ပဲခူးတိုင်း၊ ကျောက်ကြီးမြို့နယ်၊ နတ်သံကွင်း စစ်တောင်း တံတားကနေ အောက်တိုဘာ ၂၈ ရက် ဒီမနက် ၉ နာရီ ဝန်းကျင်မှာ စစ်ကောင်စီတပ်က လက်နက်ကြီးနဲ့ ပစ်ခတ်တာကြောင့် တောင်ကြောင်ပေါက်ကျေးရွာ ဝါးပင်စုက အမျိုးသားတယောက်နဲ့ အမျိုးသမီးတယောက်တို့ ထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။

တိုက်ပွဲမဖြစ်ဘဲ ပြည်သူတွေနေတဲ့ ရွာထဲကို ညတိုင်း လက်နက်ကြီးနဲ့ နှစ်လုံးလောက် ပစ်တာမှာ ရွာအပြင်ဘက်ပဲ ကျပြီး အခု မနက်တော့ ရွာထဲကျတာကြောင့်  ရွာသူ ရွာသား နှစ်ယောက် မျက်စိ၊ ရင်ဘတ်နဲ့ ပေါင်တို့မှာ ဒဏ်ရာရသွားတယ်လို့ ဒေသခံတစ်ဦးက ပြောပါတယ်။ 

ကေအန်ယူ တပ်မဟာ ၃ တပ်ရင်း ၉ နယ်မြေမှာ အခုနှစ်ထဲ စစ်ကောင်စီပစ်ခတ်တဲ့ လက်နက်ကြီးကျည်ကျပြီး အမျိုးသား နှစ်ယောက်၊ အမျိုးသမီးတယောက် သေဆုံးကာ ကလေးငယ်တွေ အပါအဝင် ၂၀ ကျော် ထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ကေအန်ယူ တပ်မဟာ ၇ နယ်မြေ မိဖလယ်ကျေးရွာ(ခ)နောင်ကိုင်းကျေးရွာမှာတော့ KNU ခွဲထွက်အဖွဲ့တဖွဲ့ဖြစ်တဲ့  KNU/KNLA -PC ငြိမ်းချမ်းရေးကောင်စီ အဖွဲ့ဝင် တစ်ယောက်ရဲ့ နေအိမ်ကို အမည်မသိလက်နက်ကိုင်တပ်ဖွဲ့က အောက်တိုဘာ ၂၇ ရက် မနေ့ ည ၇ နာရီလောက်က ဝင်ရောက်ပစ်ခတ်သွားတယ်လို့  ကျေးရွာနေထိုင်သူ တဦးက ပြောပါတယ်။

ငြိမ်းချမ်းရေးကောင်စီ တပ်ရင်း ၇၇၇ တပ်ရင်းမှူး ဒုတိယဗိုလ်မှူး စောဝင်းကျော် နေအိမ်ကို မနေ့ညက ဝင်ရောက်ပစ်ခတ်ရာမှာ အိမ်မှာနေတဲ့  တပ်ရင်းမှူးဇနီး နော်ဖောဝါး အသက်(၃၈)နှစ် သေဆုံးသွားတယ်လို့ မျက်မြင်တွေ့သူက ပြောပါတယ်။

သေဆုံးသွားသူဟာ မိဖလယ်ကျေးရွာနဲ့ အနီးနားကျေးရွာတွေမှာ မူးယစ်ဆေးဝါးရောင်းတာ၊ အာဝါဒေး လောင်းကစားဝိုင်းဖွင့်တာနဲ့ တခြားဥပဒေမကင်းတဲ့လုပ်ငန်းတွေ လုပ်နေတာကြောင့် ဒေသခံနဲ့ ဘုန်းတော်ကြီးတွေက မလုပ်ဖို့ပြောပေမဲ့ မရပ်ဘဲ ဆက်လုပ်နေသူဖြစ်တယ်လို့ သေဆုံးသွားသူရဲ့ မိသားစုနဲ့ နီးစပ်သူက ပြောပါတယ်။

ပစ်ခတ်မှုဖြစ်ပွားချိန် အိမ်တွင်းမှာ တပ်ရင်းမှူးနဲ့ တပ်သားတချို့နေထိုင်ကြကာ နေအိမ် နဲ့ တပ်ရင်းမှူး ရဲ့ကားလည်း မီးလောင်ကျွမ်းသွားပါတယ်။ 

သေဆုံးတဲ့ နော်ဖောဝါးရဲ့ ရုပ်အလောင်းကို အောက်တိုဘာ ၂၈ ရက် ဒီနေ့မွန်းလွဲပိုင်းမှာ သင်္ဂြိုဟ်သွားဖို့ရှိပါတယ်။

ရှမ်းပြည်နယ်မြောက်ပိုင်း၊ မူဆယ် ၁၀၅ မိုင်၊ အထက်တုန်ခန်ရွာနားက ကားဝပ်ရှော့တခုမှာ အောက်တိုဘာ ၁၈ ရက် ညနေပိုင်း ၃ နာရီခွဲကျော်က တပ်ရင်းမှူး ၁ ဦး ပစ်သတ်ခံရတယ်လို့ စစ်တပ်နဲ့ နီးစပ်သူတွေဆီက သိရပါတယ်။

