ဥရောပရဲ့တန်ဖိုးအမြင့်ဆုံးကစား သမားစာရင်း ထုတ်ပြန်ခဲ့ရာမှာ ရီးရဲလ်မက်ဒရစ်တိုက်စစ်မှူး ဗင်နီဆီးယက်စ်ဂျူနီယာက နံပါတ်တစ်နေရာမှာ ရပ်တည်ခဲ့ပါတယ်။
CIES လို့ခေါ်တဲ့ ဘောလုံးသုတေသနဝက်ဘ်ဆိုဒ်ကနေ ဥရောပထိပ်တန်လိဂ်ကြီး ၅ ခုက ကစားသမား ၁၀၀ ကို စစ်တမ်းလုပ်ပြီး တန်ဖိုးသတ်မှတ်ခဲ့တာပါ။
အဲဒီလိုသတ်မှတ်ရာမှာ ကစားသမားတစ်ဦးချင်းရဲ့ အသက် အရွယ်၊ စာချုပ်သက်တမ်း၊ ပွဲအရေအတွက်၊ သွင်းဂိုး၊ ဂိုးဖန်တီးနိုင်မှုတွေကို အဓိကထည့်သွင်း သတ်မှတ်ပါတယ်။
ဂိုးသမားနဲ့ နောက်ခံလူတွေကိုတော့ ဂိုးမပေးရတဲ့ ပွဲအရေအတွက်နဲ့ တိုင်းတာသတ်မှတ်တာပါ။ လက်ရှိအချိန်အထိ ရီးရဲလ်အတွက် ၁ဝ ဂိုးသွင်း ၄ ကြိမ်ဂိုးဖန်တီးပေးထားတဲ့ ဗင်နီဆီးယက်စ်က ပေါင် ၁၃၉ သန်းတန်ကြေးသတ်မှတ်ခံရပြီး တန်ဖိုးအမြင့်ဆုံး ကစားသမားဖြစ်ခဲ့ပါတယ်။
မန်စီးတီး ကွင်းလယ်တိုက်စစ်ကစားသမား ဖိုဒန်က ပေါင် ၁၂၇ သန်း၊ ဒေါ့မွန်တိုက်စစ်မှူးဟာလန်က ပေါင် ၁၁၉ သန်း၊ မန်ယူက ဂရင်းဝုဒ်က ပေါင် ၁၁၂ သန်းနဲ့ အစဉ်လိုက်ရပ်တည်ပါတယ်။ အဲဒီနောက်မှာ လီဗာကူဆင်က ဖလော်ရီယန်ဝါ့ဇ်၊ ဒေါ့မွန်က ဘယ်လင်ဂမ်၊ ဘိုင်ယန်က အယ်ဖွန်ဆိုဒေးဗီးစ်၊ မန်စီးတီးကရူဘင်ဒီယက်ဖ်၊ ဘာစီလိုနာက ပက်ဒရီနဲ့ ဖရန့်ကီဒီယွန်းတို့က ထိပ်ဆုံး ၁၀ ဦးစာရင်းမှာပါဝင်ခဲ့ပါတယ်။
နာမည်ကြီးတိုက်စစ်မှူး အမ်ဘာပေကတော့ စာချုပ်သက်တမ်း ကုန်ဆုံးခါနီးကြောင့် ပေါင်သန်း၆၀ သာ သတ်မှတ်ခံရပြီး ထိပ်ဆုံး ၁ဝ ဦးအပြင်ဘက်မှာရပ် တည်ခဲ့တာဖြစ်ပါတယ်။ ထိပ်တန်း အယောက် ၂၀ စာရင်းထဲမှာတော့ ပရီးမီးယားလိဂ်က ဆန်ချို၊ ဖာနန်ဒက်စ်၊ အာနိုးလ်၊ မေဆန်မောင့်တို့အပါအဝင် ၇ ဦးအထိပါ ဝင်ခဲ့ပါတယ်။
