တနင်္သာရီတိုင်း၊ မြိတ်မြို့မှာ စစ်ကောင်စီခန့်ဝန်ကြီးချုပ် ဦးမြတ်ကို ခရီးစဉ်အတွက် စစ်ကောင်စီက အရင်ကထက် လုံခြုံရေးတွေ အများအပြား အသုံးပြုလာတယ်လို့ ဒေသခံတွေဆီက သိရပါတယ်။

ပြီးခဲ့တဲ့ရက်ပိုင်းအတွင်းကနေ ဒီနေ့အထိ မြိတ်မြို့ နာရီစင်ရှေ့နဲ့ ကမ်းနားလမ်းတလျှောက်မှာ စစ်သား၊ ရဲသား၊ ယာဉ်ထိန်းရဲနဲ့ ပျူစောထီးတွေ အင်အားအများအပြားချထားတယ်လို့ မြို့ခံတွေက ပြောပါတယ်။

“စကစခန့်ဝန်ကြီးချုပ်က ဒီနေ့မှာ ကျွန်းစုကို ဆင်းသွားတယ်။ ဘယ်ရက်နေ့က ရောက်လာလဲတော့ မသိဘူး။ ပြီးခဲ့တဲ့နေ့တွေတုန်းက နာရီစင်ရှေ့နားတဝိုက်မှာ စစ်ဆေးတာတွေရှိတယ်။ လုံခြုံရေးမှာ ပျူစောထီးနဲ့ ရဲတွေက ပိုများပါတယ်” လို့ ဒေသခံ အမျိုးသားတဦးက ပြောပါတယ်။

မြို့ခံအမျိုးသမီးတဦးကလည်း “ကျမတို့ ဒီနေ့ ကမ်းနားဘက်ကိုသွားတော့ စစ်ကားတွေ တွေ့တယ်။ ယာဉ်ထိန်းရဲတွေက ဆိုင်ကယ်တွေကို ရပ်ခိုင်းထားတယ်” လို့ ပြောပါတယ်။

မြိတ်မြို့မှာ စစ်ကောင်စီဘက်က ညမထွက်ရအမိန့်မတိုင်ခင် ည ၈ နာရီလောက်ကတည်းက လမ်းသွားလမ်းလာ ပြည်သူတွေရဲ့ဖုန်းကို စစ်ဆေးမှုတွေ ရှိနေတယ်လို့လည်း သိရပါတယ်။

ပြီးခဲ့တဲ့ ဇန်နဝါရီ ၉ ရက်နေ့မှာ စစ်ကောင်စီခန့်ဝန်ကြီးချုပ်ဟာ မြိတ်မြို့နယ်မှာရှိတဲ့ လူဦးရေ မြေပြင်ကွင်းဆင်း စာရင်းကောက်အဖွဲ့တွေ စာရင်းကောက်နေမှုကို လာရောက်ကြည့်ရှု စစ်ဆေးရာမှာ အရင်ကထက် လုံခြုံရေးတွေ ပိုမိုတင်းကျပ်ချထားတဲ့အပေါ် ဒေသခံတွေရဲ့ ဝေဖန်မှုတွေလည်း ရှိနေပါတယ်။

တနင်္သာရီတိုင်း၊ ထားဝယ် အရှေ့တောဒေသမှာတော့ ထီးခီးကားလမ်းပိုင်းက ကျေးရွာတွေမှာ ဖေဖော်ဝါရီ ၁၄ ရက်ကနေ ၁၈ ရက်အထိ စစ်ကောင်စီစစ်ကြောင်းနဲ့ ဒေသခံ ပြည်သူ့ကာကွယ်ရေးတပ်တွေအကြား တိုက်ပွဲ ရက်ဆက်ဖြစ်ပွားခဲ့ပါတယ်။

စစ်ကောင်စီစစ်ကြောင်း ကျောက်မဲတောင်ရဲစခန်းဘက်က ပြန်ထွက်လာတဲ့ ဖေဖော်ဝါရီ ၁၄ ရက်နေ့မှာ ထားဝယ်အရှေ့ပိုင်းကာကွယ်ရေးတပ်ဖွဲ့ EDF က စစ်ကောင်စီစစ်ကြောင်းကို မိုင်း ၄ လုံးနဲ့ မိုင်းဆွဲတိုက်ခိုက်ခဲ့တာကြောင့် စစ်ကောင်စီတပ်သား ၁ ဦးထက်မနည်း သေဆုံးကြောင်း EDF က ထုတ်ပြန်ပါတယ်။

