စစ်ကိုင်းတိုင်း ကလေးမြို့နယ် တင်သားရွာရဲ့တောင်ဘက် ကြံသာကျေးရွာအနီး ဝဲတောင်မှာ မတ် ၂၂ ရက်နေ့မနက်ပိုင်းက တောင်ယာသွားလုပ်တဲ့ ဒေသခံအမျိုးသား ၁ ဦးကို စစ်ကောင်စီတပ်က ဖမ်းဆီးပြီး ပစ်သတ်လိုက်တယ်လို့ ဒေသခံတွေက ပြောပါတယ်။
ကြံသာကျေးရွာအတွင်း တပ်စွဲထားတဲ့ စစ်ကောင်စီတပ်သားတွေနဲ့ ပျူစောထီးတွေက တင်သားရွာကနေ တောင်ယာလာလုပ်တဲ့ ပြည်သူတွေကို သေနတ်နဲ့ ပစ်ခတ်ပြီး အမျိုးသား ၁ ဦးကို ဖမ်းဆီးခေါ်ဆောင်ကာ ကြံသာသင်္ချိုင်းမှာ သတ်ဖြတ်ခဲ့တာလို့ ဆိုပါတယ်။
ဖမ်းဆီးခေါ်ဆောင်ပြီး သတ်ဖြတ်ခံရသူဟာ တင်သားရွာနေကျေးရွာနေ အသက် ၄၀ အရွယ် ဦးဇော်မျိုးအောင်ဖြစ်တယ်လို့ ဆိုပါတယ်။
ထွက်ပြေးလွတ်မြောက်လာတဲ့ အမျိုးသမီးတဦးက “ကျမတို့ ပဲချိတ် (ပဲရိတ်သိမ်း) နေတဲ့ ယာခင်းထဲကို သူတို့က ရုတ်တရက်ရောက်လာပြီးတော့ သေနတ်တွေနဲ့ ပစ်ခတ် ခြောက်လှန့်ခဲ့တယ်” လို့ ပြောပါတယ်။
ပြီးခဲ့တဲ့ ဖေဖော်ဝါရီ ၂၆ ရက်နေ့ကလည်း စစ်ကောင်စီတပ်သားတွေဟာ တောင်ယာလုပ်နေတဲ့ တင်သားရွာသား အမျိုးသား ၃၀ ကျော်ကို ဖမ်းဆီးခဲ့ပြီး ၂၀ ကျော် ပြန်လွှတ်ပေးခဲ့တယ်လို့ ဆိုပါတယ်။
ဖမ်းဆီးထားသူတွေထဲက အသက် ၁၇ နှစ်အရွယ် ကျောင်းသား မောင်ရှိုင်းသူဖြိုး၊ အသက် ၄၀ အရွယ် ဦးနန်းလှိုင် အပါအဝင် ရွာသား ၆ ယောက်ကိုတော့ တပ်စွဲထားတဲ့ ကြံသာကျေးရွာက စခန်းအနောက်ဘက် တောင်ယာခင်းထဲမှာ စစ်ကောင်စီက ပြီးခဲ့တဲ့ မတ်လဆန်းပိုင်းမှာ ပစ်ခတ် သတ်ဖြတ်ခဲ့တယ်လို့ ဒေသခံတွေက ပြောပါတယ်။
ဖမ်းဆီးခံရပြီး လွတ်မြောက်လာသူတဦးက “ကျနော်တို့ကို PDF တွေ ထောက်ပံ့သလား၊ PDF ဘယ်လောက်အင်အားရှိလဲ ဆိုပြီးလည်း မေးတယ်။ ဖုန်းပါတဲ့သူကို ဖုန်းတွေစစ်တယ်၊ ရိုက်လည်းရိုက်တယ်” လို့ ပြောပါတယ်။
စစ်ကောင်စီတပ်ဟာ ကြံသာကျေးရွာမှာ တပ်စွဲထားတာ ၇ လဝန်းကျင် ကြာမြင့်နေပြီဖြစ်ပြီး တောင်ယာသွားလုပ်တဲ့ အပြစ်မဲ့ပြည်သူ ၃ ဦးလည်း ဖမ်းဆီးခံထားရကာ ဒီနေ့ချိန်ထိ ပြန်မလွတ်လာသေးသလို ဘာသတင်းမှလည်း မရဘူးလို့ ဆိုပါတယ်။
စစ်ကောင်စီ တပ်စွဲထားတဲ့ ကြံသာကျေးရွာဟာ ပျူစောထီးတွေ ကြီးစိုးတာကြောင့် ဖမ်းဆီးခံရသူတွေရဲ့ အခြေအနေကို မိသားစုဝင်တွေက သွားမမေးရဲကြဘူးလို့ ဒေသခံတွေက ပြောပါတယ်။
တင်သားကျေးရွာသားတွေဟာ တောင်ယာလုပ်ငန်းကိုသာ အဓိက လုပ်ကိုင်စားသောက်ကြတဲ့ တောင်သူတွေဖြစ်ပြီး တောင်ယာလုပ်နေတဲ့ ယာခင်းထဲထိ လာရောက်ဖမ်းဆီးခေါ်ဆောင်ပြီး သတ်ဖြတ်နေတာကြောင့် ရွာသားတွေ တောင်ယာသွားဖို့ ထိတ်လန့်ကြောက်ရွံ့နေကြတယ်လို့ သိရပါတယ်။