ခလရ ခြေလျင် ၄၁၂ တပ်က တပ်ရင်းမှူး ဒု-ဗိုလ်မှူးကြီးပြည့်ဖြိုးအောင် သေနတ်နဲ့ ၇ ချက် ပစ်ခံရတာလို့ စစ်တပ်နဲ့ နီးစပ်သူတဦးက ပြောပါတယ်။ 

“၃ နာရီခွဲဝန်းကျင်မှာ တုန်ခန်နားမှာ စစ်ဗိုလ်တယောက် ပစ်ခံထားရတယ်။ ၇ ကြိမ် ပစ်ထားတယ်၊ တခါတည်း ပွဲချင်းပြီးတော့ မသေဘူး၊ ဒဏ်ရာပြင်းလို့ အသက်အန္တရာယ် စိုးရိမ်ရတယ်” လို့ အမည်မဖော်လိုသူ ဒေသခံတဦးက ပြောပါတယ်။ 

“ကားပျက်လို့ သွားပြင်တဲ့အချိန် ပစ်ခတ်ခံရပြီး ဆေးကုသနေချိန် သေဆုံးသွားတာ။ ဘယ်သူက ပစ်ခတ်သွားသလဲ ဆိုတာကို မသိရသေးသလို တခြားဘယ်သူတွေ ထိခိုက်ဒဏ်ရာရသလဲ၊ ဘယ်နှယောက်ပါသွားလဲ ဆိုတာကို အတိအကျ မသိရသေးဘူး။ သူက ဘယ်သွားသွား အမြဲတမ်း တယောက်တည်း သွားတာ။ အရပ်ဝတ်နဲ့လျှောက်သွားနေတာ။ .... ၂ ရက်ရှိသေးတယ်။ သူ့ကို တယောက်တည်း မထွက်နဲ့လို့ သတိပေးလိုက်သေးတယ်” လို့ အဲဒီ ဗိုလ်မှူးကြီးနဲ့ ရင်းနှီးသူတဦးက ပြောပါတယ်။

အောက်တိုဘာ ၁၈ ရက်နေ့ ည ၁၀ နာရီကျော်လောက်ကလည်း ၁၀၅ မိုင်မှာ လက်နက်ကြီး ပစ်ခတ်သံတွေ ကြားနေရတာကြောင့် ဒေသခံတွေ ကြောက်လန့်‌စိုးရိမ်နေကြရတယ်လို့ ဆိုပါတယ်။ 

မူဆယ် ၁၀၅ မိုင် ကုန်သွယ်ရေးဇုန် ပို့ကုန်စစ်ဆေးရေးစခန်းအနီး ရပ်ကွက်ထဲ ပြီးခဲ့တဲ့ အောက်တိုဘာ ၁၅ ရက် ညနေက အသက် ၂၇ နှစ်အရွယ် အမျိုးသားတဦး အမည်မသိ လက်နက်ကိုင်အဖွဲ့ရဲ့ ပစ်သတ်ခံခဲ့ရသလို အောက်တိုဘာ ၆ ရက်နေ့မှာလည်း မူဆယ်မြို့‌ နမ္မတူ မိတ္တူဆိုင်အနီးမှာ မြို့နယ်တရားသူကြီး ဦးမင်းရာဇာစိုးကို အမည်မသိ လက်နက်ကိုင် ၂ ဦးက ပစ်သတ်ခဲ့ပါတယ်။ 

အခု တပ်ရင်းမှူး ပစ်ခတ်ခံခဲ့ရတဲ့နေရာမှာ ပြီးခဲ့တဲ့ ၂၀၂၁ မေ ၁၁ ရက် ညနေ ၅ နာရီလောက်လည်း ၁၀၅ မိုင် နယ်စပ်ကုန်သွယ်ရေးဇုန်က ညွှန်ကြားရေးမှူး ဦးမင်းအောင်အေးကို အမည်မသိ လက်နက်ကိုင်အဖွဲ့က သေနတ်နဲ ၄ ချက် ပစ်ခတ်ခံခဲ့ပါသေးတယ်။

မူဆယ်မြို့နယ်မှာတော့ စစ်ကောင်စီတပ်၊ ပြည်သူ့စစ်တပ်ဖွဲ့ အဖွဲ့ ၂၀ နီးပါးအပြင် တိုင်းရင်းသား လက်နက်ကိုင်တွေဖြစ်တဲ့ KIA, PDF, TNLA, SSPP/ SSA, MNDAA အဖွဲ့တွေ သွားလာလှုပ်ရှားပြီး ၂၀၂၁ နောက်ပိုင်းမှာတော့ လောင်းကစားဝိုင်းတွေ ရာချီရှိလာပြီးအုပ်စုဖွဲ့ကာ လက်နက်နဲ့ ဓားပြတိုက်သူတွေလည်း ပေါများလာပါတယ်။