စစ်အာဏာသိမ်းပြီးနောက်ပိုင်း စစ်ကိုင်းတိုင်း၊ တန့်ဆည်မြို့နယ်မှာ မီးရှို့ဖျက်ဆီးခံရလို့ ဒေသခံ ၁၅,၆၃၀ ယောက် အိုးအိမ်မဲ့ဖြစ်ခဲ့ရပြီး အရပ်သားပြည်သူ ၁၈,၀၀၀ နေရပ်စွန့်ခွာ ထွက်ပြေးတိမ်းရှောင်နေရတယ်လို့ တန့်ဆည်မြို့နယ်၊ ပြည်သူ့အုပ်ချုပ်ရေးအဖွဲ့က ဇန်နဝါရီ ၅ ရက် ဒီနေ့ထုတ်ပြန်ပါတယ်။

တန့်ဆည်မြို့နယ်မှာရှိတဲ့ ကျေးရွာ ၈၃ ရွာကို အကြမ်းဖက်စစ်တပ်က မီးရှို့ဖျက်ဆီးလို့ လူနေအိမ် ၃,၄၇၄ လုံး၊ သာသနိကအဆောက်အဦ ၉ လုံး၊ စာသင်ကျောင်း ၁ ကျောင်းနဲ့ ဆေးရုံဆေးခန်း ၁ ခု ပျက်စီးခဲ့ရပြီး စစ်ကောင်စီတပ်ဖွဲ့ဝင်တွေဟာ အရပ်သားပြည်သူ ၈၁ ယောက်ကိုလည်း သတ်ဖြတ်ခဲ့တယ်လို့ ဆိုပါတယ်။

ပြီးတော့ ဒေသခံအမျိုးသမီးတယောက်ကို အဓမ္မပြုကျင့်ခဲ့သလို တန့်ဆည်မြို့နယ်မှာ စစ်ကောင်စီတပ်ဖွဲ့ဝင်တွေ မီးရှို့ဖျက်ဆီးလို့ ဒေသခံ ၁၅,၆၃၀ ယောက် အိုးအိမ်မဲ့ ဖြစ်ခဲ့ရသလို အရပ်သားပြည်သူ ၁၈,၀၀၀ လောက်ဟာ နေရပ်စွန့်ခွာ ထွက်ပြေးတိမ်းရှောင်နေရတယ်လို့ ဆိုပါတယ်။

ဒီနေ့အချိန်အထိ တန့်ဆည်မြို့နယ် ပြည်သူ့အုပ်ချုပ်ရေးအဖွဲ့၊ လူသားချင်းစာနာ ထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေးဌာန၊ အမျိုးသမီး၊ လူငယ်နဲ့ ကလေးသူငယ်ရေးရာဌာနတို့က ငွေကျပ် သိန်း ၈၁၀ ကျော်ကို အကူအညီလိုအပ်တဲ့ နေရာအသီးသီးကို ထောက်ပံ့နိုင်ခဲ့ပြီး  ချိတ်ဆက်လှူဒါန်းလာကြတဲ့ အလှူရှင်တွေရဲ့ ငွေကြေး၊ အစားအစာ၊ အဝတ်အထည် စတာတွေကိုလည်း ထောက်ပံ့ပေးနိုင်ခဲ့တယ်လို့ ထုတ်ပြန် ဖော်ပြထားပါတယ်။

ကုလသမဂ္ဂအဖွဲ့အစည်းတွေ၊ နိုင်ငံတကာ အဖွဲ့အစည်းတွေနဲ့ အစိုးရမဟုတ်တဲ့ နိုင်ငံတကာ အဖွဲ့အစည်းတွေလည်း မြို့နယ်ထဲမှာ လူသားချင်းစာနာထောက်ထားမှု အကူအညီပေးရေး လုပ်ငန်းတွေ လုပ်ချင်တယ်ဆိုရင် လုံခြုံရေးနဲ့ ထောက်ပံ့ရေးလုပ်ငန်းတွေ ပူးပေါင်းကူညီနိုင်ဖို့ ချိတ်ဆက် ဆောင်ရွက်ကြဖို့အတွက်လည်း အသိပေးထားပါတယ်။

စစ်ကိုင်းတိုင်း၊ တန်ဆည်မြို့နယ်၊  စိမ်းစားကျေးရွာမှာ မတ်၁၂ ရက် ဒီနေ့ နေ့လယ်က လူနေအိမ်တွေကို စစ်ကောင်စီတပ်က မီးရှို့ဖျက်ဆီး သေနတ်နဲ့ပစ်ခတ်ခဲ့လို့ အဘွားအိုတယောက်နဲ့ ဆယ်ကျော်သက် မိန်းကလေးငယ်တယောက် သေဆုံးသွားတယ်လို့  ဒေသခံတွေထံက သိရပါတယ်။

စစ်တပ်ရဲ့ ရမ်းကားပစ်ခတ်မှုကြောင့် အသက် ၁၅ နှစ်အရွယ်  မိန်းကလေးတယောက် ရင်ဘတ်နဲ့ပေါင် ကျည် ၂ ချက်ထိမှန်ကာ သေဆုံးသွားခဲ့ပြီး  ကျေးရွာရှိ လူနေအိမ် ၅ လုံးလောက် မီးရှို့ခံရာကာ အသက် ၇၀ အရွယ်မသန်စွမ်း အဘွားအိုတယောက်လည်း ဘေးအိမ်မီးလောင်ရာက အပူဟပ်ပြီး သေဆုံးသွားတယ်လို့ TSO တန်ဆည်က ထုတ်ပြန်ထားပါတယ်။

ဒေသခံတဦးက “စစ် (-) တွေက ရမ်းပစ်လို့ အမျိုးသမီးငယ်တစ်ဦးသေသွားပြီဗျ။ အဘွားအိုတဦးလည်း မီးလောင်လို့သေသွားတယ်ကြားတယ်။ အိမ်တွေလည်း မီးလောင်နေတယ်”  ပြောပါတယ်။

လတ်တလောအချိန်အထိ ရွာမှာမီးလောင်နေတာကြောင့် ကျေးရွာအတွင်းက ထွက်မပြေးနိုင်တဲ့ သက်ကြီးရွယ်အိုတွေ ပိတ်မိနေကြတယ်လို့ဒေသခံတွေက ပြောပါတယ်။

ကားလမ်းမပေါ်မှာရှိတဲ့ စိမ်းစားကျေးရွာမှာ ပစ်ခတ်မှုတွေဖြစ်ပြီး စစ်တပ်က ရွာကို မီးရှို့နေတာကြောင့် တန်ဆည်-ရေဦးလမ်းပိုင်းမှာ ပြည်သူတွေ အသွားအလာရပ်နားထားပေးဖို့TSO တန်ဆည်က မေတ္တာရပ်ခံထုတ်ပြန်ထားပါတယ်။