close

တက္ကသိုလ်ဝင်တန်း

close

March 8, 2023

ကယားတွင် တက္ကသိုလ်ဝင်တန်းစာမေးပွဲဖြေသူ ၉၀၀ ကျော်ရှိပြီး စာစစ်ဌာန ၄ ခုသာ ဖွင့်လှစ်နိုင်

ဒီနေ့ မတ်လ ၈ ရက် ကျင်းပတဲ့ တက္ကသိုလ်ဝင်စာမေးပွဲကို ကယားပြည်နယ်ရဲ့ မြို့နယ်လေးခုမှာ စာစစ်ဌာန ၄ ခုသာ ဖွင့်လှစ်နိုင်ပြီး ဝင်ရောက်ဖြေဆိုသူ အရေအတွက်က ၉၀၀ ကျော်ပဲရှိတယ်လို့ ပညာရေးဌာန အသိုက်အဝန်းက သိရပါတယ်။

ကယားပြည်နယ်မှာ လွိုင်ကော်မြို့၊ ရှားတောမြို့၊ ဖရူဆိုမြို့၊ ဒီးမော့ဆိုမြို့၊ မယ်ဆယ်မြို့၊ ဘော်လခဲမြို့၊ ဖားဆောင်းမြို့နယ်ဆိုပြီး မြို့နယ် ၇ ခုအထိ ရှိပါတယ်။

ဒါပေမဲ့ လွိုင်ကော်၊ ဘောလခဲ၊ ဖားဆောင်း၊ မယ်ဆယ် အစရှိတဲ့ မြို့နယ် ၄ ခုမှာပဲ စာစစ်ဌာနတွေ ဖွင့်လှစ်နိုင်ပြီး အရင်နှစ်ကလည်း စာစစ်ဌာန ၄ ခုသာ ဖွင့်လှစ်နိုင်ခဲ့သလို တက္ကသိုလ်ဝင်စာမေးပွဲကို ဖြေဆိုဖို့ စာရင်းပေးထားသူ ၉၉၅ ဦးအနက် ကျောင်းသားကျောင်းသူပေါင်း ၉၂၁ ဦး ဝင်ရောက်ဖြေဆိုပြီး ပျက်ကွက်သူ ၇၄ ဦးရှိတယ်လို့ ပြည်နယ်ပညာရေးမှူးရုံး တာဝန်ရှိသူတဦးက ပြောပါတယ်။

၂၀၂၀ ပြည့်နှစ်အထိ ကယားပြည်နယ်မှာ တက္ကသိုလ်ဝင်စာမေးပွဲဖြေဆိုဖို့ စာစစ်ဌာနပေါင်း ၂၀ ကျော်အထိ ဖွင့်လှစ်ခဲ့သလို ဝင်ရောက်ဖြေဆိုသူ ဦးရေဟာ တပြည်နယ်လုံးဆိုရင် ၈,၀၀၀ နီးပါးအထိ ရှိခဲ့ပေမဲ့ အာဏာသိမ်းပြီးနောက်ပိုင်း ကရင်နီတပ်တွေရဲ့ နယ်မြေစိုးမိုးနိုင်မှုတွေ များပြားလာတာနဲ့အတူ စစ်ကောင်စီကပြုလုပ်တဲ့ စာမေးပွဲ ၂ ကြိမ်လုံးကို စာစစ်ဌာန ၄ ခုအထိပဲ ဖွင့်လှစ်နိုင်ခဲ့တာ ဖြစ်ပါတယ်။

အာဏာသိမ်းစစ်ခေါင်းဆောင် မင်းအောင်လှိုင်ကတော့ လာမယ့်ပညာသင်နှစ်မှာ တနိုင်ငံလုံးမှာရှိတဲ့ အခြေခံပညာကျောင်းတွေ ဖွင့်လှစ်နိုင်ဖို့ ကြိုးစားသွားမယ်လို့ ကြုံးဝါးထားပါတယ်။

7 days Ago

August 12, 2020

မိုးညှင်းမြို့တွင် တက္ကသိုလ်ဝင်တန်း ၆ ဘာသာဂုဏ်ထူးရှင်ကျောင်းသူကို ဂုဏ်ပြု 

ကချင်ပြည်နယ်၊ မိုးညှင်းမြို့မှာ ၂၀၁၉- ၂၀၂၀ ပညာသင်နှစ် တက္ကသိုလ်ဝင်တန်း စာမေးပွဲကို  ဘာသာစုံဂုဏ်ထူးထွက်ပြီး အောင်မြင်ခဲ့တဲ့ ၆ ဘာသာဂုဏ်ထူးရှင် မမျိုးခိုင်ဇင်သော်ကို နန်းခါရပ်ကွက် အုပ်ချုပ်ရေးရုံးမှာ ဂုဏ်ပြုပွဲပြုလုပ်ခဲ့ပါတယ်။ တက္ကသိုလ်ဝင်တန်းစာမေးပွဲဖြေဆိုဖို့အတွက်  ကျူရှင်မတက်ခဲ့ဘဲ  တနေ့စာ တနေ့  ပုံမှန်လုပ်ပြီး ဖြေဆိုခဲ့တာဖြစ်တယ်လို့ ၆ ဘာသာဂုဏ်ထူးရှင် မမျိုးခိုင်ဇင်သော်က ပြောပါတယ်။ “ကျမ ကျူရှင်မတက်ပါဘူး။ ကျောင်းကပြန်ရင်အိမ်မှာ ဂိုက်ဆရာမတယောက်နဲ့ သင်ယူပါတယ်။ နောက်နှစ်တက္ကသိုလ်ဝင်တန်း ဖြေဆိုကြမယ့် မောင်လေးညီမလေးတွေကို ပြောချင်တာက တနေ့သင်ခန်းစာကို တနေ့ကျေအောင်ပုံမှန် လုပ်ဖို့ပါ။ ကျန်တာ ဦးနှောက်ထဲမထည့်ဖို့ ဒါဆို အောင်မြင်နိုင်မယ်။” ဆရာဝန်ကြီးဖြစ်အောင် ဆက်လက် ကြိုးစားသွားပြီး နိုင်ငံတာဝန်ထမ်းဆောင်သွားမယ်လို့လည်း ပြောပါတယ်။ သူ့ရဲ့ မိဘတွေကလည်း အိမ်မှာ တီဗီမကြည့်တော့ပဲ ကလေးပညာရေးကျန်းမာရေးအတွက်ပဲ ဦးစားပေးပံ့ပိုးခဲ့ပါတယ်လို့ ပြောပါတယ်။ မမျိုးခိုင်ဇင်သော်ဟာ ကျောင်းစနေကတည်းက နှစ်စဉ် အဆင့်တစ် ရှိခဲ့သူဖြစ်ပြီး စတုထ္ထတန်းမှာ စကောလားရှစ် ပညာသင်ဆုကို နိုင်ငံတော်မှ ပေးအပ်ခဲ့ပါတယ်။ မိုးညှင်းမြို့မှာ ၂၀၁၉-၂၀၂၀ ပညာသင်နှစ် တက္ကသိုလ်ဝင်တန်း ၆ ဘာသာဂုဏ်ထူးရှင် ကျောင်းသူ မမျိုးခိုင်ဇင်သော် တဦးတည်းသာ ပေါ်ထွက်လာတာဖြစ်ပြီး စုစုပေါင်းရမှတ်မှာ ၅၂၀ မှတ် ရရှိခဲ့ပါတယ်။ သတင်း - မုန်းမုန်းမင်း
3 years Ago
Up