မန္တလေးတိုင်း၊ တကောင်းမြို့နယ် အာရုဏ်ဦးရွာအနီးမှာ ဧပြီ ၅ ရက် မွန်းလွဲ ၂ နာရီဝန်းကျင်က စစ်ယာဥ်တန်း တိုက်ခိုက်ခံခဲ့ရပြီး စစ်ကောင်စီတပ်ဘက်က ပစ်ခတ်မှုကြောင့် ကျေးရွာအတွင်းက အမျိုးသမီးတဦး ကျည်ထိမှန်သေဆုံးခဲ့တယ်လို့ တကောင်းမြို့နယ် ပကဖကနေ သိရပါတယ်။
ထီးချိုင့်မြို့ကနေ မန္တလေးမြို့ကို စစ်တပ်အင်အား ၈၀ ကျော်ပါ တွဲကား ၃ စီးကို အာရုဏ်ဦးရွာအနီးမှာ လက်နက်ကြီး လက်နက်ငယ်တွေနဲ့ စီးနင်းတိုက်ခိုက်ခဲ့တယ်လို့ တကောင်းမြို့နယ် ပကဖ သတင်းနဲ့ပြန်ကြားရေးတာဝန်ခံက ပြောပါတယ်။
“ပစ်ခတ်ချိန်က မိနစ် ၂၀ လောက်ကြာတယ်။ သူတို့စစ်ကားတွေကို ကင်းပုန်းစောင့်နေတဲ့ စစ်သားတွေက ရမ်းပစ်လို့ ရွာထဲက အမျိုးသမီးတဦး သေတယ်။ စစ်ကောင်စီဘက်က သေဆုံးမှုကိုတော့ အတည်မပြုနိုင်သေးဘူး။”
အာရုဏ်ဦးရွာနဲ့ ကွမ်းတောလမ်းကြားမှာ ကင်းပုန်းဝပ်နေတဲ့ စစ်ကောင်စီတပ်သားတွေရဲ့ ပစ်ခတ်မှုကြောင့် နေအိမ်အတွင်း ထမင်းချက်နေတဲ့ အသက် ၆၀ အရွယ် အမျိုးသမီးတဦး သေဆုံးခဲ့ပြီး စစ်ကောင်စီတပ်ဘက်က ကျေးရွာအနီးက နေအိမ် ၃ လုံးကိုလည်း မီးရှို့ခဲ့သေးတယ်လို့ ဆိုပါတယ်။
စစ်ကောင်စီတပ် ပစ်ခတ်မှုကြောင့် သေဆုံးသွားခဲ့တဲ့ အမျိုးသမီးအတွက် အထူးဝမ်းနည်းကြေကွဲရပါကြောင်း သပိတ်ကျင်းမြို့နယ် ပြည်သူ့ကာကွယ်ရေးတပ်ဖွဲ့တွေက ထုတ်ပြန်ထားပါတယ်။
သပိတ်ကျင်းမြို့နယ်မှာ မနက် ၆ နာရီမှ ည ၇ နာရီအတွင်းသာ သွားလာကြဖို့နဲ့ တိုက်ပွဲဖြစ်ပွားခဲ့တဲ့ နေရာတွေကို အသွားအလာရှောင်ဖို့၊ အချိန်ကြာပြီး ရပ်နားတာ မပြုလုပ်ဖို့၊ ထုတ်ပြန်ချက်တွေကို လေးစားလိုက်နာပေးဖို့၊ စည်းကမ်းရှိစွာ သွားလာပေးကြဖို့၊ စကစယာဉ်တန်းတွေနဲ့ ကပ်မလိုက်ကြဖို့ တကောင်းမြို့နယ်ပကဖက ထုတ်ပြန်ထားပါတယ်။
တကောင်းမြို့နယ်ပကဖရဲ့ ထောက်ပို့ကား မတော်တဆတိမ်းမှောက်ခဲ့ပြီး ပြန်လည်ပြုပြင်ဖို့ ကျပ် သိန်း ၆၀ ဝန်းကျင် ကုန်ကျမှာဖြစ်ပြီး ပြည်သူတွေအနေနဲ့ ဝိုင်းဝန်းကူညီပေးကြဖို့ မေတ္တာရပ်ခံထားပါတယ်။
မန္တလေးတိုင်း၊ တကောင်းမြို့နယ်မှာ မတ်လ ၂၈ ရက် နေ့လယ် ၁ နာရီလောက်က စစ်ကား ၇ စီးပါ စစ်ယာဥ်တန်းကို မိုင်းဆွဲတိုက်ခိုက်ခဲ့တယ်လို့ တကောင်းမြို့နယ် ပကဖ သတင်းနဲ့ ပြန်ကြားရေး တာဝန်ခံက ပြောပါတယ်။
