close

တပ်မဟာ ၅

close

January 31, 2022

ဖာပွန်မြို့က စစ်ကောင်စီဝန်ထမ်းအားလုံး ၁၀ ရက်အတွင်းထွက်ခွာရန် KNLA က သတိပေး

​ကေအန်ယူ ကရင်အမျိုးသားအစည်းအရုံး၊ တပ်မဟာ ၅ ​ထိန်းချုပ်နယ်မြေ ဖာပွန်(မူတြော်) ခရိုင်အတွင်း  စစ်ကောင်စီလက်အောက်မှာ တာဝန်ထမ်းဆောင်နေတဲ့ ဝန်ထမ်းတွေ မိမိတို့နေရပ်ကို ဖေဖော်ဝါရီ ၁ ရက်နေကစတင်ပြီး ၁၀ ရက်အတွင်း ပြန်လည်ထွက်ခွာဖို့ ဇန်နဝါရီ ၂၉ ရက်မှာ တပ်မဟာ ၅ စစ်ရုံးချုပ်က အသိပေး ထုတ်ပြန်လိုက်ပါတယ်။

စစ်ကောင်စီရဲ့ အုပ်ချုပ်ရေးယန္တရားလည်ပတ်နေတာတွေရပ်တန့်ဖို့ စစ်ကောင်စီလက်အောက်က အရပ်ဘက်ဆိုင်ရာ ဌာနအသီးသီးကဝန်ထမ်းတွေကို ဖေဖော်ဝါရီ ၁၀ ရက်နေ့ နောက်ဆုံးထားပြီး  ရေလမ်းခရီးကနေ အတားအဆီးမရှိ ထွက်ခွာပေးဖို့ သတိပေးထားတာပါ။

ဒါ့အပြင် ဖာပွန်မြို့ခံ ဝန်ထမ်းတွေအနေနဲ့ စစ်ကောင်စီရဲ့လက်အောက်မှာ တာဝန်ထမ်းဆောင်တာကို ရှောင်ရှားဖို့ သတိပေးအကြောင်းကြားထားသလို လိုက်နာမှုမရှိဘဲ ပျက်ကွက်ပါက ထိရောက်စွာ အရေးယူ ဆောင်ရွက်သွားမယ်လို့ ဆိုပါတယ်။

ဖာပွန်မြို့ခံ ဝန်ထမ်းတစ်ဦးက “စာထုတ်ထားတာ တွေ့တယ်။ အခုလို တိုင်းပြည် မငြိမ်မသက်ဖြစ်နေတဲ့အချိန်မှာ ဝန်ထမ်းလုပ်ချင်လို့တော့ မဟုတ်ဘူး။ မိသားစု စားဝတ်နေရေးကြောင့် လုပ်နေရတာ။ အသက်ထက်တော့ ဘယ်ဟာမှ အရေးမကြီးပါဘူး” လို့ ပြောပါတယ်။

လက်ရှိအချိန်ထိ မြန်မာနိုင်ငံအတွင်းဖြစ်ပေါ်နေတဲ့ စစ်ကောင်စီရဲ့ လုပ်ရပ်တွေအပေါ် တနိုင်ငံလုံးက ပြည်သူတွေဟာ နည်းမျိုးစုံနဲ့ ဆန္ဒပြတော်လှန်နေတာကို ကမ္ဘာအသိပင်ဖြစ်လို့ KNU/KNLA တပ်မဟာ ၅ နယ်မြေအတွင်းမှာ စစ်ကောင်စီ အုပ်ချုပ်ရေးယန္တရား မလည်ပတ်နိုင်ရေးအတွက် အခုလို သတိပေး ထုတ်ပြန်ခဲ့တာပါ။

ဒီက​နေ့အထိ စစ်ကောင်စီတပ်၊ BGF ပူးပေါင်းတပ်ဖွဲ့တွေနဲ့ KNLA ပူးပေါင်းတပ်ဖွဲ့တို့ နှစ်ဖက်တိုက်ပွဲတွေ ပိုမိုပြင်းထန်နေတဲ့အပြင် စစ်ကောင်စီတပ်တွေက အရပ်သားအသွင်အိမ်စီးကားတွေနဲ့ လူ၊ လက်နက်ခဲယမ်း၊ ရိက္ခာတွေပို့ဆောင်နေတဲ့အတွက် ကမမောင်း - ဖာပွန် လမ်းကြောင်းတွေ​ဖြစ်တဲ့ ရေလမ်း၊ ကုန်လမ်းတွေကို တရားဝင်အသိပေးပြီး ဇန်နဝါရီ ၁၅ ရက်နေ့က စတင်ပြီး ပိတ်ထားခဲ့ပါတယ်။