ဖေဖော်ဝါရီ ၁၅ ရက်နဲ့ ၁၇ ရက်မှာလည်း ထားဝယ်-ထီးခီးကားလမ်းပိုင်းမှာ ကော်သူးလေအာမီ၊ သံမဏိပြောက်ကျား နဘယံတပ်ဖွဲ့နဲ့ မဟာမိတ်ပူးပေါင်းတပ်ဖွဲ့က စစ်ကောင်စီစစ်ကြောင်းကို ကြားဖြတ်တိုက်ခိုက်ရာ ထိတွေ့တိုက်ပွဲ နှစ်ကြိမ်ဖြစ်ပွားခဲ့ပြီး စစ်ကောင်စီဘက်က ၈ ဦးခန့်သေဆုံးကြောင်း မဟာမိတ်ပူးပေါင်းတပ်ဖွဲ့တွေဆီက သိရပါတယ်။

ဖေဖော်ဝါရီ ၁၇ ရက်မှာပဲ ထားဝယ်မြို့နယ် သင်္ကန်းတုံးရွာနဲ့ ဝကုန်းရွာအနီး ဗဲ့မတပ်တောင်ကြောမှာ ထားဝယ်ခရိုင် ပြည်သူ့ကာကွယ်ရေးတပ်မတော် တပ်ရင်း-၁ (T1) နဲ့ စစ်ကောင်စီတပ်ဖွဲ့တွေ တိုက်ပွဲဖြစ်ခဲ့ပြီး တပ်ရင်း-၁ တပ်စိတ်မှူး ရဲဘော်ကိုဘို ကျည်ထိမှန်ပြီး ကျဆုံးခဲ့ပါတယ်။

ဖေဖော်ဝါရီ ၁၆ ရက်နဲ့ ၁၈ ရက်တွေမှာတော့ စစ်ကောင်စီရဲ့ လက်နက်ကြီးပစ်ခတ်မှုကြောင့် အရပ်သားကလေးငယ်တဦး ထိခိုက်ဒဏ်ရာရခဲ့ပြီး စစ်ကောင်စီတပ်ဖွဲ့ဝင်တွေရဲ့ မီးရှို့မှုကြောင့် သင်္ကန်းတုံးရွာ မူလတန်းကျောင်း အဆောက်အဦနဲ့ နေအိမ်တချို့ မီးလောင်ခဲ့ပါတယ်။

ဒေသခံတဦးက “တိုက်ပွဲဖြစ်ပြီး စစ်ကြောင်းပြန်ထွက်ရင်းနဲ့ မီးရှို့ခဲ့တာပါ။ သင်္ကန်းတုံးမှာ မီးလောင်တာက အရင်တခါ (ဇန်နဝါရီလက) ဝကုန်းမှာ လောင်တာထက်တော့ နည်းတယ်”လို့ ပြောပါတယ်။

လမ်းပိုင်းကျေးရွာတွေက ရွာသားတွေကတော့ စစ်ရေးသတိပေးချက်အတိုင်း စစ်ကြောင်း ဝင်ရောက်လာကတည်းက ထွက်ပြေးတိမ်းရှောင်နေခဲ့တာကြောင့် ဖမ်းဆီး သတ်ဖြတ်ခံရတာမျိုး မရှိခဲ့ဘူးလို့ သိရပါတယ်။

ထားဝယ်အရှေ့တောဒေသမှာ ဖေဖော်ဝါရီ လဆန်းပိုင်းကစပြီး စစ်ကောင်စီတပ်နဲ့ ဒေသကာကွယ်ရေးတပ်ဖွဲ့ မဟာမိတ်အဖွဲ့တွေ ထိတွေ့တိုက်ပွဲတွေ ခပ်စိပ်စိပ်ဖြစ်လာသလို အရှေ့တောဒေသမှာရှိတဲ့ ကရင်လက်နက်ကိုင် အဖွဲ့အစည်းတွေဖြစ်တဲ့ ကေအန်ယူ တပ်မဟာ ၄ နဲ့ ကော်သူးလေအာမီတို့ရဲ့ ဆက်ဆံရေးလည်း တင်းမာနေပါတယ်။

ထောင်ဒဏ် ၁၁ နှစ်ချမှတ်ခံထားရပြီး ထားဝယ်ထောင်မှာ အကျဥ်းချခံနေရတဲ့ တနင်္သာရီတိုင်း ဝန်ကြီးချုပ် ဦးမြင့်မောင်ကို စစ်ကောင်စီရဲ့ ထောင်တွင်းတရားရုံးကနေ ဒီဇင်ဘာ ၂၃ ရက် မှာ ထောင်ဒဏ် ၁ နှစ် ထပ်ချလိုက်တယ်လို့ ထားဝယ်နိုင်ငံရေးအကျဥ်းသားများကွန်ရက် DPPN က သိရပါတယ်။