တွင်းငယ် ၁၃ တပ်ကနေ တကောင်းလမ်းဆုံကို ထွက်လာတဲ့ စစ်ယာဥ်တန်းကို မြနန္ဒာရွာအနီးမှာ မိုင်းလေးလုံးဆွဲ တိုက်ခိုက်ခဲ့တာလို့ တကောင်းပကဖက မတ်လ ၂၉ ရက်မှာ သတင်းထုတ်ပြန်ပါတယ်။
တကောင်းပကဖ သတင်းနဲ့ ပြန်ကြားရေးတာဝန်ခံက “ထိခိုက်မှုကတော့ ၁၀ ယောက်လောက်သေတယ် ကြားပါတယ်။ တကောင်းလမ်းဆုံက ဆီဆိုင်မှာ နားတယ်၊ လူနာတွေကို တကောင်းမြို့ ဆေးရုံထဲ ခေါ်သွားတာ” လို့ ပြောပါတယ်။
စစ်ယာဥ်တန်း မိုင်းဆွဲခံရပြီး ကားပေါ်ပါ စစ်သားတွေ ရမ်းပစ်ခတ်ခဲ့ကာ ကားက အပေါ်ပိုင်းသာ ထိခဲ့တာကြောင့် တကောင်းလမ်းဆုံကိုပဲ ဆက်သွားခဲ့တယ်လို့ ပြောပါတယ်။
တကောင်းမြို့နယ်မှာ စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့တွေ စစ်ရေးအခြေအနေ တင်းမာနေတာကြောင့် ပြည်သူတွေအနေနဲ့ သတိနဲ့ သွားလာကြဖို့ တကောင်းပကဖက သတင်းထုတ်ပြန်ထားပါတယ်။
မန္တလေးတိုင်း၊ နွားထိုးကြီးမြို့နယ်မှာလည်း မန္တလေး-မြင်းခြံလမ်းမ၊ မိုင်တိုင်အမှတ် ၁၂/၁ ဖာလုံ၊ ကျောက်လုံးကြီးကွေ့အနီးမှာ မတ်လ ၂၇ ရက် ညနေ ၆ နာရီ ၁၅ မိနစ်လောက်က သာသနာ့ယာဉ်နံပါတ်ပြားတပ် ဘုန်းကြီးကားတစီး မိုင်းဆွဲခံရလို့ ၂ ဦး ထိခိုက်ဒဏ်ရာ ရရှိခဲ့တယ်လို့ မြို့ခံပရဟိတအသင်းက ပြောပါတယ်။
အဲ့ဒီကားဟာ ညောင်ဦးမြို့နယ်၊ ပုဂံမြို့ဟောင်းရှိ အလိုတော်ပြည့်ဘုန်းကြီးကျောင်းက ဘုန်းကြီးတပါးနဲ့ ယာဉ်မောင်းဖြစ်သူတို့က ညောင်ဦးကနေ မောင်းလာတဲ့ အဖြူရောင် ALPHARD ကားဖြစ်တယ်လို့ သိရပါတယ်။
“သတင်းဝင်တာက ညနေ ၆ နာရီကျော်လောက်မှာပါ။ ကားတစီး မိုင်းထိသွားတယ်လို့ ပြောတာ။ ဟိုရောက်တော့ ကားထဲမှာ ဘုန်းကြီးက ဗိုက်ပွင့်ထားတယ်၊ ကန့်လန့်ဖြတ်ပုံစံနဲ့ မှန်ထားတာ။ ဒရိုင်ဘာက မျက်နှာဖူးယောင်ဒဏ်ရာ ရထားတယ်။ ကားရဲ့ဘေးဘက်မှန်တွေနဲ့ အနောက်ဘက်ခြမ်းတွေ ထိထားတယ်” လို့ မြို့ခံလူမှုကယ်ဆယ်ရေးအသင်းက ဆိုပါတယ်။
မိုင်းဆွဲခံရတာကြောင့် သက်တော် ၄၅ နှစ်၊ ဝါတော် ၂၀ ရှိ ဘုန်းကြီးမှာ ဗိုက်ပွင့်အူထွက် ဒဏ်ရာ၊ မျက်နှာထိမှန် ဒဏ်ရာတွေ ရရှိခဲ့ပြီး အသက် ၅၅ နှစ်အရွယ် ယာဉ်မောင်းဖြစ်သူမှာ နှာခေါင်း၊ နဖူး ပွန်းပဲ့ပေါက်ပြဲဒဏ်ရာ ရရှိခဲ့တယ်လို့ သိရပါတယ်။
ဒဏ်ရာရသွားတဲ့ ဘုန်းကြီးကို စိုးရိမ်ရလူနာအဖြစ် ညောင်ဦးမြို့နယ်ဆေးရုံ အရေးပေါ်ဌာနကို ပို့ဆောင်ထားတယ်လို့ သိရပြီး ဘယ်အဖွဲ့က ထောင်တဲ့မိုင်းမှန်း မသိရသေးပါဘူး။