အခုအခါ စစ်ကောင်စီအုပ်ချုပ်မှုအောက်က ဝန်ထမ်းတွေ မိမိနေရပ်ပြန်နိုင်ရေးအတွက် ရေလမ်းကြောင်းကို ဇန်နဝါရီ ၂ ရက်နေ့ကစတင်ပြီး ပြန်လည်ဖွင့်လှစ်ပေးထားတယ်လို့ ဒေသခံတွေက ပြောပါတယ်။

တပ်မဟာ ၅ နယ်မြေမှာ စစ်ကောင်စီတပ်တွေက လက်နက်ကြီးပစ်ခတ်မှုတွေအပြင် လေကြောင်းကပါ လေယာဉ်နဲ့ဗုံးကြဲတိုက်ခိုက်ခဲ့တဲ့အတွက် ဒေသခံတချို့ လက်နက်ကြီးကျဉ်ထိမှန်ပြီး နေအိမ်တွေပါ ပျက်စီးခဲ့သလို နေထိုင်စားသောက်ရေးအတွက် မိမိတို့ပိုင် ဥယျာဥ်ခြံလုပ်ငန်းလုပ်ကိုင်ရာမှာ မြေမြှုပ်မိုင်းအန္တရာယ်ကိုပါ စိုးရိမ်နေရသလို နှစ်ဖက်တိုက်ပွဲတွေကြောင့် သောင်းနဲ့ချီတဲ့ ဒေသခံတွေဟာ နေရပ်စွန့်ခွာ ထွက်ပြေးတိမ်းရှောင် နေရပါတယ်။

7 mins Ago

December 9, 2021

PDF များကိုပွဲထုတ် ပူးပေါင်းစစ်ဆင်ရေးလုပ်နေဟု ကေအန်ယူ တပ်မဟာ ၅ ပြော

ကရင်အမျိုးသားအစည်းအရုံး (ကေအန်ယူ) လက်အောက်ခံ ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ- ၅ က ပြည်သူ့ကာကွယ်ရေးတပ် (PDF)တွေကို ပွဲထုတ်ပြီး ပူးပေါင်းစစ်ဆင်ရေး  ပြုလုပ်နေတယ်လို့ တပ်မဟာ ၅  ပြောခွင့်ရသူ  ပဒိုမန်းမန်းက ပြောပါတယ်။

ကေအန်ယူမူတြော်ခရိုင် အနေနဲ့ စစ်အာဏာသိမ်းပြီးကတည်းက CDMတွေအပါအဝင် Gen Z တွေကို လက်ခံ ခိုလှုံခွင့်ပေးခဲ့သလို အမျိုးသားညီညွတ်ရေးအစိုးရဖွဲ့စည်းပြီး ပြည်သူ့ကာကွယ်ရေးတပ်တွေ ဖွဲ့စည်းချိန်မှာလည်း  သင်တန်းပေးတာအပါအဝင် ပူးပေါင်းဆောင်ရွက်မှုတွေဟာ အခြေခံအားဖြင့် ရှိပြီးသားဖြစ်တယ်လို့ ပဒိုမန်းမန်းကပြောပါတယ်။

ဒါကြောင့် မြို့တွင်းပျောက်ကျားစစ်ဆင်ရေးအပြင် မြေပြင်ရင်ဆိုင်တိုက်ပွဲတိုက်ခိုက်မှုတွေကိုလည်း လေ့ကျင့်ပေးရမှာဖြစ်တဲ့အတွက် အခုလို ပူးပေါင်းစစ်ဆင်ရေးတွေမှာ ပါဝင်တိုက်ခိုက်စေတာလို့ ဆိုပါတယ်။

မြန်မာနိုင်ငံတဝန်း PDFတပ်တွေ များစွာရှိနေပြီး အားလုံးဟာ စစ်ကောင်စီပြုတ်ကျရေးအတွက် ပူးပေါင်းတိုက်ပွဲဝင်ရမှာ ဖြစ်တယ်လို့ဆိုပါတယ်။

ဒါပေမဲ့ နောက်ပိုင်းမှာတော့ အမျိုးသားညီညွတ်ရေးအစိုးရရဲ့ ကာကွယ်ဝန်ကြီးဌာနအောက်မှာ PDF အားလုံးပါဝင်လာဖို့လိုအပ်ပြီး အဲဒီလိုဖြစ်အောင်လည်း ကြိုးစားကြဖို့ ပဒိုမန်းမန်းက တိုက်တွန်းပါတယ်။

လက်ရှိမှာတော့ ကေအန်ယူအနေနဲ့ နယ်မြေတွေပြန်လည်ရရှိနိုင်ရေး၊ အုပ်ချုပ်ရေး၊ တရားစီရင်ရေး၊ စစ်ရေးတွေမှာ စိုးမိုးနိုင်ရေးအတွက် လူထုတိုက်ပွဲနဲ့ အတူ ကြိုးစားဆောင်ရွက်နေတယ်လို့ ဆိုပါတယ်။