ဦးမြင့်မောင်ကို ရွေးကောက်ပွဲကာလမှာ ရွေးကောက်ပွဲဆိုင်ရာ ဥပဒေတွေကို ဖောက်ဖျက်တာ၊ ဘာသာရေးအကြောင်းပြဟောပြောတာတွေလုပ်တယ်ဆိုတဲ့ စွပ်စွဲချက်တွေနဲ့ ပြီးခဲ့တဲ့ နိုဝင်ဘာလ နှောင်းပိုင်းမှာ စစ်ကောင်စီကနေ ရာဇသတ်ကြီးဥပဒေပုဒ်မ ၁၃၀(က)နဲ့ ထပ်တိုးအမှုနှစ်ခု ဖွင့်ထားပြီး အဲဒီထဲက တမှုအတွက် အခုလို ထောင်ဒဏ် ၁ နှစ် ချမှတ်လိုက်တာပါ။

ဦးမြင့်မောင်ကို ပုဒ်မ ၁၃၀(က)နဲ့ အမှု နှစ်ခု ဖွင့်ခဲ့ပေမဲ့ တမှုကိုတော့ ပြန်လည် ပိတ်သိမ်းလိုက်တယ်လို့ ထားဝယ်နိုင်ငံရေးအကျဥ်းသားများကွန်ရက် DPPN တာဝန်ရှိသူတဦးက ပြောပါတယ်။

စစ်အာဏာသိမ်းတဲ့ ၂၀၂၁ ခုနှစ် ဖေဖော်ဝါရီ ၁ ရက်ကတည်းက ဖမ်းဆီးခံခဲ့ရတဲ့ ဝန်ကြီးချုပ် ဦးမြင့်မောင်ကို ရာဇသတ်ကြီးဥပဒေပုဒ်မ ၅၀၅(ခ)နဲ့ ပုဒ်မ ၄၀၉၊ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ ပုဒ်မ ၂၅ တို့နဲ့ ထားဝယ်ထောင်တွင်းတရားရုံးကနေ ၂၀၂၁ ခုနှစ် နိုဝင်ဘာ ၁၁ ရက်နေ့မှာ ထောင်ဒဏ် ၁၁ နှစ်ကျခံစေရန် အပြီးသတ် အမိန့်ချမှတ်ခဲ့ပြီးမှ ပုဒ်မ ၁၃၀(က)နဲ့ အမှု ၂ ခု ထပ်ဖွင့်ခဲ့တာပါ။

ဖွဲ့စည်းပုံအခြေခံဥပဒေပါ ပြဋ္ဌာန်းချက်တွေကို ဖောက်ဖျက်ကျူးလွန်ပါက အရေးယူနိုင်တဲ့ဆိုတဲ့ ရာဇသတ်ကြီးဥပဒေပုဒ်မ ၁၃၀(က)ဟာ ထောင်ဒဏ် ၃ နှစ်ထိဖြစ်စေ၊ ငွေဒဏ်ဖြစ်စေ ဒါမှမဟုတ် ဒဏ်နှစ်ခုစလုံး ချမှတ်နိုင်တဲ့ ပုဒ်မဖြစ်ပါတယ်။

ဦးမြင့်မောင်ဟာ အန်အယ်လ်ဒီအစိုးရလက်ထက်မှာ ဒေါက်တာလဲ့လဲ့မော် အဂတိမှုတွေကြောင့် တာဝန်မှရပ်စဲခံရပြီးနောက် ၂၀၁၉ မတ်လကစတင် ဝန်ကြီးချုပ်တာဝန်ထမ်းဆောင်ခဲ့ပြီး တနင်္သာရီတိုင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးလည်း ဖြစ်ပါတယ်။

မြန်မာနိုင်ငံမှာ စစ်​အာဏာသိမ်းပြီးနောက် ပုဒ်မ ၁၃၀(က) နဲ့ အမှုဖွင့် တရားစွဲဆိုခံခဲ့ရသူတွေထဲမှာ သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်တို့လည်း ပါဝင်ပါတယ်။

အန်အယ်လ်ဒီအစိုးရလက်ထက်မှာ အဂတိလိုက်စားမှုတိုက်ဖျက်ရေး ဥပဒေပုဒ်မ ၅၅ နဲ့ အမှု ၄ ခုဖွင့်ခံရပြီး ထောင်ဒဏ် နှစ် ၃၀ ချမှတ်ခံခဲ့ရတဲ့ တနင်္သာရီတိုင်းဝန်ကြီးချုပ်ဟောင်း ဒေါက်တာလဲ့လဲ့မော်ကိုတော့ စစ်ကောင်စီကနေ နိုဝင်ဘာ ၁၇ ရက်မှာ လွတ်ငြိမ်းချမ်းသာခွင့်နဲ့ ပြန်လွှတ်ပေးခဲ့ပါတယ်။