စစ်ကိုင်းတိုင်း၊ ကလေးမြို့နယ် တင်သားရွာမှာ PDF နဲ့ တိုက်ပွဲဖြစ်ပြီးနောက် အကြမ်းဖက်စစ်တပ်က ရွာကိုဝင်စီးတာကြောင့် ရွာသားထောင်ချီ တိမ်းရှောင်ခဲ့ရပြီး ဒီနေ့မွန်းတည့်ပိုင်းကစတင်ကာ ကျေးရွာအတွင်းက နေအိမ်တချို့ကို မီးရှို့နေတယ်လို့ သိရပါတယ်။
တင်သားကျေးရွာသူတစ်ဦးက “တင်သားကျေးရွာကို စစ်ကောင်စီတပ်တွေက အရမ်းဖိနှိပ်သောင်းကျန်းနေပါတယ်ရှင်။ ကူညီကြပါဦး။ ကျမတို့ရွာသားတွေ အကုန်လုံးကတော့ ဩဂုတ် ၂၆ ရက်နေ့ကတည်းက ရွာလုံးကျွတ်လူတွေ ထွက်ပြေးနေကြတာ။ ဒီနေ့ ဩဂုတ် ၂၈ ရက်နေ့ မွန်းတည့် ၁၂ နာရီလောက်မှာ ကျောင်းဆရာကြီး ဦးကျော်မင်နိုင် ပိုင်တဲ့ နိုင်မြန်မာကုန်စုံဆိုင်ကို စစ်ကောင်စီတွေကစပြီး မီးရှို့တယ်။ အဲအိမ်ကနေ့ တရွာလုံး လောင်မယ် ထင်တယ်။ အခုတောင် ကျန်အိမ်တွေ ကူးနေပြီရှင့်။ ရွာထဲကနေ ထွက်မပြေးဘဲ ပုန်းနေတဲ့သူတွေက ပုန်းပြီး ဗွီဒီယိုရိုက်ပြီး ပို့ပေးလို့ အခုလိုသိရတာ” လို့ ပြောပါတယ်။
စစ်တပ်ဟာ တင်သားရွာနဲ့ ၃ မိုင်လောက်ဝေးတဲ့ ကြံသာရွာကို ၂၅ ရက်နေ့က ရောက်ခဲ့ပြီး နောက်နေ့မှာ တင်သားရွာကို လာခဲ့တာလို့ တင်သားရွာ ဒေသခံတယောက်က ပြောပါတယ်။
“စစ်ပြေးတယောက်ကို လိုက်ဖမ်းတယ်လို့ သိရတယ်။ ပြီးတော့ တင်သားရွာကို တောလမ်းကနေ ချီတက်လာတယ်။ PDF ခေါင်းဆောင်တွေကို လာရှာတာလို့လည်း သိရတယ်။ ရွာထဲမှာ တပ်စွဲမှာစိုးလို့ PDF က ခုခံသေးတယ်။ စစ်တပ်က ရွာရဲ့ အရှေ့ဘက်ကနေ ပစ်တာ။ လက်နက်ကြီးတွေနဲ့လည်း ပစ်တယ်။ ရွာနာမှာစိုးလို့ PDF က နောက်ဆုတ်ပေးခဲ့ပါတယ်။”
ညနေ ၆ နာရီလောက်ကနေ တညလုံးနီးပါး တိုက်ပွဲပြင်းပြင်းထန်ထန်ဖြစ်ခဲ့ပြီး ထိခိုက်သေဆုံးတဲ့ အခြေအနေကိုတော့ မသိရပါဘူး။ ဒီနောက်မှာတော့ စစ်တပ်ဟာ တင်သားရွာက ဆေးရုံမှာ တပ်စွဲခဲ့တာလည်း ဖြစ်ပါတယ်။
တင်သားရွာမှာ အိမ်ခြေ ၁,၀၀၀ ကျော်ရှိပြီး တိမ်းရှောင်နေရသူ ၂၀,၀၀၀ ဝန်းကျင်လောက် ရှိနိုင်တယ်လို့လည်း ဒေသခံတွေက ပြောပါတယ်။
ဒီမနက်အစောပိုင်းကလည်း ဗုံးခွဲသံကြားရတယ်လို့ ဒေသခံတယောက်က ပြောပါတယ်။ ဩဂုတ် ၂၆ ရက်နေ့က စစ်သား အင်အား ၈၀ ဝန်းကျင်လောက် ရောက်လာခဲ့တာဖြစ်ပြီး နောက်ထပ် အင်အားဖြည့်လာတာလည်း ရှိတယ်လို့ ဒေသခံတွေက ပြောပါတယ်။
တင်သားရွာမှာ ဒီနေ့ညနေ ၃ နာရီခွဲအထိ မီးက လောင်ကျွမ်းနေဆဲ ဖြစ်တယ်လို့ ဒေသခံတွေက ပြောပါတယ်။
