အမေရိကန်နိုင်ငံ၊ တက္ကဆက်ပြည်နယ်၊ ကလိတ်ဗ်လန်းမြို့ရှိ နေအိမ်တစ်လုံးမှာ သေနတ်နဲ့ပစ်ခတ်မှုအတွင်း အသက် ၈ နှစ်အရွယ် ကလေးငယ်တစ်ဦး အပါအဝင် လူ ၅ ဦး သေဆုံးခဲ့ရတယ်လို့ ဧပြီလ ၂၉ ရက်မှာ အေဘီစီသတင်းဌာနက ဒေသခံရဲတပ်ဖွဲ့ကို ကိုးကားပြီး သတင်းဖော်ပြခဲ့ပါတယ်။

ဧပြီ ၂၈ ရက် နှောင်းက ဒီပစ်ခတ်မှုအတွက် သံသယရှိသူကို ရဲတပ်ဖွဲ့က ရှာနေတုန်းပဲလို့ သတင်းထဲမှာ ဖော်ပြပါတယ်။

ဆန်ဂျာစင်တိုမြို့နယ် ရဲတပ်ဖွဲ့ရုံးက အရာရှိတွေဟာ ကလိတ်ဗ်လန်းမြို့ကနေ အနှောင့်အယှက် ပေးကြောင်း တိုင်ကြားတဲ့ ဖုန်းခေါ်ဆိုတစ်ခုကို ဒေသစံတော်ချိန် ည ၁၁ နာရီခွဲလောက်မှာ လက်ခံရရှိခဲ့တာပါ။ 

အဲ့ဒီနောက် အခင်းဖြစ်ရာကို ရဲအရာရှိတွေ ရောက်ရှိသွားချိန်မှာတော့ သေနတ်နဲ့ ပစ်သတ်ခံထားရတဲ့ လူအများအပြားကို တွေ့ခဲ့ရတယ်လို့ အေဘီစီ သတင်းဌာနမှာ ဖော်ပြထားပါတယ်။ 

ဒီပစ်ခတ်မှုကို ကျူးလွန်ခဲ့တဲ့ သံသယရှိသူဟာ မက္ကဆီကန်အမျိုးသားတစ်ဦး ဖြစ်သလို အရက်မူးနေတဲ့အပြင် လက်နက်နဲ့အတူ ထွက်ပြေးတိမ်းရှောင်နေတယ်လို့ ရဲတပ်ဖွဲ့ရုံးက အေဘီစီရုပ်သံကို ဖြေဆိုပါတယ်။ 

ဒါကြောင့် အာဏာပိုင်တွေအနေနဲ့ အသက် ၃၈နှစ်အရွယ် ဖရန်စစ္စကို အိုရိုပီဇာကို လူသတ်မှု မှုနဲ့ စွဲချက်တင်နိုင်ဖို့ အနီးအနားရှိ တောအုပ်နယ်မြေမှာ ရှာဖွေနေဆဲဖြစ်တယ်လို့ ရဲအရာရှိ ဂရက်ဂ် ကေးပါးက အတည်ပြုပါတယ်။ 

အခင်းဖြစ်ပွားရာနေအိမ်ကို ဒီသေနတ်သမားက ဝင်ရောက်ကာ စတင်ပစ်ခတ်ချိန်မှာ စုစုပေါင်း လူ ၁၀ ဦးအထိ ရှိနေခဲ့တာဖြစ်ပြီး ကျန်ခဲ့တဲ့လူ ၅ ဦးကတော့ အသက်ရှင် လွတ်မြောက်ခဲ့ကြောင်း ကေးပါးက ဖြည့်စွက်ပြောပါတယ်။

ဒါရိုက်တာကိုပေါက်ရဲ့ ရောင်နီလာရာလမ်း တော်လှန်ရေးရုပ်ရှင်အထူးပွဲကို ဒေသစံတော်ချိန် မတ် ၁၈ ရက်က အမေရိကန်ပြည်ထောင်စု၊ တက္ကဆက်ပြည်နယ်၊ လူးဝစ္စဗေးလ်မြို့၊ Bethel Baptist Church မှာ ပြသခဲ့ပြီး စုစုပေါင်းရန်ပုံငွေ ဒေါ်လာ ၆၂၆၀ (ငွေကျပ် ၁၇၅ သိန်းကျော်) ရရှိခဲ့တယ်လို့ DFW Myanmar Ethnic Community က ပြောပါတယ်။

ရောင်နီလာရာလမ်းရုပ်ရှင်အထူးပွဲနဲ့ ရန်ပုံငွေဈေးရောင်းပွဲကနေရလာတဲ့ အကျိုးအမြတ်အားလုံးကို စစ်ဘေးသင့်နေတဲ့ မြန်မာပြည်သူတွေကို လှူဒါန်းသွားမှာဖြစ်ပါတယ်။

DFW Myanmar Ethnic Community အဖွဲ့ဝင်ကို ဇာနည်ဝင်းက "ကျနော်တို့ တက္ကဆက်ပြည်နယ် DFW လူးဝစ္စဗေးလ်မြို့မှာ ဒီနေ့ရောင်နီလာရာလမ်းရုပ်ရှင်ကို အောင်မြင်စွာပြနိုင်ပြီဖြစ်ကြောင်း ပြောကြားလိုပါတယ်။ ကျနော်တို့ ရန်ပုံငွေရှာဖွေရေး အစားအသောက်ရောင်းချတာနဲ့ လက်ဆောင်ပစ္စည်းရောင်းချတာအားလုံး စုစုပေါင်း ဒေါ်လာ ၆၂၆၀ ရန်ပုံငွေရရှိခဲ့ပါတယ်လို့ အောင်မြင်စွာနဲ့ကြေညာအပ်ပါတယ်။ အဘက်ဘက်က ဝိုင်းဝန်းကူညီကြတဲ့ ဘုရားကျောင်းကမိသားစု၊ ဗော်လန်တီယာတွေအားလုံးကိုလည်း အထူးကျေးဇူးတင်ပါတယ်"လို့ ပြောပါတယ်။

သရုပ်ဆောင်ဒါရိုက်တာကိုပေါက်ရဲ့ ရောင်နီလာရာလမ်းရုပ်ရှင်ပြပွဲတွေ ပြုလုပ်ပြီး ကမ္ဘာတဝန်းရောက် မြန်မာတွေက တော်လှန်ရေးအတွက် ရန်ပုံငွေရှာဖွေနေတာပါ။ 

ဒါရိုက်တာကိုပေါက်ရဲ့ မသောက်မိသောမိုးခါးရေ ရုပ်ရှင်ပြပွဲတွေတုန်းကလည်း ကမ္ဘာတဝန်း နိုင်ငံတွေက မြန်မာအသိုက်အဝန်းမှာပြသခဲ့ပြီး ရန်ပုံငွေအများအပြားရရှိခဲ့ပါတယ်။