ရန်ကုန်မြို့မှာ ဒီရက်ပိုင်းအတွင်း လျှပ်စစ်မီး ဆိုးရွားစွာပျက်နေပြီး အပူရှိန်က မြှင့်တက်နေတဲ့အတွက် မိသားစုလိုက် ဟိုတည်၊ တည်းခိုခန်းတွေမှာ အပူရှောင်နေထိုင်တာတွေ များလာတယ်လို့ သိရပါတယ်။

ကျန်းမာရေးမကောင်းတဲ့ သက်ကြီးရွယ်အိုရှိသူတွေ၊ ကလေးငယ်ရှိသူတွေနဲ့ အပူဒဏ်မခံနိုင်တဲ့သူတွေအနေနဲ့ တည်းခိုတာတွေ လုပ်လာကြတာလို့ ဟိုတယ်တချို့ဆီက သိရပါတယ်။

သင်္ဃန်းကျွန်းမြို့နယ်၊ ရတနာလမ်းရှိ ဟိုတယ်တခုမှ မန်နေဂျာတဦးက “ဒီရက်ပိုင်းမှာ အခန်းလွတ် မရှိသလောက်ကို ပြည့်နေတာ။ မိသားစုလိုက် လာတည်းကြတာ။ ဝေးဝေးလံလံမဟုတ်ဘူး၊ ဒီအနီးဝန်းကျင်ကသူတွေပဲ လာကြတာ” လို့ ပြောပါတယ်။

လာရောက်တည်းခိုသူတွေဟာ အပူရှောင်လိုတဲ့အတွက် ဖြစ်တာကြောင့် မီးစက်မောင်းပြီး အဲကွန်းဖွင့်ပေးထားရတဲ့အတွက် ကုန်ကျစရိတ်ပိုများကာ တွက်ခြေမကိုက်ဘူးလို့လည်း အဲဒီလုပ်ငန်းပိုင်းနဲ့ နီးစပ်သူတွေက ဆိုပါတယ်။

တချို့ဟိုတယ်နဲ့ တည်းခိုခန်းတွေက မီးပျက်ချိန် မီးစက်မောင်းပေးရတဲ့အတွက် အခန်းခကို ပုံမှန်ထက် တိုးပြီးတောင်းယူတာမျိုးတွေ ရှိလာတယ်လို့ ဆိုပါတယ်။

စမ်းချောင်းမြို့နယ်က လသားကလေးမိခင်တဦးကလည်း လျှပ်စစ်မီးပျက်ပြီး ပူအိုက်တဲ့ဒဏ် မခံနိုင်လို့ နီးစပ်ရာဟိုတယ်မှာ သွားနေတာ နှစ်ရက်ရှိပြီလို့ ဆိုပါတယ်။

“ကလေးရော လူကြီးရော ဘယ်လိုမှမခံနိုင်ဘူး။ ဖုန်းတွေဆိုလည်း အားမရှိတော့ လုပ်စရာရှိတဲ့ အလုပ်တွေလည်း လုပ်မရတာနဲ့ မိသားစုလိုက် သွားတည်းနေတာ။”

ရန်ကုန်မြို့မှာ သင်္ကြန်ပိတ်ရက်ပြီးတဲ့နောက် လျှပ်စစ်မီးပြတ်တောက်မှုတွေ ဆိုးရွားစွာဖြစ်နေပြီး တချို့မြို့နယ်တွေမှာ တရက်မီးလာချိန် ၄ နာရီလောက်သာရှိတယ်လို့ မြို့ခံတွေက ဆိုပါတယ်။

တနင်္သာရီတိုင်းဒေသကြီး၊ ထားဝယ်ခရိုင်၊ ရေဖြူမြို့နယ်၊ ကံပေါက်ကျေးရွာ ရွာပတ်လမ်း(ရတနာလမ်း) ရှိ ရွှေလိပ်ပြာတည်းခိုခန်းမှာ ဇူလိုင် ၃၁ ရက် ညနေပိုင်းက သန့်ရှင်းရေးပြုလုပ်စဉ် မပေါက်ကွဲသေးတဲ့ မိုင်းတလုံး တွေ့ရှိခဲ့တယ်လို့ ဒေသခံတွေက ပြောပါတယ်။

မိုင်းတွေ့ရှိပြီးနောက် မောရဝတီရေတပ်မှ စစ်ကောင်စီတပ်သားတွေ ရတနာလမ်းမပေါ် နေရာယူပြီး အစစ်အဆေးတင်းကျပ်စွာ ပြုလုပ်နေတယ်လို့ ဆိုပါတယ်။

“ရွာပြင်လမ်းက အိမ်တွေအကုန် အိမ်ရှေ့ခြုံရှင်းပေးရမယ်လို့ ပြောထားတယ်။ အခုလည်း လမ်းပေါ်မှာ ဆိုင်ကယ်စီးလာတဲ့လူငယ်တွေ အဓိကထား စစ်နေတယ်” လို့ ရတနာလမ်းမှာနေထိုင်တဲ့ ကံပေါက်ရွာသားတဦးက ပြောပါတယ်။

အခုမိုင်းတွေ့ရှိတဲ့ တည်းခိုးခန်းဟာ စစ်အာဏာသိမ်းပြီးနောက် ကံပေါက်ကျေးရွာရဲ့ စစ်ကောင်စီခန့် အုပ်ချုပ်ရေးမှူးအဖြစ် ရက်သတ္တပတ် အနည်းငယ်တာဝန်ယူခဲ့ကာ နုတ်ထွက်ထားတဲ့ ဦးစိန်ထွန်းအောင်(ခ) ဦးဖိုးကုလား ပိုင်ဆိုင်တာဖြစ်ပြီး အခု မိုင်းတွေ့ရှိတာနဲ့ပတ်သက်ပြီး ဘယ်အဖွဲ့အစည်းကမှ ထုတ်ပြန်ထားတာ မတွေ့ရသေးပါဘူး။

ကံပေါက်ဒေသမှာ ပြီးခဲ့တဲ့ ဇူလိုင် ၂၁ ရက်ကလည်း ကံပေါက်အခြေစိုက် စစ်ကောင်စီတပ်ရင်း ခလရ ၂၇၃ အနီးက သံတံတားမှာ မပေါက်ကွဲသေးတဲ့ မိုင်းတွေ့ရှိခဲ့ရပြီး ဒေသခံရွာသားတွေရဲ့ နေအိမ် ၅ အိမ်ထက်မနည်း စစ်ကောင်စီတပ်သားတွေရဲ့ ဝင်ရောက်ရှာဖွေခံခဲ့ရတဲ့အတွက် အခု ဖြစ်စဉ်နဲ့ပတ်သက်ပြီး ဒေသခံတွေ စိုးရိမ်နေကြပါတယ်။