အမျိုးသားညီညွတ်ရေးအစိုးရအနေနဲ့လည်း ဒေသအလိုက်ဖွဲ့စည်းထားတဲ့ ကာကွယ်ရေးတပ်တွေနဲ့ ချိတ်ဆက်ဆောင်ရွက်နိုင်ဖို့အတွက် အထူးအလုပ်အဖွဲ့ဖွဲ့စည်းပြီး ချိတ်ဆက်ဆောင်ရွက်နေသလို လက်ရှိမှာလည်း ဒေသဆိုင်ရာကာကွယ်ရေးတပ်တွေရဲ့ ၉၀ ရာခိုင်နှုန်းလောက်နဲ့ ချိတ်ဆက်ဆောင်ရွက်နိုင်ပြီလို့ NUG ကာကွယ်ရေးဝန်ကြီးက ပြောပါတယ်။

KNLA တပ်မဟာ  (၅) လက်အောက်ခံတပ်တွေဟာ ပြီးခဲ့တဲ့ ဒီဇင်ဘာ ၆ ရက်နေ့က မထောကျေးရွာကနေထွက်ခွာလာတဲ့ စစ်ကောင်စီစစ်ကြောင်းကို မိုင်းဆွဲတိုက်ခိုက်ခဲ့ရာမှာ စစ်ကောင်စီတပ်က တယောက်သေ တယောက်  ဒဏ်ရာရရှိခဲ့တယ်လို့ ကေအန်ယူက သတင်းထုတ်ပြန်ပါတယ်။ 

ဒါ့အပြင် KNLAတပ်ဖွဲ့ဝင်တွေနဲ့ PDF တွေပူးပေါင်းပြီး စစ်ကောင်စီစစ်ကြောင်းကို ပြောက်ကျားဝင်တိုက်ခဲ့ရာမှာ စစ်ကောင်စီဘက်က ၄ ယောက်သေပြီး ၆ ယောက် ဒဏ်ရာရရှိခဲ့တယ်လို့လည်း သတင်းထုတ်ပြန်ချက်မှာဖော်ပြထားပါတယ်။

အလားတူ ကေအန်ယူ တပ်မဟာ ၁ နယ်မြေထဲမှာလည်း စစ်ကောင်စီတပ် အင်အား ၅၀ ကျော်လောက် ကျူးကျော်ဝင်ရောက်လာပြီး တပ်စွဲထားတာကြောင့် ကေအန်ယူနဲ့ NUG လက်အောက်ခံ အမှတ်(၁) PDF တို့ပူးပေါင်းပြီးဒီဇင်ဘာ ၉ ရက် ညနေ ၅နာရီခွဲဝန်းကျင်မှာသွားရောက်တိုက်ခိုက်ခဲ့ပါတယ်။

အဲဒီတိုက်ပွဲမှာ ကေအန်ယူနဲ့ PDF ဘက်က ထိခိုက်ကျဆုံးမရှိခဲ့သလို စစ်ကောင်စီဘက်က ထိခိုက်သေဆုံးမှုကိုလည်း မသိရသေးဘူးလို့ အဲဒီတိုက်ပွဲမှာပါဝင်ခဲ့တဲ့ PDF တပ်ဖွဲ့ဝင်တစ်ယောက်ကပြောပါတယ်။

အခုလို စစ်ကောင်စီတပ်ဖွဲ့ဝင်တွေကို သွားရောက်တိုက်ခိုက်တာဟာ ကြည့်မြင်တိုင်မြို့နယ်မှာ ငြိမ်းချမ်းစွာ ဆန္ဒပြတဲ့ပြည်သူတွေကို ကားနဲ့အကြမ်းဖက်တိုက်ခိုက် သတ်ဖြတ်တာကို လက်စားချေတဲ့အနေနဲ့ သွားရောက်တိုက်ခိုက်ခဲ့တာလို့လည်းဆိုပါတယ်။

အာဏာသိမ်းစစ်ကောင်စီအနေနဲ့ ပြည်သူတွေကို ထပ်ပြီး အနိုင်ကျင့် ညှဉ်းပန်းနှိပ်စက်နေဦးမယ် ဆိုရင် အခုထက်ပိုပြင်းထန်တဲ့ စစ်ဆင်ရေးတွေနဲ့ တုံ့ ပြန်သွားမည် လို့လည်း အဲဒီတိုက်ပွဲမှာပါဝင်ခဲ့တဲ့ PDF တပ်ဖွဲ့ဝင်တစ်ယောက်က ဒီဲဗွီဘီကို ပြောပါတယ်။

2 months Ago
Up