောက်ဖို့အတွက် ဒီလိုအသိအမှတ်ပြုပေးခြင်းက အရေးကြီးပါတယ်။
သူ့ရဲ့ရှေ့က လက်ယာစွန်းသမ္မတဟောင်း ဂျိုင်းရ် ဘော်လ်ဆိုနာရိုက ဘရာဇီးလ်ရဲ့ မူလလူမျိုး တွေမှာ မြေယာများလွန်းတယ်လို့ ဆိုပြီး ရပ်နားထားတဲ့မူဝါဒကို ပြောင်းပြန်လှန်ပြီး အသိအမှတ် ပြုလိုက်တာလည်း ဖြစ်ပါတယ်။
ဌာနေတိုင်းရင်းသားခေါင်းဆောင်တွေဟာ မြေပုံထဲမှာ ရေးဆွဲပြီးသား ဌာနေတိုင်းရင်းသားနယ်မြေ ၃၀၀ လောက်ကို အသိအမှတ်ပြုပေးဖို့ အရှိန်မြှင့် တောင်းဆိုထားပေမယ့် တရားဝင် အသိအမှတ် ပြုခံရဖို့ နှစ်ပေါင်းများစွာ စောင့်ခဲ့ရပါတယ်။
အဓိကအားဖြင့် နိုင်ငံ့မြေ စုစုပေါင်းရဲ့ ၁၃ ရာခိုင်နှုန်းဖြစ်တဲ့ အမေဇုန်မိုးသစ်တောကို ဘိုးဘွားပိုင်မြေလို့ ယူဆကြတဲ့ ဌာနေတိုင်းရင်းသား လူမျိုးစု ၃၀၀ လောက်ဟာ ဘရာဇီးနိုင်ငံ တဝန်းရှိ နယ်မြေပေါင်း ၇၃၀ မှာ နေထိုင်ကြပေမယ့် နယ်မြေ ၄၃၄ ခုကိုပဲ အသိအမှတ် ပြုထားပါတယ်။
နိုင်ငံတော်ရဲ့ အကာအကွယ် မရှိဘဲ၊ ဌာနေတိုင်းရင်းသား အသိုက်အဝန်းဟာ ဘော်လ်ဆိုနာရို လက်ထက်မှာ တရားမဝင် သစ်ခုတ်သမားတွေနဲ့ ရွှေတွင်းလုပ်သားတွေ ကျူးကျော်မှု အန္တရာယ် မြင့်တက်လာတာတွေကို ရင်ဆိုင်နေကြရတာပါ။
သမ္မတဟောင်း ဘော်လ်ဆိုနာရိုကတော့ တိုင်းရင်းသားလူနည်းစုတွေအတွက် မြေတွေ များလွန်း တယ်လို့ ပြောဆိုခဲ့ပြီး မြေနေရာ ထိန်းသိမ်းစောင့်ရှောက်ရမယ့်အတွက် ၁ စင်တီမီတာ တောင် လုံးဝ ခွင့်မပြုကြောင်း လူသိရှင်ကြား ကတိပြုခဲ့ပါတယ်။
သမ္မတ လူလာကတော့ ဇန်နဝါရီလမှာ စတင်တာဝန် ထမ်းဆောင်တဲ့ ပထမနေ့မှာပဲ ဌာနေ တိုင်းရင်းသားများဆိုင်ရာ ဝန်ကြီးဌာနတခုကို ဖွဲ့စည်းခဲ့ပြီး သူ့ရဲ့ ရွေးကောက်ပွဲ မဲဆွယ် စည်းရုံးရေး ကတိကို လိုက်နာဖြည့်ဆည်းပေးခဲ့တာဖြစ်ပါတယ်။
