ကုလသမဂ္ဂလုံခြုံရေးကောင်စီရဲ့ မြန်မာနိုင်ငံဆိုင်ရာဆုံးဖြတ်ချက်အပေါ် ကန့်ကွက်တဲ့ ဆန္ဒထုတ်ဖော်ပွဲကို တနင်္သာရီတိုင်း၊ မြိတ်မြို့၊ မြိတ်တောင်ကျေးရွာ အရှေ့သိမ်ဘောလုံးကွင်းမှာ  ဇန်နဝါရီ  ၁၂ ရက်က ပြုလုပ်ခဲ့ပါတယ်။

ဒီဆန္ဒပြပွဲကို စစ်ကောင်စီခန့် မြိတ်တောင်အုပ်ချုပ်ရေးက ဦးဆောင်ပြီး ငွေကျပ် ၁၀၀၀၀ စီပေးကာ လူအင်အား ၁၀၀ လောက်နဲ့  ပြုလုပ်ခဲ့တာလို့ ဒေသခံတွေထံက သိရပါတယ်။

“ဒီလိုဆန္ဒပြပွဲက ဒေသခံတွေ သဘောထားမဟုတ်ပါဘူး။ မနက်အစောကတည်းက စစ်တပ်ကားနဲ့ လေတပ်ထဲကထွက်လာကြပြီး မြိတ်တောင်ဘောလုံးကွင်းမှာ လာစုပြီး ၆ နာရီခွဲမှ ၇နာရီအထိ ပွဲလာလုပ်တယ်။ အပြင်လူမဝင်ရဆိုပြီးမောင်းထုတ်တာတွေလုပ်တယ်။ စစ်တပ်ဆက်နွှယ်သူတွေ အချင်းချင်း အပြန်အလှန်ထောက်ခံနေကြတာပါ။”လို့ မြို့ခံတစ်ဦးက ပြောပါတယ်။

ဒီဆန္ဒထုတ်ဖော်ပွဲမလုပ်ခင် လွန်ခဲ့တဲ့ ၃ ရက်လောက်က ဆေးတပ်က ဗိုလ်မှူးဇေယျာဝင်းကနေပြီး ဘိတ်တောင်အုပ်ချုပ်ရေးမှူးရုံးမှာ အစည်းအဝေးလုပ်တယ်လို့လည်း ဒေသခံတွေထံက သိရပါတယ်။

မြို့ခံတက်ကြွလုပ်ရှားသူတစ်ဦးက  “ကုလသမဂ္ဂလုံခြုံရေးကောင်စီရဲ့ ဆုံးဖြတ်ချက်အပေါ် ကန့်ကွက်ရှုတ်ချတဲ့ လုပ်ရပ်ဆိုတာကတော့ အကြမ်းဖက်စစ်အုပ်စုအနေနဲ့ အမြဲလုပ်နေတဲ့အရာမျိုးဖြစ်နေပါပြီ။ ဘာကြောင့်ဆို စကစကို ပိတ်ဆို့အရေးယူမှုလုပ်တိုင်း ဒီလိုတုံ့ပြန်မှုတွေလုပ်နေကြတာပါပဲ။ သူတို့မှာလုပ်နိုင်တာပြောနိုင်တာ ဒီအဆင့်ပဲ့ရှိတယ်ဆိုတော့ စကစအခြေအနေကလည်း ခွေးသေကောင်ပုပ် လည်ပင်းဆွဲပြီး လျှောက်သွားနေတဲ့ အရူးမျိုးဖြစ်နေပါပြီ”လို့ ပြောပါတယ်။

မြိတ်မြို့ခံတစ်ဦးက “ကျနော်တို့ရဲ့ပြည်သူ့ဆန္ဒအစစ်အမှန်ကတော့ နိုင်ငံတကာရဲ့အကူအညီကို မလျော့တမ်းဇွဲနဲ့ တောင့်ခံပြီး စောင့်နေတာမို့ အနှေးနဲ့အမြန် ကူညီပေးကြပါ”လို့ တောင်းဆိုပါတယ်။

မြန်မာနိုင်ငံမှာ ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားတွေအားလုံး ပြန်လွှတ်ပေးဖို့ တောင်းဆိုတာပါဝင်တဲ့ ဆုံးဖြတ်ချက်ကို ကုလသမဂ္ဂ လုံခြုံရေးကောင်စီက ဒီဇင်ဘာ ၂၁ ရက်မှာ ကန့်ကွက်သူမရှိ အတည်ပြုခဲ့တာဖြစ်ပါတယ်။

ရန်ကုန်၊ ကမာရွတ်မြို့နယ်၊ တက္ကသိုလ်ရိပ်သာလမ်းမပေါ်ရှိ အမေရိကန်သံရုံးရှေ့မှာ  ဒီဇင်ဘာ ၂၈ ရက် ဒီမနက် ၁၀ နာရီလောက်က  အမျိုးသားရေးသမားနဲ့  ကြံ့ခိုင်ရေးတွေအပါအဝင် တပ်ထောက်ခံသူတွေက နေ့စားခယူပြီး ဆန္ဒပြကြတယ်လို့ မြို့ခံတွေဆီက သိရပါတယ်။

အမေရိကန်သံရုံးကို ဟိုက်ဂျက်ကားတစီးနဲ့ အမျိုးသားရေးသမားနဲ့ ကြံ့ခိုင်ရေးပါတီဝင်တွေအပါဝင် အယောက် ၂၀ လောက် ရောက်ရှိလာပြီး ဆန္ဒပြကြတာဖြစ်တယ်လို့ မြို့ခံတစ်ဦးက ပြောပါတယ်။

"သူတို့ကိုကြည့်ရင် ဘာမှသိလို့မဟုတ်ဘူး။ နေ့စားခရလို့ ဆန္ဒလာပြကြတာ။ စစ်တပ်က အာဏာသိမ်းပြီး စစ်တပ်ထောက်ခံတာ NUG နဲ့ PDF ကို ကန့်ကွက်တာ ဒီလူတွေပဲ ဆန္ဒပြကြတာ ငွေထုတ်ပေးတဲ့သူရှိလို့ လိုက်လုပ်နေတာ။”

ဆန္ဒပြသူတွေကို စစ်ကောင်စီတပ်နဲ့ ရဲတွေက စစ်ဆေးမေးမြန်းခြင်းမရှိဘဲ လုံခြုံရေးယူပေးထား တယ်လို့  မျက်မြင်တွေ့ရှိသူတစ်ဦးက ပြောပါတယ်။

"အမေရိကန်သံရုံးရှိတဲ့လမ်းကဖြတ်သွားရင်တောင် စစ်တပ်က စစ်နေတာ။ ဒီလိုဆန္ဒပြတာကို ခွင်ပြုတယ်ဆိုတော့ စစ်တပ်ကငွေပေးပြီးလုပ်ခိုင်းတာ သိသာတယ်။”

NUG၊ CRPH၊ PDF ကိုကူညီပေးဖို့ပါဝင်တဲ့ အမျိုးသားကာကွယ်ရေးအက်ဥပဒေ (NDAA 2023) ကို အမေရိကန်သမ္မတက လက်မှတ်ရေးထိုး အတည်ပြုပြဋ္ဌာန်းလိုက်တာဟာ ပြည်တွင်းရေး စွက်ဖက်တာလို့ စစ်ကောင်စီက ကြေညာပြီး နောက် တနေ့မှာ တပ်ထောက်ခံသူတွေက သံရုံးရှေ့ လာရောက်ဆန္ဒပြတာဖြစ်ပါတယ်။